ޗައިނާއަށް ނުދެވޭތީ ކޮލިފައިން މެޗުތައް ދުބާއީގައި

ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނުގައި ރާއްޖެ ހިމެނޭ ގްރޫޕް އޭގެ ފަހު މެޗުތައް ޗައިނާގައި ކުޅެވޭ ގޮތް ނުވުމުން، އެ މެޗުތައް ދުބާއީއަށް ބަދަލުކޮށްފައިވާ ކަމަށް ޗައިނާ ފުޓްބޯލް އެސޯސިއޭޝަން (ސީއެފްއޭ) އިން އަންގައިފިއެވެ.

މީގެ ކުރިން އޭއެފްސީން ވަނީ ގްރޫޕް އޭގެ ބާކީ ހުރި މެޗުތައް އާދީއްތަ ދުވަހުން ފެށިގެން އަންނަ ޖޫން މަހުގެ 15 ވަނަ ދުވަހުގެ ނިޔަލަށް ޗައިނާގައި ކުޅެން ވަނީ ތާވަލުކޮށްފައެވެ. އެހެންކަމުން 25 ކުޅުންތެރިންގެ ފައިނަލް ސްކޮޑެއް އެކުލަވާލައި، ގައުމީ ޓީމުން އައީ އެ މެޗުތަކަށް ތައްޔާރުވުމަށް ދުބާއީގައި ތަމްރީނުތައް ހަދަމުންނެވެ.

ރާއްޖޭގެ ގައުމީ ފުޓްބޯޅަ ޓީމުން އާދީއްތަ ހެނދުނު ސީރިއާއާއެކު ޗައިނާއަށް ދާން އޮތް ނަމަވެސް، ގައުމީ ޓީމުން އެންމެ ފަހުން ކުރި ކޮވިޑް-19 ގެ ޓެސްޓްތަކުން ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އާއި ޒުވާން ޑިފެންޑަރު އަލީ ޝާމިސް (ތޮއްޕޭ) ޕޮޒިޓިވްވެފައިވާތީ، ގައުމީ ޓީމު ވަނީ ދުބާއީގައި މަޑުކޮށްފައެވެ. އަދި ސީރިއާ އާއި ފިލިޕީންސް ޓީމަށްވެސް ވަނީ ޗައިނާއަށް ދެވޭގޮތް ނުވެފައެވެ. އެގޮތުން ފިލިޕީންސް ޓީމު މި ވަގުތު ތިބީ ގަތަރުގައެވެ.

މީގެ އިތުރުން ޗައިނާއާ ދެކޮޅަށް އާދީއްތަ ދުވަހު އެ ގައުމުގައި ކޮލިފައިން މެޗަށް ނުކުތް ގުއާމުގެ ބައެއް ކުޅުންތެރިންވެސް ކޮވިޑުުގެ ސަބަބުން ޓީމާ ގުޅިފައެއް ނުވެއެވެ. އަމިއްލަ ގައުމުގައި ކުޅުނު އެ މެޗުން ޗައިނާ ވަނީ 7-0 ގެ ނަތީޖާއަކުން މޮޅުވެފައެވެ.

ކޮލިފައިންގެ ބާކީ ހުރި މެޗުތައް ޗައިނާގައި ކުޅެވޭ ގޮތް ނުވީ ރާއްޖޭގެ އިތުރުން ފިލިޕީންސާއި ސީރިއާ ޓީމަށްވެސް ޗައިނާއަށް ދެވެން ނެތް ކަަމަށް އެ ގައުމުގެ ސަރުކާރުން ނިންމުމާ ގުޅިގެންނެވެ. އެއާއެކު މެޗުތަކާ ގުޅޭގޮތުން ޗައިނާ ފުޓްބޯލް އެސޯސިއޭޝަނުން އެ ގައުމުގެ ސަރުކާރާ މަޝްވަރާކުރިއިރު، މެޗުތައް ޗައިނާގައި ކުޅެވޭ ގޮތް ނުވުމުން، ކޮލިފައިންގައި ބާކީ އޮތް ހަތް މެޗު ދުބާއީއަށް ބަދަލުކުރަން ނިންމާފައިވާކަން ޗައިނާ ފުޓްބޯލް އެސޯސިއޭޝަނުން ވަނީ އަންގާފައެވެ. އެކަމަކު އޭއެފްސީން އަދި މިހާތަނަށް އެކަން ރަސްމީކޮށް އިއުލާން ކޮށްފައެއް ނުވެއެވެ.

ކޮލިފައިން މެޗުތައް ދުބާއީއަށް ބަދަލުކުރުމާއެކު، މީގެ ކުރިން ތާވަލުކޮށްފައި ހުރި މެޗުތައް ފަސްވާނެ ކަމަށް ބެލެވެއެވެ. އެކަމަކު އޭއެފްސީގެ އަމާޒަކީ ޖޫން މަހުގެ 15 ވަނަ ދުވަހުގެ ކުރިން ކޮލިފައިން މެޗުތައް އެއްކޮށް ނިންމާލުން ކަމަށް ރިޕޯޓުތައް ބުނެއެވެ. ކޮލިފައިންގައި ބާކީ ހުރި މެޗުތައް ދުބާއީއަށް ބަދަލުކުރާއިރު، ރާއްޖެއަށް ބާކީ ތިން މެޗު އެބައޮތެވެ. އެއީ ޗައިނާ އާއި، ސީރިއާ އަދި ފިލިޕީންސާ ދެކޮޅަށް ކުޅެން އޮތް މެޗުތަކެވެ. މީގެ ތެރެއިން ސީރިއާ މެޗަކީ ރާއްޖޭގެ ހޯމް މެޗެކެވެ.

އޭޝިއަން ކަޕަށް ކޮލިފައިވުމަށް ރާއްޖެއިން އަމާޒުހިފާފައިވާއިރު، ކޮލިފައިންގައި ރާއްޖެ އޮތީ ހަތަރު މެޗުން ހަ ޕޮއިންޓާއެކު ގްރޫޕުގެ ހަތަރުވަނައިގައެވެ. ގްރޫޕުގެ އެއްވަނައިގައި އޮތީ ފަސް މެޗުން 15 ޕޮއިންޓާއެކު ސީރިއާއެވެ. ފަސް މެޗުން 10 ޕޮއިންޓާއެކު ދެވަނައިގައި ޗައިނާ އޮތްއިރު، ތިންވަނައިގައި އޮތީ ފަސް މެޗުން ހަތް ޕޮއިންޓް ހޯދާފައިވާ ފިލިޕީންސެވެ. އަދި ރާއްޖޭގެ ފަހަތުން ފަސްވަނައިގައި އޮތީ ފަސް މެޗު ކުޅެގެން އަދި ޕޮއިންޓެއް ލިބިފައިނުވާ ގުއާމެވެ.