ފޮޓޯތަކުގެ ސައްހަކަން ފުލުހުންނަށް ކަށަވަރު ނުވެ އެއީ އަސްލުކަމަށް ބަލާ، މަޖިލީހުގައި ބަހުސްކުރުން ޖާގަ އޮތްކަމަށް ނުދެކެން - ނަޝީދު

ސޯޝަލް މީޑިއާގައި ދައުރުވަމުންދާ ފޮޓޯތަކުގެ ސައްހަކަން ފުލުހުންނަށް ކަށަވަރު ނުވެ އެއީ އަސްލުކަމަށް ބަލާ، މަޖިލީހުގައި ބަހުސްކުރުން ޖާގަ އޮތްކަމަށް ދެކެވަޑައިނުގަންނަވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

ސޯޝަލް މީޑިއާގައި ދައުރުވަމުންދާ ފޮޓޯތަކާއި ވީޑިއޯތަކުގެ މައްސަލައިގައި ކަންބޮޑުވުން ފާޅުކުރައްވާ ނައިފަރު ދާއިރާގެ މެމްބަރު އަހުމަދު ޝިޔާމް މަޖިލީހަށް ހުށަހެޅުއްވި ކުއްލި މައްސަލަ ހުށަހެޅުމުގެ ފުރުސަތު ނުދެއްވާ ވަނީ ބޭރުކޮށްލާފައެވެ. މަޖިލީހުގެ ރިޔާސަތު ބެލެހެއްޓެވީ، ރައީސް މުހައްމަދު ނަޝީދެވެ. އެޖެންޑާ އިއުލާން ކުރައްވަމުން ރައީސް ނަޝީދު ވިދާޅުވީ 2 ކުއްލި މައްސަލައެއް ލިބިފައިވާ ކަމަށެވެ. އަދި 2 ކުއްލި މައްސަލަ ބަލައިގަތުމާއި ގުޅޭ ގޮތުން ވަރަށް ފުންކޮށް ވިސްނާވަޑައިގެންނަވާފައިވާ ކަމަށާއި، މި 2 ކުއްލި މައްސަލަ ގުޅިފައިވަނި މިހާރު ސޯޝަލް މީޑިއާގައި ދައުރުވަމުންދާ ފޮޓޯތަކާއި ކަމަށެވެ.

ރައީސް ނަޝީދު ވިދާޅުވީ މި ފޮޓޯތަކަކީ އެކިއެކި މީހުންގެ މައްޗަށް ކުރެވޭ ތުހުމަތު ޕޮލިސް އޮފީހަށް ހުށަހަޅާފައިވާ ފޮޓޯތަކެއް ކަމަށެވެ. އަދި އެ ފޮޓޯތަކުގެ ސައްހަކަން ފުލުސް އޮފީހަށް ކަށަވަރު ނުވެ އެއީ އަސްލުކަމަށް ބަލާ އެކަމާއި ގުޅޭ ގޮތުން މި މަޖިލީހުގައި ބަހުސްކުރުން ޖާގަ އޮތްކަމަށް ދެކެވަޑައިނުގަންނަވާ ކަމަށެވެ.

ނައިފަރު ދާއިރާގެ މެންބަރު އަހުމަދު ޝިޔާމް ހުށަހެޅުއްވި ކުއްލި މައްސަލައިގައި ބުނެފައިވަނީ ދިވެހިރާއްޖެއަކީ ސައްތައިން ސައްތަ މުސްލިމު ގައުމެއްގައި ފަހަކަށް އައިސް ކަންބޮޑުވާ މިންވަރަށް ލިވާތުކުރުމާއި ގިނަބަޔަކު ބައިވެރިވެގެން ޖިންސީގުޅުން ހިންގުންފަދަ ފާހިޝް އަމަލުތައް ގިނަވެ، މިފަދަ އަމަލުތައް ކުރަމުންދާކަން ފޮޓޯތަކުންނައި ވީޑިއޯތަކުން ފެންނަމުންދާ ކަމަށެވެ.

