ބެރިއެއްގެ ދަށުވެ ސީރިއަސް ޒަހަމްތަކެއް ލިބުނު ކުއްޖަކަށް އައިޖީއެމްއެޗްގައި ފަރުވާ ދެނީ
31 މެއި 2021 | ހޯމަ 07:14އަނިޔާ ލިބުނީ އުމުރުން 14 އަހަރުގެ ފިރިހެން ކުއްޖަކަށް
އައިޖީއެމްއެޗް،
ބެރިއެއްގެ ދަށުވެ ސީރިއަސް ޒަހަމްތަކެއް ލިބުނު ކުއްޖަކަށް އައިޖީއެމްއެޗްގައި ފަރުވާ ދޭން ފަށައިފިއެވެ.
ރާއްޖެއެމްވީއަށް މަޢުލޫމާތު ދެމުން އައިޖީއެމްއެޗްގެ މީޑިއާ އޮފިޝަލް ވިދާޅުވީ އާދިއްތަ ދުވަހުގެ ރޭ މެންދަމުގެ ވަގުތެއްގައި އުމުރުން 14 އަހަރުގެ ފިރިހެން ކުއްޖެއް އައިޖީއެމްއެޗްއަށް ގެނެސްފައިވާ ކަމަށެވެ. އަދި ލިބުނު ޒަހަމްތަކަށް ފަރުވާ ދެމުންދާ ކަމަށް އޮފިޝަލް ވިދާޅުވިއެވެ. އޮފިޝަލް ވިދާޅުވީ މިވަގުތު ފަރުވާ ދެމުންދަނީ ކުޑަކުދިންގެ ވޯޑުގައި ކަމަށެވެ.
އައިޖީއެމްއެޗްގައި ފަރުވާ ދެމުންދާއިރު، ފުރަތަމަ ފަރުވާ ދީފައިވަނީ ލ. ގަން ރީޖަނަލް ހޮސްޕިޓަލްގައެވެ. މިކުއްޖާއަށް ލިބިފައިވާ އަނިޔާތަކުގެ ތަފްސީލެއް ހާމައެއް ނުކުރެއެވެ.
ލ. ފޮނަދޫގައި ގެއަކުން މަގުމައްޗަށް ވެއްޓުނު ބެރިއެއްގެ ދަށުވެ ކުއްޖަކު ޒަހަމްވީ އާދިއްތަ ދުވަހުގެ ހަވީރުގެ ވަގުތެއްގައެވެ. އެކުއްޖާގެ ގައިމައްޗަށް ވެއްޓިފައިވަނީ ގަރާޖެއް ގޮތަށް ހަދާފައި ހުރިތަނެއްގެ މަތީގައި އަޅާފައި އޮތް ބެރިއެކެވެ.
