ބަޔާން ދޫކޮށް އަލަބާ ރެއާލަށް

ބަޔާން މިއުނިކް ދޫކޮށް އޮސްޓްރިއާގެ ޑިފެންޑަރު ޑޭވިޑް އަލަބާ ރެއާލް މެޑްރިޑާ ގުޅިއްޖެއެވެ.

މީގެ ކުރިން މިދިޔަ ފެބްރުއަރީ މަހު އުމުރުން 28 އަހަރުގެ އަލަބާ ވަނީ ބަޔާން މިއުނިކުގައި 13 އަހަރު ހޭދަކުރުމަށްފަހު، މި ސީޒަން ނިމުމުން ބަޔާން ދޫކޮށްލާނެކަން ހާމަކޮށްފައެވެ. އެ ފަހަރު ބޭއްވި ނޫސްވެރިންގެ ބައްދަލުވުމުގައި އަލަބާ ބުނީ މިހާރު އޭނާގެ އަމާޒަކީ ބަޔާން ދޫކޮށް، ކެރިއަރުގައި އައު ޗެލެންޖަކާ ކުރިމަތިލުން ކަމަށެވެ.

އެއާއެކު ހުކުރު ދުވަހުގެރޭ ރެއާލުން ވަނީ އެ ޓީމުން އަލަބާގެ ސޮއި ހޯދިކަން އިއުލާން ކޮށްފައެވެ. ހިލޭ ޓްރާންސްފާއެއްގެ ދަށުން އަލަބާ ރެއާލަށް ބަދަލުވިއިރު، އޭނާ ވަނީ ރެއާލާއެކު ފަސް އަހަރުގެ އެއްބަސްވުމެއް ހަދާފައެވެ. ރިޕޯޓުތައް ބުނާ ގޮތުން އަލަބާ ހޯދަން އިނގިރޭސި ޕްރިމިއާ ލީގުގެ އެންމެ ފަހުގެ ދެ ޗެމްޕިއަނުން ކަމަށްވާ މެންޗެސްޓާ ސިޓީ އާއި ލިވަޕޫލުން ވަނީ މަސައްކަތްކޮށްފައެވެ.

އޮސްޓްރިއާގެ ޔޫތު ޓީމުތަކުން ފާހަގަވި އަލަބާ އެންމެ ފުރަތަމަ ބަޔާނުގެ ޔޫތު ޓީމާ ގުޅުނީ 2008 ވަނަ އަހަރުއެވެ. އަދި 2010 ވަނަ އަހަރު ބަޔާނުގެ ސީނިއާ ޓީމަށް އަލަބާ ޕްރޮމޯޓުވިއިރު، އޭގެ ފަހުން އެއް ސީޒަނުގައި އަލަބާ ވަނީ ލޯނު އެއްބަސްވުމެއްގެ ދަށުން ހޮފެންހެއިމަށްވެސް ކުޅެފައެވެ.

އެކަމަކު ފަހުން ބަޔާނުގެ ސީނިއާ ޓީމުގެ މުހިންމު މެންބަރަކަށް އަލަބާ ވިއިރު، އޭނާ ވަނީ ބަޔާނަށް 431 މެޗު ކުޅެދީ 33 ލަނޑު ޖަހާފައެވެ. އަދި ވަނީ ބަޔާނާއެކު ޖަރުމަން ލީގު 10 ފަހަރު، ޔުއެފާ ޗެމްޕިއަންސް ލީގު ދެ ފަހަރު އަދި ފީފާ ކުލަބު ވޯލްޑް ކަޕް ދެ ފަހަރު ކާމިޔާބުކޮށްފައެވެ.

އަލަބާ ރެއާލަށް ބަދަލުވިކަން އެ ކުލަބުން ހާމަކުރިއިރު، އޭގެ އެއް ދުވަސްކުރިން އެ ޓީމުގެ ކޯޗުކަން ދޫކޮށްލަން ޒިނެދިން ޒިދާން ވަނީ ނިންމާފައެވެ.