މިފަދަ ކުށްތަކަކީ އިސްލާމްދީނުގައި ކަނޑައެޅިގެން ހަރާމްކުރައްވާފައިވާ ބޮޑެތި ކުށްތައް ކަމަށްވާތީއާއި މިއީ ދިވެހިރާއްޖޭގެ ގާނޫނު އަސާސީއާއި ހިލާފު ކަމަކަށްވާތީއާއި އަދި އިސްލާމީ ޝަރީއަތާއި ހިލާފު، އިސްލާމީ މުޖްތަމައުއެއްގައި ހާއްސަކޮށް ރާއްޖެފަދަ ސައްތައިން ސައްތަ އިސްލާމީ ގައުމެއްގައި ކުރެވިގެން ވާނެ ކަމަކަށް ނުވާތީއާއި، އެއްޖިންސުން ގުޅުން ހިންގުމަކީ ގާނޫނުލްއުގޫބާތުގެ 411 ވަނަ މާއްދާގެ (ހ) ގެ 2 ގައި ކަނޑައެޅިގެން ކުށެއްގެ ގޮތުގައި ކަނޑައެޅިފައިވާ ކަމެއް ކަމަށެވެ.

އިސްލާމްދީނުގައި ކަނޑައެޅިގެން ހަރާމްކުރައްވާފައިވާ މިފަދަ ފާހިޝް ކަންތައްތައް އިތުރުވެ، މުޖްތަމައުގައި ޝިރުކު ފެތުރިގެން ދިއުމަކީ ސައްތައިން ސައްތަ މި އިސްލާމީ ގައުމުގެ ރައްޔިތުން އިންތިހާއަށް ކަންބޮޑުވާކަމެއް ކަމަށެވެ. އަދި މިފަދަ ކަންކަން އާންމުވުމުގެ ސަބަބުން މުޖްތަމައުގެ އިޖްތިމާއީ ފޭރާން ވީދި، އަހުލާގިއްޔަތު ނެތިގެންގޮސް މި ދިވެހި ގައުމުގެ މުސްތަގުބަލު ހަލާކުވެ ނެތިގެން ހިނގައިދާނެ ކަމަށެވެ.

ވަކި ފަރާތަކަށް ބެލުމެއް ނެތި މިފަދަ ވިޔާނުދާ ހަޑިމުޑުދާރު އަމަލުތައް ހިންގާ ފަރާތްތަކާމެދު އިސްލާމީ ޝަރީއަތާއި ދިވެހިރާއްޖޭގެ ގާނޫނުތަކުގައިވާގޮތުގެ މަތިން އަދަބު ދިނުމަށާއި، މިއީ ނުރައްކާތެރި ކަމެއްގެ ގޮތުގައި ދެކި މިފަދަ މުންކަރާތްތައް ހުއްޓުވުމަށް ވަގުތުން ފިޔަވަޅު އެޅުމަށް ސަރުކާރަށް ގޮވާލާ ކަމަށް މި ކުއްލި މައްސަލައިގައި ބުނެފައިވެއެވެ.

ކުއްލި މައްސަލަ ބަލައިނުގަތުމަށް ނިންމާ މަޖިލީހުގެ މަސައްކަތާއެކު ކުރިއަށް ވަޑައިގެންނެވުމަށް ރިޔާސަތުން މައްސައްކަތް ފެށުމާއެކު މެންބަރު ޝިޔާމް ވަނީ ތަޅުމުގައި އަޑުގަދަކުރައްވާ އެ މައްސަލަ ބެލެންޖެހޭނެކަމަށް ވިދާޅުވެފައެވެ. އަދި ނައިފަރު ދާއިރާގެ މެންބަރު، މިނިސްޓަރ އޮފް ނެޝަނަލް ޕްލޭނިންގް ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމާއި ކުރައްވާ ސުވާލު ވެސް ކުރައްވަން ބޭނުން ނުވާކަމެއް ވިދާޅުވެ ސުވާލު ވެސް ނުކުރައްވައެވެ.