ޔޫރޯގެ ރާއްޖޭގެ އެކްސްކްލޫސިވް ބްރޯޑްކާސްޓަރަކަށް ރާއްޖެޓީވީ

ކުރިއަށް އޮތް ޔޫރޯ ފުޓްބޯޅަ މުބާރާތުގެ ރާއްޖޭގެ އެކްސްކްލޫސިވް ބްރޯޑްކާސްޓަރަކަށް ރާއްޖެޓީވީ ހަމަޖެހިއްޖެއެވެ. މިކަމާ ގުޅޭ އެންމެހައި އެއްބަސްވުމެއްގައި ހުސްވި ހަފުތާގެ ތެރޭގައި ވަނީ ސޮއިކޮށްފައެވެ.

ޔޫރަޕުގެ ގައުމުތަކުގެ ފުޓްބޯޅަ މުބާރާތް ކަމަށްވާ ޔޫރޯ 2020 ކުރިއަށް އޮތް ޖޫން މަހުގެ 11 ވަނަ ދުވަހު ފަށާނެއެވެ. މުޅިއެކު 24 ޓީމު ވާދަކުރާ މި މުބާރާތް ކުރިއަށް ދާނީ ޖުލައި މަހުގެ 11 ވަނަ ދުވަހުގެ ނިޔަލަށެވެ. މި މުބާރާތުގައި ޖުމްލަ 51 މެޗު ކުޅޭއިރު، މި ހުރިހާ މެޗެއްވެސް ރާއްޖެޓީވީން ދައްކާނެއެވެ. އަދި މެޗުތަކުގެ ކުރިންނާއި މެދުތެރެއިންނާއި ފަހުންވެސް މެޗުތައް ދިރާސާކުރުމުގެ އެކި ޝޯތައްވެސް ރާއްޖޭގެ ތަޖުރިބާކާރު ބޭފުޅުން ހިމަނައިގެން ރާއްޖެޓީވީން ގެނެސްދިނުމަށް ވަނީ ހަމަޖެހިފައެވެ. އަދި މެޗުތައް "ރާއްޖެ.އެމްވީ" އިން ލައިވް ސްޓްރީމް ކުރާނެއެވެ.

ޔޫރަޕުގެ އެންމެ ބޮޑު ފުޓުބޯޅަ މުބާރާތް ޔޫރޯގެ އެކްސްކްލޫސިވް ބްރޯޑްކާސްޓިން ރައިޓްސް ގަނެ، މުބާރާތުގެ ހުރިހާ މެޗެއް ރާއްޖެޓީވީން ދެއްކުމަށް ނިންމީ އިގުތިސޯދީ ގޮތުން މުޅި ރާއްޖެއަށްވެސް ނުހަނު ދަތި ދަނޑިވަޅެއްގައެވެ. މި ނިންމުން ނިންމީ ރާއްޖެޓީވީން ކުޅިވަރު ކުރިއެރުވުމަށް ދޭ ސަމާލު ކަމުގެ ސަބަބުންނާއި މި ހާލަތަކީ ގިނަ ބަޔަކު ގެއިން ބޭރަށް ނުނިކުމެވި ގޭގައި ތިބެން ޖެހިފައިވާ ހާލަތަކަށް ވުމުން މުބާރާތުގެ މެޗުތަކާއި އަދި މެޗުތަކާއި ގުޅޭ ގޮތުން ދިވެހި އެނަލިސްޓުން ގެނެސްދެއްވާ މައުލޫމާތުތަކާއި އަދިވެސް މުބާރާތާއި ގުޅޭ އެހެނިހެން ކަންކަން ގޭގައި ތިއްބަވައިގެން ފަސޭހަކަމާއި އެކު ބެލޭނެ އިންތިޒާމު ދިވެހި ރައްޔިތުންނަށް ހަމަޖައްސައިދިނުމުގެ ގޮތުންނެވެ.

އަދި މިއީ ކޮވިޑް-19 ގެ ދަތި މި ދަނޑިވަޅުގައި ކުޅިވަރަށް ލޯބި ކުރައްވާ ހުރިހާ ފަރާތްތަކަށާއި ދިވެހި ޒުވާނުންނަށް އަދި ޖުމްލަކޮށް ދިވެހި ހުރިހާ ރައްޔިތުންނަށް ހިތްހަމަޖެހުން ގެނެސްދޭނެ ކަމެއް ކަމުގައި ރާއްޖެޓީވީން ދެކެއެވެ.

