ފަލަސްޠީނިއަން ރެޑް ކްރެސެންޓުގެ މައި މަރުކަޒަށް އިސްރާއީލްގެ އަސްކަރިއްޔާ އިން ދިން ހަމަލާގައި، އެ އިދާރާގެ މުވައްޒަފަކު ޝަހީދުވެފައިވާ ކަމަށް ހާމަ ކޮށްފި އެވެ.

ފަލަސްޠީނިއަން ރެޑް ކްރެސެންޓް ސޮސައިޓީ (ޕީއާރްސީއެސް) އިން އާދިއްތަ ދުވަހު ބުނެފައި ވަނީ، ޣައްްޒާގެ ޚާން ޔުނިސްގައި ހުންނަ އެ ޖަމިއްޔާގެ މައި އޮފީހަށް އިސްރާއީލްގެ އަސްކަރިއްޔާ އިން ހަމަލާގައި އެ އިދާރާގެ މުވައްޒަފަކު ޝަހީދުވެފައިވާ ކަމަށެވެ. 

މީގެ އިތުރުން އެ ހަމަލާގައި އިތުރު ތިން މުވައްޒަފަކަށް އިތުރު އަނިޔާ ތަކެއް ލިބިފައިވާ ކަމަށް ވެސް ވަނީ ހާމަކޮށްފަ އެވެ. އެ ހަމަލާގައި އިމާރާތުގެ ފުރަތަމަ ފަންގިފިލާ ގައި އަލިފާން ރޯވެފައިވާ ކަމަށް ވެސް، ޕީއާރްސީއެސް އިން ވަނީ ހާމަކޮށްފަ އެވެ. އަދި ހަމަލާގެ ފުރަތަމަ ވަގުތު ތަކުގެ ވީޑިއޯއެއްގައި އަލިފާން ރޯވެ، ތަޅު ވަޅު ގަނޑު ތަކުން ފުރިފައިވާ މަންޒަރު ފެންނަން ހުއްޓެވެ.

އިސްރާއީލް އިން ހަމަލާ ދީ، މި ހާދިސާ ހިނގާފައި ވަނީ އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު ސްޓީވް ވިކްޓޮފް، އެމެރިކާގެ އެހީގެ މަރުޒަކަށް ޒިޔާރަތް ކުރިތާ ދެ ދުވަސް ފަހުންނެވެ. 

އދ އިން ވަނީ ޣައްޒާ ބަނޑުހައި ހޫނު ކަމުގެ ބޮޑު ކާރިސާ އަކަށް ވެއްޓިދާނެ ކަމުގެ ނުރައްކާ ބޮޑުވެފައިވާ ކަމަށް ހާމަކޮށްފަ އެވެ. އަދި ޣައްޒާގައި މިހާރު އޮތް ޙާލަތު ބަަދަލުކޮށް، ޣައްޒާ އަށް ބޭނުންވާ އިންސާނީ އެހީ ފޯރުކޮށްދިނުމުގެ މުހިންމުކަން ވެސް އދ އާއި ބައިނަލްއަޤުވާމީ ޖަމިއްޔާ ތަކުން އަންނަނީ ފާހަގަ ކުރަމުންނެވެ. 

މިއަހަރުގެ މާޗު މަހުގެ ތެރޭގައި ދެކުނު ޣައްޒާގައި އިސްރާއީލް އިން ދިން ހަމަލާއެއްގައި ރެޑް ކްރެސެންޓުގެ އަށް މުވައްޒަފުންނާއި، ސިވިލް ޑިފެންސްގެ ހަ މުވައްޒަފުން އަދި އދ ގެ ފަލަސްޠީނިއަން ރެފިއުޖީ އެޖެންސީގެ އެއް މުވައްޒަފަކު ވެސް ވަނީ ޝަހީދުވެފަ އެވެ. 

އިސްރާއީލް އިން ޣައްޒާގައި ހިންގަމުން އަންނަ ލާއިންސާނީ ޖަރީމާ ތަކުގައި އަންނަނީ، ޣައްޒާގައި މަސައްކަތް ކުރަމުން އަންނަ އިންސާނީ އެހީގެ ޖަމިއްޔާތުގެ މުވައްޒަފުންނާއި، ކުއްލި ނުރައްކަލުގެ ޚިދުމަތް ދެމުން އަންނަ ފަރާތްތަކުގެ އިތުރުން، ނޫސްވެރިންނަށް އަމާޒުކޮށް ވެސް ހަަމަލާ ދެމުންނެވެ.