25 ޖުލައި 2014ށް ފަހު އިސްރާއިލުން އުފައްދާ އެއްވެސް މުދަލެއް އެތެރެނުކުރާކަމުގެ ޔަޤީންކަން ދީފި
18 މެއި 2021 | އަންގާރަ 14:26ޣައްޒާއަށް ދެމުން ދިޔަ ހަމަލާތަކުގެ ސަބަބުން އިސްރާއީލާއެކު ބާއްވަމުން އައި ހުރިހާ ގުޅުމެއް 2014ގައި ރާއްޖެއިން ވަނީ ކަނޑާލާފައި
ކޮމިޝަނަރ ޖެނަރަލް އޮފް ކަސްޓަމްސް އަބްދުﷲ ޝަރީފް
25 ޖުލައި 2014ށް ފަހު އިސްރާއިލްގައި އުފައްދާ އެއްވެސް މުދަލެއް ރާއްޖެ އެތެރެވެފައެއް ނުވާކަމަށް މޯލްޑިވްސް ކަސްޓަމްސް ސަރވިސްއިން ބުނެފިއެވެ.
ރާއްޖެއަށް އިސްރާއީލުން އުފައްދާ ތަކެތި އެތެރެ ކުރުން މަނާކޮށްފައި ވަނީ 25 ޖުލައި 2014ގައެވެ. މިގޮތައް ނިންމާފައިވަނީ ޣައްޒާއަށް އޭރު އިސްރާއީލުން ދެމުން ދިޔަ ހަމަލާތަކުގެ ސަބަބުން އިސްރާއީލާއެކު ބާއްވަމުން އައި ހުރިހާ ގުޅުމެއް ކަނޑާލުމަށް ނިންމުމާއި ގުޅިގެންނެވެ. ކަސްޓަމްސްއިން ވަނީ މިނިސްޓްރީ އޮފް އިކޮނޮމިކް ޑިވެލޮޕްމަންޓުގެ އިޢްލާނުން އިސްރާއީލުގައި އުފައްދާ ތަކެތި 25 ޖުލައި 2014ން ފެށިގެން ދިވެހިރާއްޖެއަށް އިމްޕޯޓްކުރުން މަނާކަން އަންގާފައިވާތީ، އެދުވަހުން ފެށިގެން އިސްރާއީލުގެ އުފެއްދުންތައް ދިވެހިރާއްޖެއަށް އެތެރެވިޔަ ނުދޭކަމަށް ވަނީ ބުނެފައެވެ.
އިސްރާއީލުގެ އުފެއްދުންތައް 2014އިން ފެށިގެން އެތެރެ ނުކުރާކަމުގެ ޔަޤީން ދީފައި މިވަނީ އިސްރާއީލުން ފަލަސްތީނުގެ ރައްޔިތުންނާއި ދެކޮޅަށް ހިންގާ ލާއިންސާނީ އަމަލުތައް އިތުރުވެ އެ ޤައުމުގެ ހައްޤުގައި ގިނަ ދިވެހި ރައްޔިތުންތަކެއް ނިކުމެފައިވާ ދަނޑިވަޅެއްގައެވެ. އެގޮތުން ސޯޝަލް މީޑިއާގައި ފްރީ ޕަލަސްޓައިން ހޭޝްޓެގް ބޭނުންކޮށްގެން ކެމްޕޭނެއް ވަނީ ފަށާފައެވެ. އަދި ދިހިން ވަނީ ރާއްޖެ ފަލަސްތީނާއެކު ވާކަން ހާމަކޮށްދިނުމަށް ރާއްޖޭގެ ހުރިހާ ކަންކޮޅުތަކުން އެއްވަގުތެއްގައި ފަލަސްތީނުގެ ދިދަ ހިފައިގެން ގެތަކުގެ ބެލްކަންޏަށް ނިކުމެ ރަމްޒީ ހަރަކާތެއް ވެސް ކުރިއަށް ގެންގޮސްފައެވެ. މި ހަރަކާތްތަކުގައި ދިވެހިން ވަނީ އިސްރާއީލްގެ ލާއިންސާނީ އަމަލުތައް ހުއްޓުވާ ޖަވާބުދާރީކުރުމަށް ގޮވާލާފައެވެ. އަދި ދިވެހިރާއްޖެއިން އިސްރާއީލާއެކު ހުރިހާ ގުޅުމެއް ކަނޑާލާ އެޤައުމުން އެއްވެސް އެއްޗެއް އެތެރެކުރުން މަނާކުރުމަށް ވަނީ ގޮވާލާފައެވެ.
