އިޒްރޭލުން ފަލަސްތީނުގައި ހިންގަމުންދާ އުދުވާނުތައް ވަނީ ހައްދުފަހަނައަޅާ ގޮސްފައެވެ. މުޅި ދުނިޔެއަށް ގަދަފަދަކަމާއި އާރާއިބާރު ދައްކަަމުންދާ އިޒްރޭލަކީ ހަގީގަތުގައި އިންތިހާއަށް ބަލިކަށި ދައުލަތެއްކަމަށް މަސްރަހު ދިރާސާކުރާ ފަރާތްތަކުން ބުނެއެވެ. އިޒްރޭލުން ދުނިޔޭގެ ލޯތަކުގައި އަނދުން އެޅުވުމަށް ބޭނުންކުރާ މައިގަނޑު ހަތިޔާރަކީ މީޑިއާގެ އަޑު ކަނޑުވާލުމެވެ. އިޒްރޭލުން ދެމުންގެންދާ ޙަމަލާތަކާއި، ދިފާއުގައި އިޒްރޭލަށް އަމާޒުވަމުންދާ ޙަމަލާތަކުގެ މައުލޫމާތުތައް ގެނެސްދިނުމަށް މަސައްކަތް ކުރާ ތަންތަނުގެ އަޑުކަނޑުވާލުމަށް އިޒްރޭލު ދަނީ ގަދައަޅަމުންނެވެ.

މެއި މަހުގެ 10 ވަނަ ދުވަހުން ފެށިގެން އިޒްރޭލުން ސިލްސިލާކޮށް ދެމުން ގެންދާ ޙަމަލާތަކުގެ ބަދަލުގައި ފަލަސްތީނުގެ ރައްޔިތުންވެސް އިޒްރޭލަށް އެންމެ ތަންފުކެއްވެސް ދުލެއް ނުދެއެވެ. އަތު ބޮމާއި، ބަޑިއާއި ފިސްތޯލަ ހިފައިގެން ނުކުންނަ އިޒްރޭލުގެ ފައުޖުތަކާއި ކުރިމަތިލުމަށް ފަލަސްތީނުގެ އާދައިގެ ކުދިބޮޑު ރައްޔިތުން މަތިހަށި ނަގާފައި ނުކުންނަނީ އެއްވެސް ޖެހިލުންވުމެއް ނެތިއެވެ. ފުރާނައަކަށް ބެލުމެއް ނެތިއެވެ. މިނިވަންކަމަކީ މަރުވުމެއް ނެތް ގަހެކޭ ބުނަމުންނެވެ. ފަލަސްތީނު ރައްޔިތުންގެ އާދަޔާޚިލާފު ހިތްވަރާއި ފަންވަރު ދެކެ އިޒްރޭލުވެސް ހަގީގަތުގައި ޖެހިލުންވަނީ ތިޔަހެނެއް ނޫނެވެ. އެކަން ފޮރުވުމަށް އިޒްރޭލުން ގެންދަނީ ތަކުރާރުކޮށް އެކަންކަން ގެނެސްދެމުންދާ މީޑީއާގެ ވަސީލަތްތަކަށް ޙަމަލާތައް އަމާޒު ކުރަމުންނެވެ.

އެގޮތުގެ މަތިން ދިން އެންމެ ވަރުގަދަ އެއް ޙަމަލާއަކީ މިހިނގާ މެއި މަހުގެ 15 ވަނަ ދުވަހު ގާޒާ ޓަވަރަށް ދިން ޙަމަލާއެވެ. އަލްޖަޒީރާ ހިމެނޭގޮތަށް ބައިނަލްއަގުވާމީ ގިނަ މީޑިއާ އޮފީސް ހުންނަ މި އިމާރާތަށް އިޒްރޭލުން ވައިގެ ހަމަލާތަކެއް ދީފައިވާއިރު، މަދު ސިކުންތުކޮޅެއްގެ ތެރޭގައި މުޅި އިމާރަތް ވަނީ ބިމާ ހަމަވެފައެވެ. އެއީ ހަމާސް ޖަމާއަތުން ހަތިޔާރު ގުދަން ކުރަން ގެންގުޅޭ އިމާރާތެއް ކަމަށް ބުނެ ދިން ޙަމަލާއަށްފަހު އަދިވެސް އުޅެނީ އެކަމުގެ ސާފު ހެއްކެއް ނުދެއްކިގެންނެވެ. ބައިނަލްއަޤުވާމީ ޤާނޫނުތައްވެސް މުގުރަމުން ދަނީ ހަމައެކަނި އެންމެ ބޭނުމެއްގައެވެ. އިޒްރޭލަކީ ވަރުގަދަ ބާރުގަދަ އަސްކަރިއްޔާއެއް އޮތް ޤައުމެއްގެ ގޮތުގައި ދުނިޔެއަށް ދެއްކުމަށެވެ.

އޭގެ ކުރިން ފަލަސްތީނުގައި ޙަރަކާތްތެރިވަމުންދާ ތުރުކީވިލާތުގެ ނޫސްވެރިންނަށް އަމާޒުކޮށްވެސް ޙަމަލާތަކެއް ދީފައިވާއިރު، އެންމެ ފަހުން މެއި މަހުގެ 20 ވަނަ ދުވަސް އަލިވިލިގެން އައީ އަލް-އަގްސާ ރޭޑިއޯ ސްޓޭޝަންގައި މަސައްކަތް ކުރަމުންދިޔަ ފަލަސްތީނުގެ މަޝްހޫރު ނޫސްވެރިއެއް ކަމަށްވާ ޔޫސުފް އަބޫ ހުސެއިން ޝަހީދު ކޮށްލި ޚަބަރާއެކުއެވެ. އިޒްރޭލުގެ އުދުވާނުތަކުގެ ވާހަކަ ފޮރުވައި، ބޭނުންހާ ކަމެއް ހާސިލު ކުރުމަށް އޮތް އެއް ހުރަހަކީ ނޫސްވެރިންނަށް ވާތީއެވެ. ހުސެއިންގެ މަރުގެ ޚަބަރު އާންމުވެގެން ދިއުމާއެކުވެސް އެތައް ބަޔަކު ގެންދަނީ މިކަމުގައި އިސްރާއީލް ޖަވާބުދާރީ ކުރުމަށް ގޮވާލަމުންނެވެ.

އިޒްރޭލުން މެދުނުކެނޑި ދެމުންދާ ހަމަލާތަކުގައި ގާޒާގެ ރެފިއުޖީ ކޭމްޕްތަކަށް ބޮން އަޅައި، ކުޑަކުދިން ހިމެނޭހެން އެތައް ބަޔަކު ޝަހީދު ކުރަމުންދާއިރު، ހަގީގަތުގައި ފެންނަމުން ދަނީ އިޒްރޭލުގެ ބަލިކަށިކަމެވެ. މީޑިއާގެ އަޑުކަނޑުވާލުމަށް ކުރަމުންދާ މަސައްކަތަކީ އެކަމުގެ ސާފު ހެއްކެކެވެ.