މި ސީޒަނަކީ  ބާސެލޯނާއާއެކު ހޭދަކުރި އެންމެ ކާމިޔާބު ސީޒަން ކަމަށް ބްރެޒިލްގެ ކެޕްޓަން ނޭމާ ބުނެފި އެވެ.

އާދީއްތަ ދުވަހުގެ ރޭ ލަސްޕާމަސް އަތުން ބާސާ 1-4 ގެ ނަތީޖާއަކުން މޮޅުވި މެޗަށްފަހު ވާހަކަ ދައްކަމުން ނޭމާ ބުނީ މިއީ އޭނާގެ ކެރިއަރުގައިވެސް ފާހަގަކޮށްލެވޭ ސީޒަނެއް ކަމަށާއި، އަދި މިއީ އޭނާ ބާސާއާއެކު ހޭދަކުރި އެންމެ ކާމިޔާބު ސީޒަންކަމަށްވެސް ދެކޭ ކަމަށެވެ.

ނޭމާ ބުނީ އިތުރު ލެވެލްއަކަށް އޭނާ އަށް ދެވުނު ކަމެއް ނޭގޭ ކަމަށާއި، އެހެންނަމަވެސް މީހުން ތަފާތު ގޮތްގޮތަށް އޭނާއާ މެދު ދެކޭކަންވެސް އެގޭ ކަމަށެވެ. އެގޮތުން ނޭމާ ބުނީ ދަނޑުމަތީގައި ހުންނައިރު އެކަހަލަ ވާހަކަތައް އަޑުއިވުމުން އުދަގޫވެސް ވާ ކަމަށެވެ.

މީގެއިތުރުން ނޭމާ ބުނީ ދުނިޔޭގެ އެންމެ މޮޅު ކުޅުންތެރިޔާގެ މަގާމު ހޯދުމަކީ އަބަދުވެސް ދެކެމުން އަންނަ ހުވަފެނެއް ކަމަށާއި، އަދިވެސް އެ ހުވަފެން ދެކެމުން އަންނަ ކަމަށް އޭނާ ވަނީ ބުނެފައެވެ. އެގޮތުން ކޮންމެވެސް އެއް ދުވަހަކުން ބެލޮންޑިއޯ ހޯދޭނެކަމަށްވެސް ނޭމާ ވަނީ ބުނެފައެވެ.

ބްރެޒިލްގައި ކާމިޔާބު ދުވަސްތަކެއް ހޭދަކުރުމަށް ފަހު ނޭމާ ބާސާ އަށް ބަދަލުވީ 2013 ވަނަ އަހަރެވެ. އެގޮތުން އޭނާ ވަނީ މިވީތަނަށް އެޓީމަށް ކުޅުނު 184 މެޗުގައި 104 ލަނޑު ކާމިޔާބުކޮށް އެޓީމާއެކު ސްޕެނިޝް ލީގު ދެފަހަރު، ކޮޕާ ޑެލްރޭ ދެފަހަރު، ސްޕެނިޝް ސުޕާކަޕް، ޔުއެފާ ޗެމްޕިއަންސް ލީގު އަދި ފީފާ ކްލަބް ވޯލްޑް ކަޕް ވެސް ކާމިޔާބުކޮށްފައެވެ.

ބްރެޒިލް ގައުމީ ޓީމާއެކު އޮލިމްޕިކްސް ރަން މެޑަލް މިދިޔަ އަހަރު ކާމިޔާބުކުރި ނޭމާ ވަނީ ގައުމީ ޓީމަށް ކުޅުނު 77 މެޗުގައި 52 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ ފީފާ ކޮންފެޑެރޭޝަންސް ކަޕް 2013 ވަނަ އަހަރު އަދި ސައުތް އެމެރިކަން ޔޫތް ޗެމްޕިއަންޝިޕް 2011 ވަނަ އަހަރު ބްރެޒިލްއާއެކު ކާމިޔާބުކޮށްފައެވެ.