ބާސެލޯނާގެ ޓްރެއިނިންގް ދަނޑުގައި އެކުލަބުގެ އެސިސްޓަންޓް ކޯޗު ހުއާން ކާލޯސް އުންޒުއީ އާއި ނޭމާ އާ ދެމެދު ހިނގި ދެބަސްވުމެއްގައި ނޭމާ ކުލަބު ދޫކޮށްލާނެ ކަމުގެ އިންޒާރު ދީފިއެވެ.
ބޭރުގެ ކުޅިވަރު ހަބަރު ފަތުރާ ވެބްސައިޓެށް ކަމަށްވާ "ގޯލް ޑޮޓް ކޮމް" އިން ރިޕޯޓް ކޮއްފައިވާ ގޮތުން، އުންޒުއީ އާއި ނޭމާ އާ ދެބަސްވެފައިވަނީ، ފަރިތަކުރުންތަށް ކުރިއަށްދިޔަ ވަގުތުގައި ނޭމާ ގާތު އުންޒުއީ ދެއްކި ވާހަކަތަކެއްގެ ސަބަބުންނެވެ.
ފަރިތަކުރުންތަކުގައި އިރުޝާދު ދެމުން އުންޒުއީ ނޭމާ ގާތުގައި ބުނެފައިވަނީ، ރޮނާލްޑީނިއޯ ފަދަ މޮޅެތި ކުޅުންތެރިން، އެ ކުޅުންތެރިންގެ ފުޓުބޯޅަ ހަޔާތުގެ ފަހު ދުވަސްކޮޅުގައި، ކުރަން ޖެހޭވަރަށް މަސައްކަތް ކުރެވިފައި ނުވުމުން ނާކާމިޔާބީއާއި ކުރިމަތިލާން ޖެހިފައި ވާކަމަށެވެ.
އެހިސާބުން ނޭމާ އާއި އުންޒުއީ އާއި ދެމެދު ޒުވާބެއް ހިނގައި ނޭމާ ވަނީ އުންޒުއީ ކުލަބުގައި މަޑުކުރާނަމަ އޭނާ މަޑު ނުކުރާނެ ކަމަށް ބުނެ އިންޒާރެއް ދީފައެވެ.
ބާސާގެ ކޯޗު ލުއިސް އެންރީކޭ މަގާމުން ވަކިވުމާއި އެކު، ދެން އެމަގާމާ ހަވާލުވާނީ އުންޒުއީ ކަމަށް ގިނަ ފަރާތްތަކަކުން އަންނަނީ ބުނަމުންނެވެ. ނަމަވެސް އުންޒުއީ ކޯޗުކަމާ ހަވާލު ވެއްޖެނަމަ ނޭމާ ކުލަބުގައި މަޑު ނުކުރާނެ ކަމަށް ނޭމާ މިވަނީ އިންޒާއުދީފައެވެ.
ނޭމާގެ އިތުރުން ބާސާގެ ގިނަ ކުޅުންތެރިންވެސް އުންޒުއީ ކޯޗުކަމުގެ މަގާމަށް ގެނައުމާއި މެދު ހިންހަމަ ނުޖެހޭ ކަމަށް ބައެށް މީޑިއާތަކުން އަންނަނީ ރިޕޯޓް ކުރަމުންނެވެ.
ބާސެލޯނަގެ އެތެރޭގެ މައްސަލަ ތަކެއްގެ ވާހަކަތައް ފެންމަތިވަމުން އަންނަ މި ދަނޑިވަޅަކީ ބޮޑެތި އެހެން ކުލަބުތަކުން ބާސާގެ ކީ ޕްލެއަރުންނަށް ލޯ އަޅަމުން އަންނަ ދުވަސްކޮޅެކެވެ. ދާދި ފަހުން މެސީވެސް ކުލަބުގައި މަޑު ކުރުމަށް ދެކޮޅު ހަދާފައި ވާކަމަށްބުނާ ވާހަކަތަކެށް ވަނީ ފެތުރިފައެވެ.
