ޔޫރޯ 2020 - ބެލްޖިއަމާއި ރަޝިއާގެ ކުރިމަތިލުން

ޔޫރޯ 2020 ގެ ގްރޫޕް ބީ ގެ މެޗުތައް ހޮނިހިރު ދުވަހު ފަށާއިރު، ގްރޫޕް ބީ ގެ ދެވަނަ މެޗުގައި ބައްދަލުކުރާނީ ބެލްޖިއަމާއި ރަޝިއާއެވެ. މި މެޗު ކުޅޭނީ ރަޝިއާގެ ކްރެސްޓޮވްސްކީ ސްޓޭޑިއަމުގައެވެ. އެ ސްޓޭޑިއަމަކީ 67،800 މީހުންގެ ޖާގައިގެ ސްޓޭޑިއަމެކެވެ. އެކަމަކު މި މެޗު ބަލަން ދަނޑަށް ވައްދާނީ 50 އިންސައްތަ ސަޕޯޓަރުންނެވެ.

މި ފަހަރުގެ ޔޫރޯގައި މި ވަގުތު ދުނިޔޭގެ ރޭންކިންގެ އެއްވަނައިގައި އޮތް ބެލްޖިއަމް ފާހަގަކޮށްލެވެނީ މުބާރާތުގެ ފެވަރިޓުންގެ ތެރޭގައި ހިމެނޭ ގައުމެއް ގޮތުގައެވެ. 2018 ވަނަ އަހަރުގެ ފީފާ ވޯލްޑް ކަޕުގައި ބެލްޖިއަމުން ދެއްކި ކުޅުން މި ފަހަރުގެ މުބާރާތުގައި ދައްކައިފިނަމަ، މި މުބާރާތުގެ ޗެމްޕިއަންކަން އެ ގައުމަށް ނެގޭނެ ކަމަށް ގިނަ ބަޔަކު ގަބޫލުކުރެއެވެ.

މި މުބާރާތަކީ ބެލްޖިއަމަށް އެތަށް ގޮތަކުން މުހިންމު މުބާރާތެކެވެ. އެއީ މި މުބާރާތަކީ ބެލްޖިއަމުގެ "ރަންޖީލު" ޔޫރޯގައި ކުޅޭނެ ފަހު މުބާރާތް ކަމަށް ވުމުންނެވެ. މި ފަހަރުގެ ޔޫރޯއާ ބެލްޖިއަމް ކުރިމަތިލާއިރު، އެ ގައުމު ޔޫރޯއިން ފުރުސަތު ހޯދާފައިވަނީ ކޮލިފައިންގައި ސައްތައިން ސައްތަ ރިކޯޑަކާއެކުއެވެ.

ޔުއެފާ ޗެމްޕިއަންސް ލީގުގެ ފައިނަލުގައި މެންޗެސްޓާ ސިޓީއަށް ކުޅެމުން އަންނަ މިޑްފީލްޑަރު ކެވިން ޑި ބްރޭނާގެ ލޯ ކައިރިއަށް ލިބުނު އަނިޔާއިން އެއްކޮށް ރިކަވާވެ ފަރިތަކުރުންތަކުގައި ބައިވެރިވި ނަމަވެސް، މި މެޗުގައި އޭނާއަށް ނުކުޅެވޭނެއެވެ. މީގެ ކުރިން ޑި ބްރޭނާއަށް މި މެޗުގައި ކުޅެވޭނެ ކަމަށް ބެލެވުނު ނަމަވެސް، މާޓިނޭޒް ބުނީ އޭނާގެ އުއްމީދަކީ ރަޝިއާ މެޗަށްފަހު ވީ އެންމެ އަވަހަށް ޑި ބްރޭނާ ޓީމާ ގުޅުން ކަމަށެވެ.

ރަޝިއާއަކީވެސް ބެލްޖިއަމަށް ދޫދޭނެ ޓީމެއް ނޫންކަން ކަށަވަރެވެ. ރަޝިއާއިން މި ފަހުން ކުޅުނު މެޗުތަކުގައި ތަފާތު މޮޅު ކުޅުމެއް ދެއްކިއިރު، އެ ޓީމުން ވަނީ މި މުބާރާތަށް ވަރަށް ރަނގަޅަށް ތައްޔާރުވެސް ވެފައެވެ.

ރަޝިއާގެ ކޯޗު ސްޓަނިސްލާވް ޗެރްޗެޝޯފް ބުނީ އެންމެ ފަހުގެ ވޯލްޑް ކަޕުގައި ބެލްޖިއަމުން ބޭނުންކުރި ސްކޮޑުގައި ހިމެނޭ ޓީމުގެ 18 ކުޅުންތެރިން އެ ޓީމުގައި ތިބުމަކީ ބެލްޖިއަމަށް އޮތް ފައިދާއެއް ކަމަށެވެ. އަދި ރަޝިއާއިން އެންމެ ފަހުން ބެލްޖިއަމާ ދެކޮޅަށް ކުޅުނު ތިން މެޗުގެ ތެރެއިން ދެ މެޗުން ބަލިވެ، އަނެއް މެޗުން އެއްވަރުވެފައިވީ ނަމަވެސް، މި މެޗަށް އޭގެ އަސަރެއް ކުރާނެ ކަމަށް ނުދެކޭ ކަމަށްވެސް ބުންޏެވެ. އަދި ބެލްޖިއަމާ ދެކޮޅަށް ކުޅޭ މެޗަށް ރަޝިއާއިން ނުކުންނާނީ ރަޝިއާގެ ކުޅުންތެރިންގެ އެންމެ މޮޅު ކުޅުން ދެއްކުމަށް ކަމަށްވެސް ވަނީ ބުނެފައެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ވަގުތުން ރާއްޖެޓީވީން ގެނަސްދޭނެއެވެ. އެގޮތުން މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ކުޅިވަރު ނޫސްވެރިޔާ އިސްމާޢީލް ޝާހެވެ. ޝާހާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް ބީ ގެ އެނަލިސްޓު މުޙައްމަދު ނިޒާމް (ނިޒާމްބެ) އެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއްވެސް ބައިވެރިވާނެއެވެ.

ބެލްޖިއަމާއި ރަޝިއާ ބައްދަލުކުރާ މެޗު ފަށާނީ ހޮނިހިރު ދުވަހުގެރޭ ދަންވަރު 00:00 ގައެވެ.