ނައިފަރު ފެނާ ނަރުދަމާގެ ހިދުމަތް ލިބުމުގައްޔާއި ބޭނުންކުރުމުގައި ހުރި ދަތިތައް ހައްލުކުރުމަށް ގޮވާލާ މަޖިލީހަށް ގަރާރެއް ހުށަހަޅައިފި

ޅ. ނައިފަރުގައި ޤާއިމުކޮށްފައިވާ ފެނާއި ނަރުދަމާގެ ނިޒާމުގައިހުރި މައްސަލަތައް ޙައްލުކޮށްދިނުމަށް ސަރުކާރަށް ގޮވާލައި ރައްޔިތުންގެ މަޖިލީހަށް ގަރާރެއް ހުށަހަޅައިފިއެވެ.

ނައިފަރުގައި ޤާއިމުކޮށްފައިވާ ފެނާއި ނަރުދަމާގެ ނިޒާމުގައިހުރި މައްސަލަތައް ޙައްލުކޮށްދިނުމަށް ސަރުކާރަށް ގޮވާލާ ގަރާރެއް ހުށަހެޅުއްވީ ނައިފަރު ދާއިރާގެ މެންބަރު އަޙްމަދު ޝިޔާމްއެވެ.

މެންބަރު ޝިޔާމް ހުށަހަޅުއްވާފައިވާ ގަރާރުގައި ބުނެފައިވަނީ ނައިފަރުގެ ފެނާއި ނަރުދަމާ ގާއިމްކުރުމުގެ މަސައްކަތުގެ 85 އިންސައްތަ މަސައްކަތް ނިމިފައިވަނިކޮށް އެ މަސައްކަތް ކުރުމަށް ހަވާލުކޮށްފައިވާ އެލްއީ ޓްރިވެނީ ޖޭނީ އާއެކު ވެފައިވާ އެއްބަސްވުން 23 ޖެނުއަރީ 2020 ގައި ސަރުކާރުން އުވާލުމާއި ގުޅިގެން މަޝްރޫއުގެ މަސައްކަތް ހުއްޓި ކަނޑައެޅިފައިވާ މުއްދަތަށްވުރެ އެތައް ދުވަހެއް ދިގުލައިގެން ގޮސް، އޭގެ އެތައް ދުވަހެއް ފަހުން އެމްޑަބްލިއުއެސްސީއާއި ހަވާލުކޮށްގެން މި މަޝްރޫއުގެ މަސައްކަތް ކުރިއަށް ގެންގޮސް ހިދުމަތްދޭން ފެށި ކަމަށެވެ.

އަދި މި މަޝްރޫއުގެ މަސައްކަތް ފުރިހަމަ ނުކޮށް ނިޒާމް އޮޕަރޭޓް ކުރުމަށް ފެނަކައާއި ހަވާލުކުރުމުގެ ސަބަބުން ރައްޔިތުންނަށް ހިދުމަތްދިނުމަށް ދަތިތައް ކުރިމަތިވެ، ރައްޔިތުންނަށް ހިދުމަތުގެ ފުރިހަމަ ބޭނުން ނުހިފޭތީއާއި، 6000ށް ވުރެ ގިނަ މީހުންގެ އާބާދީއަކަށް ފުރިހަމަ ނުވާ ނިޒާމަކުން ހިދުމަތް ދިނުމަށް ހުރި ދަތިތަކާއި ގުޅޭގޮތުން ފެނަކައިން ތައްޔާރުކޮށްފައިވާ ރިޕޯޓެއްގައި ފާހަގަކޮށްފައިވާ ކަމަށެވެ.

އަދި އެގޮތުން އާރްއޯ ޕްލާންޓުން ދޫކުރާ ފެނުގައި ކުލައާއި ވަސް ހުންނާތީ މި ފެނަކީ ރާއްޖޭތެރި ފެނަށް ނުވުމާއި، ސިއްހީގޮތުން ވެސް މައްސަލަތަލެއް ކުރިމަތިވުމުގެ ފުރުސަތު ބޮޑުކަމުންނާއި، އާރްއޯ ޕްލާންޓް އޮޕަރޭޓް ކުރުމަށް ބޭނުންވާ ޓެކްނިކަލް ކަންކަން ފުރިހަމަވެފައި ނެތުމާއި، އަދި އެ ޕްލާންޓުގެ މެއިންޓަނަންސަށް ބޭނުންވާ ވަސީލަތްތައް ލިބެން ނެތުމުގެ ސަބަބުން ހިދުމަތް ދިނުމުގައި ދަތިތަކެއް ކުރިމަތިވެފައިވާ ކަމަށެވެ.

މީގެ އިތުރުން ފެންޕްލާންޓުން ފެންލީކުވެ ދަބަރުޖަހާފައިވުމާއި، ޕްލާންޓުން ފެން ދޫކުރުމަށް ގާއިމްކުރެވިފައިވާ ޕަމްޕް ސްޓޭޝަން ސަރވިސް ނުކުރެވި، އަދި ކްލޮރިން ހުސްވުންފަދަ އެތައް މައްސަލަތަކެއް ހުރުމުންނާއި، ފެން ގުޅާ ދިނުމަށް އެދިފައިވާ ގޭބީސީތަކަށް ފެންގުޅާ ދިނުމަށް ބެނުންވާ މެޓީރިއަލްސް ނެތްކަމަށް ގަރާރުގައި ބުނެފައިވެއެވެ.

އަދި ނަރުދަމާ ނިޒާމުގެ ނެޓްވޯކް ނޭޅޭ ސަރަހައްދުތައް ހުރުމާއި، މަގުމައްޗަށް ނަޖިސް ބޭރުވެ ވަސްދުވާ، ބަލިމަޑުކަމެއް އުފެދިދާނެ ކަމުގެ ބޮރު އޮތުމާއި، ނަރުދަމާ ބައެއް ސްޓާޓިން ލައިން ގޭބީސީތަކުގެ ލައިނަށްވުރެ ތިލަވުމުގެ ސަބަބުން ގޭބިސީގެ ކަނެޝަން ނުހެދުމާއި، ޕްރޮޖެކްޓުގައި ނަރުދަމާ ގުޅާދިނުމަށް އެދިފައިވާ ހިދުމަތް ނުދީހުރި ގޭބީސަތަކަށް ކަނެޝަން ދިނުމަށް ބޭނުންވާ މެޓީިއަލަސް ކޮންޓްރެކްޓަރ ފޯރުކޯށްދީފައިނުވާތީ އާއި، ނަރުދަމާ ނުގުޅި ހުރީ ކިތައް ގެއެއްކަން ލިޔެކިޔުމުން ވެސް ސާފު ނުވާ ކަމަށެވެ.

އަދި ސިޔާސީ މަގްސަދެއް ހާސިލްކުރުމަށްޓަކައި އެމްޑީޕީގެ ރިޔާސީ އިންތިހާބުގެ ޕްރައިމަރީއާއި ދިމާކޮށް މިމަސައްކަތް ނިންމާ އޮޕަރޭޓަރާ ހަވާލުކުރި އިރު، މި މަޝްރޫއު ފުރިހަމަ ނުވާތީއާއި ފެނާ ނަރުދަމާ ނޭޅި އެތައް ގެއެއް ހުރުމާއެކު، ރައްޔިތުންނަށް ފެނާ ނަރުދަމާގެ ހިދުމަތް ދިނުމުގައި ކުރިމަތިވާ ދަތިތައް ވީހާ އަވަހަކަށް ހައްލުކޮށްދިނުމަށް ސަރުކާރަށް ގޮވާލާ ގަރާރު ހުށަހަޅާފައިވެއެވެ.