ގާޒާއަށް ދެމުންދާ ހަމަލާތައް ހުއްޓައެއް ނުލާނަން – ނަތަންޔާހޫ

އިސްރާއީލުން ފަލަސްތީނުގެ ގާޒާއަށް ދެމުންދާ ހަމަލާތައް ހުއްޓާ ނުލާނެ ކަމަށާއި ހަމަލާ ދެނީ ރައްދުގައި ކަމަށް އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެއެވެ.

ރައްޔިތުންނަށް ނަތަންޔާހޫ ދެއްވި ޚިތާބެއްގައި ވިދާޅުވީ ގާޒާއަށް ދެމުން ގެންދާ ހަމަލާތައް އިންސާފުވެރި ކަމުގައެވެ. ހަގުރާ،ަ ފެށުނީ ހަމާސްއިން އިސްރާއީލަށް ރޮކެޓް ހަމަލާ ދިނުމުން ކަމަށާއި އެހެންވީމާ ޒިންމާ ނަގަން ޖެހޭނީ ހަމާސްއިން ކަމަށް ވެސް ނަތަންޔާހޫ ވިދާޅުވިއެވެ.

އެމެރިކާގެ ރައީސް ޖޯ ބައިޑެން ގުޅުއްވި ކަމަށާއި އެމެރިކާ އޮތީ އިސްރާއީލާއި އެކުގައި ކަމަށް ވިދާޅުވެ އެމެރިކާއިން ކުރާ ތާއީދުގެ ޔަގީންކަން ދެއްވި ކަމަށް ވެސް ނަތަންޔާހޫ ވިދާޅުވިއެވެ.

އެމެރިކާ އާއި އިސްރާއީލުން ކޮންމެ ގޮތަކަށް މިކަން ސިފަކުރިއަސް ފަލަސްތީނުގެ ރައްޔިތުންނާ ދެކޮޅަށް އިސްވެ އުދުވާންތައް ފެށީ އިސްރާއީލުންކަމާއި ފަލަސްތީނުގެ އަންހެނުންނާއި ކުޑަކުދިންވެސް ހިމެނޭގޮތުން އެތައް ބަޔަކު ޝަހީދުކޮށްލާފައިވާ ކަން ދުނިޔޭގެ ގިނަބަޔަކު ގަބޫލުކުރެއެވެ. އެހެންވެ ދުނިޔޭގެ ވަރަށް ގިނަ ގައުމުތަކުގައި ފަލަސްތީނުގެ ރައްޔިތުންނާ އެއްބައިވާކަން ފަޅުކުރުމަށާއި އިސްރާއީލުގެ އުދުވާން ކުށްވެރި ކުރުމުގެ ގޮތުން ހިނގާލުންތަކާއި އެއްވުންތައް ދަނީ ބައްވަމުންނެވެ.

ހަމާސް އިން އިސްރާއީލަށް އަމާޒުކޮށް ރޮކެޓު ހަމަލާ ދިނީ އިސްރާއީލުގެ ސިފައިން އަގްސާ މިސްކިތަށް ވަދެ، ނަމާދު ކުރަން ތިބި މީހުންނަށް ފުރައްސާރަކޮށް، ކަރުނަ ގޭސް ޖަހައި، ސްޓަން ގްރެނޭޑު އުކި ފަހުންނެވެ.