ފަލަސްޠީނުގެ މިނިވަން ކަމަށް މަސައްކަތް ކުރަމުން އަންނަ ހަމާސް ޖަމާއަތުގެ، ހަތިޔާރުގެ ބާެރުވެރިކަން އޮވެގެން ނުވާނެ ކަމަށް ފްރާންސްގެ ފޮރިން މިނިސްޓަރު ޖީން ނޮއެލް ބަރޮޓް ވިދާޅުވެއްޖެ އެވެ.

ބަރޮޓް މިހެން ވިދާޅުވެފައި ވަނީ ހަމާސްގެ ބެލުމުގެ ދަށުގައި ތިބި އިސްރާއީލްގެ ރަހީނުންގެ ވީޑިއޯ ތަކެއް އާންމު ކޮށްފައި ވަނިކޮށެވެ. އެ ވީޑިއޯ ތަކުގައި ފެންނަނީ އިސްރާއީލްގެ ރަހީނުން ކޮންކްރީޓް ޓަނަލެއްގެ ތެރޭގައި ތިބޭ މަންޒަރެވެ. 

މީގެ ކުރިން މިދިޔަ ބުރާސްފަތި ދުވަހު ވެސް ވަނީ، އިސްލާމިކް ޖިހާދުގެ ހަތިޔާރު އެޅި ބާރުވެރިންގެ ފަރާތުން ވެސް، އިސްރާއީލީ-ޖަރުމަނު ރަހީނެއްގެ ވީޑިއޯ އާންމު ކޮށްފަ އެވެ.

ފްރާންސްގެ ފޮރިން މިނިސްޓަރު ބަރޮޓް ވިދާޅުވެފައި ވަނީ، ހަމާސް އިން ޣައްޒާގައި 666 ދުވަސް ވަންދެން ބަންދު ކޮށްފައި ތިބި އިސްރާއީލްގެ ރަހީނުންގެ ވީޑިއޯ އަކީ ނުބައި އަދި ބަލަން ކުޅަދާނަވާ ވާރުގެ މަންޒަރުތަކެއް ނޫން ކަމަށެވެ. 

ބަރޮޓް އޭނާގެ އެކްސް އެކައުންޓުގައި ކުރަށްވާ ފައިވާ ޕޯސްޓުގައި ވިދާޅުވެފައި ވަނީ، ހަމާސް އިން ރަހީނު ކޮށްފައިވާ އިސްރާއީލްގެ ރަހީނުން ވަގުތުން މިނިވަން ކުރަން ޖެހޭ ކަމަށެވެ. އަދި ހަމާސް ޖަމާއަތުގެ ހަތިޔާރު ނައްތާލައި، ޣައްޒާގައި ވެރިކަން ކުރުމުން ވެސް ހަމާސް އެއްކިބާ ކުރަން ޖެހޭ ކަމަށް ބަރޮޓް ވިދާޅުވެފައިވެ އެވެ. 

އިސްރާއީލްގެ އަސްކަރިއްޔާގެ އެންމެ އިސްވެރިޔާ، ލެފްޓިނެންޓް ޖެނަރަލް އެޔާލް ޒަމީރު ވިދާޅުވެފައި ވަނީ، ރަހީނުން މިނިވަން ކުރުމުގެ މަޝްވަރާތައް އަވަސް މުސްތަޤުބަލެއްގައި ކާމިޔާބު ނުވާ ނަމަ، ޣައްޒާގައި ހިންގަމުން އަންނަ ހަނގުރާމަ މަޑު ޖައްސައި ނުލާނެ ކަމަށެވެ.

ހަމާސް އިން ވަނީ އިސްރާއީލަށް ދިން ހަމަލާތަކުގައި 251 މީހަކު ރަހީނު ކޮށްފަ އެވެ. ހަނގުރާމަ ހުއްޓާލުމަށް ކުރި މަޝްވަރާތަކުގައި ހަމާސް އިން ވަނީ އޭގެ ތެރެއިން ގިނަ ބަޔަކު މިނިވަން ކޮށްފަ އެވެ. ނަމަވެސް މިވަގުތު ހަމާސްގެ ބެލުމުގެ ދަށުގައި 50 ރަހީނުން ތިބިއިރު، އޭގެ ތެރެއިން ދުނިޔޭގައި ތިބީ 20 މީހުން ކަމަށް އެކި އެކި މަސްދަރު ތަކުން ވަނީ ހާމަކޮށްފަ އެވެ. 

ޣައްޒާ ހަނގުރާމައިގައި މިހާތަނަށް 60،000 އަށް ވުރެ ގިނަ މީހުން އިސްރާއީލްގެ އަސްކަރިއްޔާ އިން ޝަހީދު ކޮށްލާފައިވާއިރު، އިސްރާއީލްގެ ހަމަލާތަކުގައި އެތައް ބަޔަކަށް ވަނީ އަނިޔާވެފަ އެވެ. ޝަހީދުވެފައިވާ މީހުންގެ ތެރޭގައި ގިނަ އަދަދެއްގެ އަންހެނުންނާއި ކުޑަ ކުދިން ހިމެނޭ ކަމަށް ޣައްޒާގެ އިދާރާ ތަކުން ވަނީ ހާމަކޮށްފަ އެވެ. 

ޣައްޒާ އަށް ހަމަލާތައް ދިނުމުގެ އިތުރުން، އިސްރާއީލް އިން ވަނީ ޣައްޒާ އަށް ބޭނުންވާ އިންސާނީ އެހީ އާއި، ކާބޯ ތަކެތި އެތެރެ ކުރުމަށް ވެސް ވަަރަށް ބޮޑަށް ދަތި ކޮށްފަ އެވެ. އެކަމުގެ ސަބަބުން ޣައްޒާގައި އިންސާނީ ބޮޑު ކާރިސާއެއް ކުރިމަތި ވެދާނެ ކަމުގެ އިންޒާރު ބައިނަލްއަޤުވާމީ އިދާރާ ތަކުން އަންނަނީ ދެމުންނެވެ.

މިވަގުތު ވެސް ޣައްޒާގައި ބަނޑު ހައި ހޫނުކަން ބޮޑުވެ، ބަނޑު ހައި ހޫނު ކަމުގައި ގިނަ ބަޔަކު ވަނީ ޝަހީދުވެފަ އެވެ. ބަނޑު ހައި ހޫނު ކަމުގެ ސަބަބުން ގިނަ އަދަދެއްގެ ކުޑަ ކުދިންގެ ޙާލަތު ދަށްވެފައިވާއިރު، ޝަހީދު ވަމުން އަންނަ ކުދިން ވެސް އަދަދު ވެސް ވަނީ އިތުރުވެފަ އެވެ.