ރާއްޖެފަދަ މުސްލުމް ޤައުމުތަކާއި ގުޅުން ބަދަހުކުރަން އެދޭކަން އިސްރާއީލުން ދަނީ އަބަދުވެސް ފާޅުކުރަމުންނެވެ. އެގޮތުން ރާއްޖޭގައި އިސްރާއީލުގެ ފްލައިޓް ޖެއްސުމުގެ ހުއްދައަށްވެސް އިސްރާއީލު ސަރުކާރުން ވަނީ އެދިފައެވެ. އެހެންނަމަވެސް މިކަމަށް ދިވެހި ސަރުކާރުން އިންކާރުކޮށް ދިވެހިންނަކީ އަބަދުވެސް ފަލަސްތީނުގެ މުސްލިމް އަޚުންނާއި އުޚުތުންނާއެކުވާނެ ޤައުމެއްކަން ވަނީ ސާބިތުކޮށްދީފައެވެ. އެހެންންމަވެސް، މިފަދަ މިސާލުތައް ދެއްކުމުގައި ބައެއް މުސްލިމް ޤައުމުތަކާއި ފަލަސްތީނުގެ އަވައްޓެރިންގެ ގޮތުގައި ތިބި އަރަބި ޤައުމުތައް ނުކުޅެދުމުން އެކަމުގެ ފާޑުކިޔުންތައް އެޤައުމުތަކަށް ދަނީ އަމާޒުވަމުނެވެ.
އެމެރިކާގެ ކުރީގެ ރައީސް ޑޮނަލްޑު ޓްރަންޕުގެ ސަރުކާރުގެ އެހީތެރިކަމާއެކު ގިނަ ޢަރަބި ޤައުމުތަކަކުންވަނީ ފަލަސްތީނުގެ ބިންތައް އިސްތިޢުމާރުކޮށްފައިވާ އިސްރާއީލާއެކު ގުޅުންބަދަހިކޮށްފައެވެ. އަބްރަހަމު އެކޯޑުގެ ދަށުން އިސްރާއީލާއެކު ގުޅުން ބަދަހިކުރި ޢަރަބި ޤައުމުތަކުގެ ތެރޭގައި މިޞްރާއި ޔޫއޭއީއާއި ބަޙްރައިނާއި މަޣްރިބާއި އުރުދުންނާއި ސޫދާން ހިމެނެއެވެ. އިސްރާއީލާއެކު ޚާރިޖީ ގުޅުން ބަދަހިކުރުމުގެ އިތުރުން ސަލާމަތީ ދާއިރާއިންނާއި ޖާސޫސީ ދާއިރާއިން ގުޅުން ބަދަހިކުރުމަށްވެސް އެ ޤައުމުތަކުން އެއްބަސްވިއެވެ.
މީގެ އިތުރުން މި މައްސަލަ ހައްލުކޮށް ހަމަލާދިނުން ހުއްޓުވުމަށް ދުނިޔޭގެ ބޮޑެތި ޤައުމުތަކާއި ބާރުގަދަ ޖަމިއްޔާތައްވެސް ވަނީ ނުކުޅެދިފައެވެ. އެގޮތުން ދުނިޔޭގެ އަމަނާއި ސުލްހައްއަށް މަސައްކަތްކުރާ އ.ދ،އިން ވެސް އިސްރާއީލްގެ ކުރިމަތީގައި ކުޑަކަކޫ ޖަހާފައިވާކަމަށް ގިނަ ބަޔަކުދަނީ ބުނަމުންނެވެ. އެގޮތުން އެއިދާރާގެ އެންމެ ބާރުގަދަ ކައުންސިލް އަދި ދުނިޔޭގެ ހަމަނުޖެހުން ހުއްޓުވުމަށް ހަޤީޤީ ބާރު ލިބިފައިވާ ސެކިއުރިޓީ ކައުންސިލުން ފަލަސްތީނުގެ ދިފާޢުގައި ގަރާރު ނެރުން ތިންވަނަ ފަހަރަށް އެމެރިކާއިން ވީޓޯކޮށް ވަނީ ނާކާމިޔާބުކޮށްލާފައެވެ.
އ.ދ. އަށް އެންމެ ގިނައިން ފަންޑްކުރާ އަދި ސެކިއުރިޓީ ކައުންސިލްގެ ދާއިމީ މެމްބަރެއކަމުގައިވާ އިންސާނީ ހައްޤުތަކުގެ ވަކާލާތުކުރުމުގައި އެންމެ ކުރީ ސަފުގައި އޮތްކަމަށް ދައުވާކުރާ އެެމެރިކާއިން ދަނީ އަނިޔާވެރި ލާއިންސާނީ އަމަލުތައް ހިންގާ އިސްރާއީލުގެ އަމަލުތައް ދިފާޢުކޮށް އެ އަމަލުތަކަށް އެހީވުމަށް އަސްކަރީގޮތުންނާއި މާލީގޮތުންވެސް އެހީތެރިވަމުންނެވެ. މިކަމާއި ގުޅިގެން ބައިނަލްއަޤްވާމީ މުޖުތަމަޢުއިން ދަނީ އެ ޤައުމަށް ބޮޑެތި ފާޑުކިޔުންތަކެއްވެސް އަމާޒުކުރަމުންނެވެ.
