ނައިފަރުގެ ފެނާއި ނަރުދަމާ ނިޒާމުގެ މަސައްކަތް މިމަހުގެ ތެރޭގައި ނިންމުމަށް މިދަނީ މަސައްކަތް ކުރަމުން: ޝާހު
ކުރީ ސަރުކާރުން އެމަޝްރޫއު ކުރިއަށް ގެންގޮސްފައިވާ ގޮތުން ވެސް ވަރަށް ގިނަ ތަކުލީފުތައް އުފުލަން ޖެހުނު
ޅ.ނައިފަރު
ޅ. ނައިފަރުގެ ފެނާއި ނަރުދަމާ ނިޒާމުގެ މަސައްކަތް މިމަހުގެ ތެރޭގައި ނިންމުމަށް މަސައްކަތް ކުރަމުންދާ ކަމަށް މޯލްޑިވްސް ވޯޓަރ އެންޑް ސެވެރޭޖް ކޮމްޕެނީ (އެމްޑަބްލިއުއެސްސީ) ގެ މެނޭޖިންގ ޑިރެކްޓަރު ހަސަން ޝާހު ވިދާޅުވެއްޖެއެވެ.
ނައިފަރުގައި ގާއިމްކުރެވޭ ފެނާއި ނަރުދަމާ ނިޒާމާއި ގުޅޭ ގޮތުން ރާއްޖެޓީވީގައި ވާހަދައްކަވަމުން ޝާހު ވިދާޅުވީ ނައިފަރުގައި ފެނާއި ނަރުދަމާ ނިޒާމު ގާއިމް ކުރުމަށް ގިނަ ގޮންޖެހުންތަކާއި ކުރިމަތިލާން ޖެހޭ ކަމަށާއި، ކުރީ ސަރުކާރުން އެމަޝްރޫއު ކުރިއަށް ގެންގޮސްފައިވާ ގޮތުން ވެސް ވަރަށް ގިނަ ތަކުލީފުތައް އުފުލަން ޖެހުނު ކަމަށެވެ. ނަމަވެސް މަސައްކަތް ކުރަމުންދަނީ މި މާޗް މަހުގެ ތެރޭގައި މަސައްކަތް ނިންމުމަށް ކަމަށް ޝާހު ވިދާޅުވިއެވެ.
ޝާހު ވިދާޅުވީ މި މަޝްރޫއު ނިންމުމަށް މާބޮޑަށް ލަސްވެފައިވާކަން ގަބޫލުކުރައްވާ ކަމަށެވެ. ނަމަވެސް ލަސްވުމުގައި ވެސް ގިނަ ސަބަބުތަކެއްވާކަން ޝާހު ފާހަގަކުރެއްވިއެވެ. އެގޮތުން ކައުންސިލާއި ބައެއް ގޭބިސީތަކާއި ހިޔާލު ތަފާތުވުމާއި، ޓެސްޓިންގގެ މަރުހަލާ ކުރިއަށްދާއިރު ލީކްވުމުގެ ގިނަ މައްސަލަތައް ފާހަގާވާކަމަށް ޝާހު ވިދާޅުވިއެވެ.
ޝާހު ވިދާޅުވީ، ނައިފަރުގެ މަގުތައް ހަނިވެފައި، ބައިވަރު ހޮޅިތަކާއި ކޭބަލްތައް މަގުތަކުގައި އޮންނަ ކަމަށެވެ. އެހެންވުމުން، މަގު ކޮނުމުގައި ބައެއް ފަހަރު ދަތިވާކަމަށެވެ. މިހެން ދިމާވުމުން، މަގު ކޮނުމުގެ ފަކީރާ ނުވަތަ އުދެލި ބޭނުން ނުކުރެވޭ ފަހަރުވެސް އަންނަ ކަމަށާއި، އަތުން މަގު ކޮންނަން ޖެހޭ ފަހަރުވެސް އަންނަ ކަމަށެވެ. މި މަސައްކަތަށް 19 މީހުން އެސައިންކޮށް ދެ ޓީމަކަށް ބަހައިގެން މަސައްކަތްކުރާއިރުވެސް، ދުވާލަކު ދެ މީޓަރުވެސް ނޭޅޭ ކަމަށް ޝާހު ވިދާޅުވިއެވެ.
ޝާހު ވިދާޅުވީ، ނައިފަރު ފެނާއި ނަރުދަމާގެ މަސައްކަތް މީގެ ކުރިން އިންޑިއާ ކުންފުންޏަކުން ކޮށްފައިވާކަމަށެވެ. އެކުންފުނިން މި މަސައްކަތްކޮށްފައިވަނީ ބޮޑެތި މަގުތަކުގައި އެކަނިކަމަށް ލިޔެކިޔުންތަކުން ފެންނަން އެބައޮތް ކަމަށާއި، އަދި އުނދަގޫ މަގުތައް ދޫކޮށްލާފައިވާކަމަށެވެ. ނަމަވެސް، އެކުންފުނިން މި ނެޓްވޯކް އަޅައި، މަސައްކަތް ނިންމިކަމަށް ސޮއިކޮށްފައިވާ މަގުތަކަށް ބަލާއިރު، އެ މަސައްކަތް އެގޮތަށް ނުކުރެވި ހުރިކަން ފާހަގަކުރެވިފައިވާކަމަށް ޝާހު ވިދާޅުވިއެވެ.
ނައިފަރުގެ ފެނާއި ނަރުދަމާގެ ނިޒާމް ގާއިމްކުރުމުގެ މަޝްރޫއުގެ ދަށުން އެމްޑަބްލިއުއެސްސީ އާއި ހަވާލުކޮށްފައިވަނީ ފެންހޮޅީގެ މައި ނެޓްވޯކްގެ ނުނިމިހުރި 3 ކިލޯ މީޓަރުގެ ފެންހޮޅި އެޅުމާއި އާރްއޯ ޕްލާންޓްގެ އިލެކްޓްރޯ މެކޭނިކަލްގެ މަސައްކަތާއި އާރްއޯ ޕްލާންޓް ބަހައްޓާ އިމާރާތުގެ ނުނިމި ހުރި މަސައްކަތް ކުރުމަށެވެ. މީގެ އިތުރުން ފެން ރައްކާކުރުމަށް ބަހައްޓާފައިވާ ތާނގީތަކުގެ ނުނިމިހުރި މަސައްކަތްތަކާއި، ބޯހޯލް އަދި ރިޖެކްޓް ލައިންގެ މަސައްކަތް އެމްޑަބްލިއުއެސްސީ އާއި ހަވާލުކޮށްފައިވާއިރު، މިމަޝްރޫއުގެ ދަށުން އެރަށުގެ ގޭގޭގައި ފެން މީޓަރު ބަހައްޓައި ފެނުގެ ކަނެކްޝަން ގުޅައިދީ، ގެތަކަށް ރައްކާތެރި ފެން ފޯރުކޮށްދިނުމުގެ މަސައްކަތް އެމްޑަބްލިއުއެސްސީން ދަނީ ކުރަމުންނެވެ.
ނައިފަރުގެ ފެނާއި ނަރުދަމާގެ މަޝްރޫއުގެ ނުނިމި ހުރި މަސައްކަތްތައް ނިންމުމަށް ސަރުކާރުން އެމްޑަބްލިއުއެސްސީ އާއި ހަވާލުކޮށްފައިވަނީ 2020 ވަނަ އަހަރުގެ އޮކްޓޯބަރު މަހުގެ 26 ވަނަ ދުވަހުއެވެ.
