ދެކުނު އެމެރިކާގެ އެންމެ ޝަރަފުވެރި ފުޓްބޯޅަ މުބާރާތް ކަމަށްވާ ކޮޕާ އެމެރިކާއަށް ކޮލަމްބިއާއިން އެކުލަވާލި ސްކޮޑުން އެ ޓީމުގެ ތަރި ހަމޭސް ރޮޑްރިގޭޒް ބާކީކޮށްފިއެވެ.

ރެއާލް މެޑްރިޑް ދޫކޮށް މި ނިމުނު ޓްރާންސްފާގައި އެވަޓަނާ ގުޅުނު އުމުރުން 29 އަހަރުގެ ހަމޭސްއަށް ވަނީ މި ސީޒަނުގައި އަނިޔާގެ ސަބަބުން ގިނަ މެޗުތަކެއް ގެއްލިފައެވެ. އެގޮތުން އިނގިރޭސި ޕްރިމިއާ ލީގުގައި އެވަޓަނުން އެންމެ ފަހުން ކުޅުނު ދެ މެޗުގައިވެސް ހަމޭސް ކުޅެފައެއް ނުވެއެވެ.

އެހެންކަމުން ފިޓްނަސް ދަށްވުމުގެ ސަބަބުން އަންނަ މަހު ފެށުމަށް ހަމަޖެހިފައިވާ ކޮޕާ އެމެރިކާއަށް ކޮލަމްބިއާއިން އެކުލަވާލި ސްކޮޑުން ހަމޭސްއަށް ފުރުސަތު ނުދޭން ވަނީ ނިންމާފައެވެ. އަދި އޭގެ ކުރިން ވޯލްޑް ކަޕުގެ ދެކުނު އެމެރިކާ ކޮލިފައިންގައި ކޮލަމްބިއާއިން ޕެރޫ އާއި އާޖެންޓީނާއާ ދެކޮޅަށް ކުޅޭ މެޗުތަކުގައިވެސް ހަމޭސްއަށް ފުރުސަތު ނުދެން ވަނީ ނިންމާފައެވެ.

މި އަހަރު ބާއްވާ ކޮޕާ އެމެރިކާއަކީ މިދިޔަ އަހަރު އާޖެންޓީނާ އާއި ކޮލޮމްބިއާގައި ބާއްވަން ތާވަލުކުރި މުބާރާތެވެ. އެކަމަކު ކޮވިޑް-19 އާ ގުޅިގެން މި މުބާރާތް ވަނީ މި އަހަރުގެ ހޫނު މޫސުމަށް ފަސްކޮށްފައެވެ. އެހެންކަމުން މީގެ ކުރިން ތާވަލުކޮށްފައިވަނީ ކޮޕާ އެމެރިކާ އަންނަ ޖޫން މަހުގެ 13 ވަނަ ދުވަހު ފެށިގެން ޖުލައި މަހުގެ 10 ވަނަ ދުވަހުގެ ނިޔަލަށް އާޖެންޓީނާ އާއި ކޮލޮމްބިއާގައި ބޭއްވުމަށެވެ.

އޭރު ތާވަލުކޮށްފައި އޮތް ގޮތުން ގްރޫޕް އޭގެ މެޗުތައް ކުޅޭނީ އާޖެންޓީނާގައެވެ. އަދި ގްރޫޕް ބީގެ މެޗުތައް ކުޅޭނީ ކޮލޮމްބިއާގައެވެ. އަދި އެއަށްފަހު މުބާރާތުގެ ފައިނަލް މެޗު ކުޅުމަށް ހަމަޖެހިފައި އޮތީ ކޮލޮމްބިއާގެ މެޓްރޯ ސްޓޭޑިއަމުގައެވެ. އެކަމަކު ކޮލަމްބިއާގައި ކޮވިޑުގެ ނުރައްކާ ބޮޑުވެފައިވާއިރު، އެ ގައުމުގައި ކުރިއަށްދާ ހަޅުތާލުގެ ސަބަބުން މިހާރު ވަނީ މި މުބާރާތް ހޯސްޓްކުރުމުގެ ފުރުސަތު ކޮލަމްބިއާއަށް ގެއްލިފައެވެ.

ކޮޕަ އެމެރިކާގެ ގްރޫޕް ދޭއްގައި ކޮލަމްބިއާ މި ފަހަރު އޮތްއިރު، އެ ގްރޫޕުގައި ދެން އޮތީ އެންމެ ފަހުގެ ޗެމްޕިއަން ބްރެޒިލާއި، ވެނެޒުއޭލާ އާއި، އެކުއެޑޯ އަދި ޕެރޫއެވެ.