ޅ. ނައިފަރުގައި އަޅާ 100 ހައުސިންގ ޔުނިޓްގެ މަސައްކަތް މި އަހަރު ފަހުކޮޅު ނިންމުމަށް އަމާޒުހިފައިފިއެވެ.

ރަޝީދު ކާޕެންޓްރީއާ ހަވާލުކުރި މި މަސައްކަތް ނިންމުމަށް ކަނޑައަޅާފައި އޮތީ 330 ދުވަހެވެ. އެހެން ނަމަވެސް އެ މުއްދަތަށް މަސައްކަތް ނުނިމުމުން އެ ތާރީޚު ފަހުން މާރޗް 31ށް އިތުރު ކޮށްފައިވެއެވެ. ހައުސިންގ މިނިސްޓްރީގެ އޮފިޝަލަކު ބުނީ މަސައްކަތް ޑިސެމްބަރު މަހަށް ނިމޭނެ ކަމަށެވެ.

މިހާރު ކުރިއަށްދަނީ ސީލިންގެ މަސައްކަތާއި، ދޮރުތައް ހަރުުކުރުމުގެ މަސައްކަތެވެ. ސޮކެޓްތައް ހަރުކުރުމާއި، ފާޚާނާތަކުގެ މަސައްކަތްތައް ވެސް ކުރިއަށްދާކަމަށް ޕްރޮޖެކްޓްގެ އެންމެ ފަހުގެ އަފްޑޭޓްތަކުން ދައްކައެވެ.

މިއީ 1000 އަކަފޫޓުގެ 3 ކޮޓަރީގެ އެޕާރޓްމެންޓްތަކެވެ.

ނައިފަރުގެ ހައުސިން ޔުނިޓްތަކުގެ މަސައްކަތް ކުރިން ހަވާލުކޮށްފައި އޮތީ، ޑަބްލިއު އެންޑް އޭ އޯވަރސީސް ޕްރައިވެޓް ލިމިޓެޑް ކިޔާ ކުންފުންޏަކާއެވެ. އޭޖީގެ ލަފައާއެކު އެކުންފުންޏާއެކު ވެފައިވާ އެއްބަސްވުން 2019 ވަނަ އަހަރުގެ އޮގަސްޓް މަހު ބާތިލް ކުރިއެވެ. ރަޝީދު ކާޕެންޓްރީއާ މި މަސައްކަތް ހަވާލުކޮށްފައިވަނީ 2020 ވަނަ އަހަރުގެ ޖެނުއަރީ މަހުއެވެ.

މަޝްރޫއުގެ ޖުމްލަ އަގަކީ 72.2 މިލިއަން ރުފިޔާއެވެ. މިއި ސަރުކާރުގެ ޕީއެސްއައިޕީ ބަޖެޓުން ޚަރަދުކުރާ މަޝްރޫއެކެވެ.