އޭއެފްސީ 19 އަހަރުން ދަށުގެ މުބާރާތުގެ ކޮލިފައިންގައި ރާއްޖެ ނިސްބަތުން ފަސޭހަ ގްރޫޕެއްގައި ލައްވާލައިފި އެވެ.
އަންނަ އަހަރު އޮންނަ މި މުބާރާތުގައި ރާއްޖެ ގްރޫޕް ބީގައި ހިމެނިފައިވާއިރު، ރާއްޖެއާ އެކު ދެން ހިމެނެނީ އުޒްބަކިސްތާން، ތަޖިކިސްތާން، ބަންގްލަދޭޝް އަދި ސްރީލަންކާ އެވެ.
ގްރޫޕް ބީގައި ހިމެނޭ ސްރީލަންކާ އަދި ބަންގްލަދޭޝް އަކީ ފުޓުބޯޅައިގައި ރާއްޖެއާ ފަހަކަށް އައިސް އެހާ ވާދަވެރި ދެގައުމެއް ނޫނެވެ. އެގޮތުން ސަރަހައްދީ ރޭންކިން އަށް ބަލާއިރުވެސް މި ދެޓީމު އޮތީ ކުރިން އެންމެ ދަށްކޮށް ފެންނަ ބޫޓާނަށްވުރެވެސް ފަހަތުގައެވެ.
އެހެންނަމަވެސް ދުރު ރާސްތާ ޕްލޭނަކާ އެކު ސްރީލަންކާ އަދި ބަންގްލަދޭޝް އިންވެސް އަންނަނީ ފުޓުބޯޅަ ކުރިއެރުވުމަށް ބުރަ މަސައްކަތްކުރަމުންނެވެ. އެގޮތުން މި ދެޓީމު އަންނަނީ މަޑުމަޑުން ކުރިއަރަމުންނެނެވެ.
ގްރޫޕް ބީގައި ރާއްޖެއާއެކު ދެން ހިމެނޭ ތަޖިކިސްތާން ރާއްޖެއާ ނިސްބަތުން ރާއްޖެއަށްވުރެ މަތީފަންތީގައި އޮތް ނަމަވެސް ރާއްޖެ އިން ވަނީ އެޓީމާ ދެކޮޅަށް އެންމެ ފަހުން ކުޅުނު މެޗުތަކުގައި ރަނގަޅު ނަތީޖާތަކެއް ނެރެފައެވެ. އެހެންނަމަވެސް އުޒްބަކިސްތާން އަކީ ރާއްޖެއާ އަޅާބަލާއިރު، އެތައް ފަންތިއެއް މަތީގައި އޮތް ޓީމެކެވެ. އެގޮތުން އެޓީމު އަންނަނީ އޭޝިއާގައި ފަހަކަށް އައިސް ބޮޑެތި ކުރިއެރުންތަކެއް ހޯދަމުންނެވެ.
މި މުބާރާތުގެ ކޮލިފައިން ބުރުގެ މެޗުތައް ކުޅޭނެ ގައުމެއް އަދި ނުނިންމާއިރު، ފުރަތަމަ މެޗުގައި ރާއްޖެ ނިކުންނާނީ އަންނަ އޮކްޓޯބަރު މަހުގެ 31 ވަނަ ދުވަހު ސްރީލަންކާއާ ދެކޮޅަށެވެ.
