އިންޓެލް މަސައްކަތް ރައީސް އޮފީހުގެ ދަށަށް ގެންނާކަށް ނޫޅޭ: ރައީސް އޮފީސް
އިންޓެލިޖެންސް އިދާރާތަކުގެ އޮޑިޓެއް ހެދުމަށް ސަރުކާރުން ނިންމާފައިވަނީ ވަރަށް މުހިންމު މަގްސަދެއްގައި
ރައީސުލްޖުމްހޫރިއްޔާގެ އޮފީސް
ރާއްޖޭގެ އިންޓެލް މަސައްކަތްތަކާއި އެ ބާރުތައް ރައީސް އޮފީހުގެ ދަށުން ހިންގާ ވަކި އިދާރާއަކަށް ދިނުމަށް މަސައްކަތް ނުކުރާ ކަމަށް ރައީސް އޮފީހުން ބުނެފިއެވެ.
ރައީސް މުހައްމަދު ނަޝީދަށް ދިން ޓެރަރިސްޓު ހަމަލާގެ އެއްވެސް އިންޓެލް މައުލޫމާތެއް ފުލުހުންނަށް ލިބިފައިނުވާ ކަމަށް ފުލުހުން ބުނެފައިވާތީ، އެކަމާ ގުޅިގެން ފުލުހުންގެ އިންޓެލިޖެންސްގެ އޮޑިޓެއް ހެދުމަށް ރައީސުލްޖުމްހޫރިއްޔާ ވަނީ ކޮމިޓީއެއް އެކުލަވާލައްވާފައެވެ. އެ ކޮމިޓީގައި ތިއްބަވަނީ ރައީސް އޮފީހުގެ ޕޮލިސީ ސެކެޓްރީ ސަބްރާ ނޫރައްދީން އަދި ރައީސް އޮފީހުގެ ލީގަލް ކައުންސެލް އަހްމަދު އަބްދުﷲ އަފީފާއި ނޫޝީން ވަހީދެވެ.
ކޮމިޓީއާ ގުޅިގެން ޝާއިއުކޮށްފައިވާ ރިޕޯޓަކާ ގުޅިގެން ރައީސް އޮފީހުން ނެރުނު ބަޔާނެއްގައި ބުނީ އެ ރިޕޯޓުގައި ވަނީ ހުސް ދޮގުވާހަކަތަކެއް ކަމަށާއި، އެއީ ސަރުކާރުގެ އިސްވެރިންނާ ބެހޭގޮތުން ދޮގު ޚަބަރާއި މަޢުލޫމާތު ފެތުރުމަށް ތައްޔާރުކޮށްފައިވާ ރިޕޯޓެއް ކަމަށެވެ. ރައީސް އޮފީހުން ބުނީ ރާއްޖޭގައި އިންޓެލިޖެންސްގެ މަސައްކަތް މިހާރެކޭ އެއްފަދައިން ކުރިއަށް އޮތް ދުވަސްތަކުގައި ވެސް ކުރާނީ ފުލުހުންނާއި ސިފައިންގެ އިތުރުން މިހާރުވެސް އެކަން ކުރަމުންދާ އިދާރާތަކުން ކަމަށެވެ. އެ މުއައްސަސާތަކަށް އޮތް ބާރުތައް ހަނިކޮށް ރައީސުލްޖުމްހޫރިއްޔާގެ އޮފީހުގެ ބެލުމުގެ ދަށުން އެފަދަ އިދާރާއެއް ހިންގާނެ ކަމަށް އެ ރިޕޯޓުގައި އޮތް އޮތުމަކީ ކަނޑައެޅިގެން ދޮގެއް ކަމަށް ވެސް ބުނެފައިވެއެވެ.
އެ ބަޔާނުގައި ބުނީ މި މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް ދިން ޓެރަރިސްޓް ހަމަލާއާ ގުޅިގެން ޓެރަރިޒަމާ ގުޅޭ އިންޓެލިޖެންސް އިދާރާތަކުގެ އޮޑިޓެއް ހެދުމަށް ސަރުކާރުން ނިންމާފައިވަނީ ވަރަށް މުހިންމު މަގްސަދެއްގައި ކަމަށެވެ. އެ މަސައްކަތް ކުރަމުން އަންނަ ކޮމިޓީގެ މެންބަރުންގެ ނަޒާހަތްތެރިކަމަށް ސުވާލު އުފައްދައި، މަސައްކަތް ކުރިއަށް ގެންދިއުމަށް ބުރޫއަރާ ފަދަ މޭރުމަކުން ދޮގު މައުލޫމާތާއި ޚަބަރު ފެތުރުމަކީ، ރައްޔިތުންގެ މެދުގައި ފިތުނައަށް މަގުފަހިކޮށް، ކަންބޮޑުވުމާއި ނުތަނަވަސްކަން އުފެއްދުން ކަމަށް ވެސް ބުނެފައިވެއެވެ.
އެގޮތުން އެ ކޮމިޓީގެ ތިން މެމްބަރުންނަށް ފާޑު ކިޔާފައިވާތީ އެކަމާ ގުޅިގެން ރައީސް އޮފީހުން ބުނީ އެ އޮފީހުގެ ވަޒީފާއަކަށް މީހަކު ހަމަޖެއްސުމުގެ ކުރިން އެ މީހަކާބެހޭ ގޮތުން ސާފުކުރަންޖެހޭ މައުލޫމާތާއި ކުށުގެ ރެކޯޑު ކަނޑައެޅިފައިވާ އުސޫލުން ބަލައި، ސާފުކުރާ ކަމަށެވެ. އެގޮތުން، ޞަބްރާ އަދި ނޫޝީން އެ އޮފީހުގެ ވަޒީފާއަށް އައްޔަނުކޮށްފައިވަނީ ގަވާއިދުން ބަލަންޖެހޭ ކަންކަމާއި ކުށުގެ ރެކޯޑު ވެސް ސާފުކުރުމަށްފަހު ކަމަށެވެ.
ރައީސް އޮފީހުން ބުނީ ދިވެހި ސަރުކާރުން ގަބޫލުކުރާ އަސާސަކީ، ނޫސްވެރިންގެ މިނިވަންކަމާއި، ފާޑުކިޔުމާއި އިދިކޮޅު ފަރާތުން ދެކޭގޮތް ހާމަކުރުމުގެ ހައްގަކީ ކޮންމެ މީހަކަށްމެ ލިބިގެންވާ ހައްގެއް ކަމަށެވެ. ނޫސްވެރިންނަކީ ވަކި އަހްލާގީ ހަމަތަކަކާއި ސުލޫކީ މިންގަނޑުތަކަކަށް ތަބާވާ ބަޔަކަށްވާތީ، ކުރިޔަށް އޮތްތާނގައި ވެސް މި ހަމަތަކާއި އުސޫލުތަށް ހިފެހެއްޓުމަށް އިލްތިމާސްކޮށްފައިވެއެވެ.
