އިސްރާއީލުން ގާޒާއަށް ދެމުންދާ އުދުވާނީ ހަމަލާތައް ސައުދީން ކުށްވެރިކޮށްފި
16 މެއި 2021 | އާދީއްތަ 15:11ބައިނަލްއަގުވާމީ މުޖުތަމައުން ފިޔަވަޅު އަޅަންޖެހޭ ކަމަށް ވަނީ ބުނެފައި
ގާޒާގައި ޝަހީދުވީ މީހުންގެ އަދަދު 188ށް ވަނީ އަރާފައި
އިސްރާއީލުން ފަލަސްތީނުގެ ރައްޔިތުންނަށް އަމާޒުކޮށް ގާޒާއަށް ދެމެން ގެންދާ އުދުވާނީ ހަމަލާތައް ސައުދީ އަރަބިޔާއިން ކުށްވެރިކޮށްފިއެވެ.
ސައުދީ ފޮރިން މިނިސްޓަރ ވިދާޅުވީ، އިޒްރޭލުން ދެމުންދާ ލާއިންސާނީ ހަމަލާތައް ހުއްޓުވަން ދުނިޔޭގެ އެހެން ގައުމުތަކުން އަވަސް ފިޔަވަޅުތަކެއް އަޅަން ޖެހޭ ކަމަށެވެ. ޕްރިންސް ފައިސަލް ބިން ފަރްހާން އަލްސައުދު މިހެން ވިދާޅުވީ، ފަލަސްތީނާއި އިސްރާއީލްގެ މައްސަލައާ ގުޅޭގޮތުން އާދީއްތަ ދުވަހު ބޭއްވި އޮަގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ ބައްދަލުވުމުގައެވެ. 57 ގައުމުގެ ޚާރިޖީ ވަޒީރުންނާއެކު މިބައްދަލުވުން ކުރިއަށްގެންދިޔައީ ވާރޗުއަލް ކޮށެވެ.
އިސްރާއީލުން ބުނަނީ ހަމަލާދެނީ ހަމާސް ޖަމާއަތުން އިސްވެ އިސްރާއީލަށް ހަމަލާދޭން ފެށުމުން ކަމަށެވެ.
ސައުދީ ފޮރިން މިނިސްޓަރ ވަނީ ގާޒާގެ އާއްމު ރައްޔިތުންގެ ގެދޮރަށް ދެމުން އަންނަ ހަމަލާތައް ވަރަށް ބޮޑަށް ކުށްވެރިކުރައްވާފައެވެ. ބައިނަލްއަގުވާމީ މުޖުތަމައުން މި ނުރައްކާތެރި އަމަލު ހުއްޓުވުމަށް އަލް ސައުދުވަނީ ގޮވާލައްވާފައެވެ.
އިސްރާއީލުން ދެމެންދާ އުދުވާނީ ހަމަލާތަކުގައި ފަލަސްތީނުގެ 188 މީހުން ވަނީ މިހާތަނަށް ޝަހީދުވެފައެވެ. މީގެ ތެރޭގައި 47 ކުުޑަކުދިންވެސް ހިމެނެއެވެ.