ރާއްޖެޓީވީގެ ޑެޕިއުޓީ ޗީފް އޮޕަރޭޓިން އޮފިސަރު ނާޒުމީ ސައީދު ވިދާޅުވީ މި ދަނޑިވަޅުގައި ޔޫރޯ ފުޓްބޯޅަ މުބާރާތް ގެނެސްދިނުމަށް ރާއްޖެޓީވީން ނިންމީ އުނދަގޫ މިހާލަތުގައި އެންމެން ގޭގައި ތިބޭއިރު، ހިތްހަމަޖެހޭނެ ވަގުތުތަކެއް ބެލުންތެރިންނަށް ހޯދައިދީ، ދުނިޔޭގެވެސް އެންމެ ބޮޑު އެއް ފުޓްބޯޅަ މުބާރާތް ދިވެހިންނަށް ފެންނާނެ ގޮތް ހަދައިދިނުމަށް ކަމަށެވެ.

އަދި ރާއްޖެޓީވީގެ ހެޑް އޮފް ސްޕޯޓްސް ހުސައިން ފަރިޔާޒް ވަނީ ރާއްޖެޓީވީން ގެނެސްދޭ ޔޫރޯގެ ކަވަރޭޖަކީ ފުރިހަމަ އަދި ބެލުންތެރިންނަށް މަގުބޫލު ކަވަރޭޖަކަށް ވާނެކަމުގެ ޔަގީންކަން ދެއްވާފައެވެ. އަދި ވަނީ މި ކަވަރޭޖުން ތަފާތު ގިނަ ކަންތައްތަކެއް ފެނިގެންދާނެ ކަމަށްވެސް ވިދާޅުވެފައެވެ.

މި ފަހަރުގެ ޔޫރޯ ރާއްޖެޓީވީން ބްރޯޑްކާސްޓް ކުރާއިރު، 2016 ވަނަ އަހަރު ފްރާންސްގައި ބޭއްވި ޔޫރޯވެސް ރާއްޖެޓީވީން ވަނީ ބްރޯޑްކާސްޓް ކޮށްފައެވެ. އަދި އެ ފަހަރު ރާއްޖެޓީވީން ވަނީ ޔޫރޯގެ ވަރަށް ފުރިހަމަ ކަވަރޭޖެއް ގެނެސްދީފައެވެ.

މި އަހަރުގެ ހޫނު މޫސުމުގައި ޔޫރޯ ބާއްވާއިރު، މި މުބާރާތަކީ މިދިޔަ އަހަރު ބާއްވަން ތާވަލުކުރި މުބާރާތެކެވެ. އެކަމަކު ކޮވިޑާ ގުޅިގެން މިދިޔަ އަހަރުގެ ޔޫރޯ މި އަހަރަށް ފަސްކުރި ނަމަވެސް، މި މުބާރާތް މި އަހަރުވެސް ކުރިއަށްދާނީ "ޔޫރޯ 2020" ގެ ނަމުގައެވެ.

ޔުއެފާއިން ނިންމާފައިވާ ގޮތުން މި މުބާރާތް ކުރިއަށްދާނީ ޔޫރަޕުގެ ތަފާތު 11 ގައުމެއްގެ 11 ސިޓީއެއްގައެވެ. އެގޮތުން މުބާރާތް ހުޅުވާ މެޗު އިޓަލީގެ ރޯމުގެ އޮލިމްޕިކް ސްޓޭޑިއަމުގައި ކުޅޭއިރު، ސެމީ ފައިނަލް މެޗުތަކާއި، މުބާރާތުގެ ފައިނަލް މެޗު ކުޅުމަށް ނިންމާފައިވަނީ ލަންޑަނުގެ ވެމްބްލީ ސްޓޭޑިއަމްގައެވެ. އެގޮތަށް ކުރިއަށްގެންދަން ޔުއެފާއިން ނިންމީ، ޔޫރޯ މުބާރާތް ބާއްވާތާ 60 އަހަރު އަހަރު ފުރޭ މުނާސަބަތު ކުލަގަދަކޮށް ފާހަގަކުރުމުގެ ގޮތުންނެވެ.

މި ފަހަރުގެ ޔޫރޯގައި ވާދަކުރާ ގައުމުތަކުގެ ތެރޭގައި މުބާރާތުގެ އެންމެ ފަހުގެ ޗެމްޕިއަން ޕޯޗުގަލާއި ދުނިޔޭގެ ޗެމްޕިއަން ފްރާންސް ހިމެނެއެވެ. މި މުބާރާތުން އަލަށް ފެނިގެންދާނެ ކަމަކީ ވީޑިއޯ އެސިސްޓަންޓް ރެފުރީ (ވީއޭއާރް) މުޅިން އަލަށް ޔޫރޯގައި ބޭނުން ކުރަން ފެށުމެވެ.