ޖަރުމަނުން 21 އަހަރުން ދަށުގެ ޔޫރޯ ކާމިޔާބުކޮށްފި

ފައިނަލް މެޗުގައި ޕޯޗުގަލް ބަލިކޮށް ޖަރުމަނުން 21 އަހަރުން ދަށުގެ ޔޫރޯ ފުޓްބޯޅަ މުބާރާތް ކާމިޔާބުކޮށްފިއެވެ.

އާދީއްތަ ދުވަހުގެރޭ ކުޅުނު ފައިނަލް މެޗުން ޖަރުމަން މޮޅުވީ 1-0 ގެ ނަތީޖާއަކުންނެވެ.

ސްލޮވީނިއާގައި ކުޅުނު ފައިނަލް މެޗު ފަށައިގެން ޖަރުމަނުން ގިނަ ހަމަލާތަކެއް އުފެއްދިއިރު، ޖަރުމަނުގެ ފްލޯރިއަން ވާޓްޒް ފޮނުވާލި ހަމަލާއެއް ވަނީ ގޯލުގެ ދަނޑިއަށް އަމާޒުވެފައެވެ. އަދި އޭގެ ފަހުން އެ ގައުމުގެ އަދި ޖަރުމަނުގެ އާން މަޔާއަށްވެސް ވަނީ ލަނޑެއް ޖަހަން ހުސް ފުރުސަތެއް ލިބި ބޭކާރުވެފައެވެ.

މި މެޗުގައި ޕޯޗުގަލަށް ޖަރުމަނުގެ ގޯލާ އަމާޒުކޮށް އެންމެ ހަމަލާއެއް ފޮނުވާލެވުނުއިރު، ޖަރުމަނުން ލީޑު ނަގާފައިވަނީ ދެވަނަ ހާފު ފަށައިގެން ހަތަރުވަނަ މިނެޓުގައެވެ. މި ލަނޑު އެ ގައުމަށް ކާމިޔާބުކޮށްދިނީ ލޫކަސް އެންމެޗާއެވެ.

ޕޯޗުގަލް ބަލިކޮސް ޖަރުމަނުން 21 އަހަރުން ދަށުގެ ޔޫރޯ ކާމިޔާބުކުރިއިރު، މިއީ އެ ގައުމުން މި މުބާރާތް ކާމިޔާބުކުރި ތިންވަނަ ފަހަރެވެ. އެގޮތުން މީގެ ކުރިން 2009 އަދި 2017 ވަނަ އަހަރު ޖަރުމަނުން ވަނީ ޗެމްޕިއަންކަން ހޯދާފައެވެ. އަދި ޕޯޗުގަލަށް އަދި މިހާތަނަށް މި މުބާރާތް ކާމިޔާބުކުރެވިފައި ނުވާއިރު، އެ ގައުމުން ވަނީ މި މުބާރާތުގެ ފައިނަލުގައި މިހާތަނަށް ތިން ފަހަރު ކުޅެފައެވެ.