އިޒްރޭލުން ފަލަސްތީނަށް ދެމުންދާ ހަމަލާތައް ކުއްވެރިކޮށް ލަންޑަންގެ މަގުތަކަށް އެތައް ހާސް ބަޔަކު އެއްވެއްޖެއެވެ.

އިސްރާއީލުން މެދުކެނޑުމެއްނެތި ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ އުދުވާނާއި ދެކޮޅަށް ޝުޢޫރު ފާލުކުރުމަށް، އިގިރޭސިވިލާތުގެ ސެންޓްރަލް ލަންޑަންގެ މަގުތަކަށް އެތައްހާސް ބަޔަކު ޖަމާވެ މިދިޔަ ހަފުތާގައިވެސް މުޒާހަރާ ކޮށްފައިވެއެވެ. މުޒާހަރާ ކުރާ މީހުން ގޮވަމުންދަނީ، އިސްރާއީލު ސިފައިން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ އިންސާނިއްޔަތާ ޚިލާފު ޖަރީމާތައް ހުއްޓުވުމަށް އިނގިރޭސި ސަރުކާރުން ވަގުތުން ވަގުތަށް ފިޔަވަޅު އެޅުމަށެވެ.

ހޮނިހިރު ދުވަހުގެ މެންދުރު، އެތައްހާސް މީހުންނެއް ވަނީ، ފަލަސްތީނު މިނިވަން ކުރުމަށް ގޮވާލާ ޝުޢޫރު ފާޅުކުރަމުން، ސެންޓްރަލް ލަންޑަނުގެ ހައިޑް ޕާރކް ސަރަހައްދުން ފެށިގެން ހިނގާލުން ކުރިޔަށް ގެންގޮސްފައެވެ. އަދި މުޒާހަރާގެ ބައިވެރިން މަޑުކޮށްފައިވަނީ، ލަންޑަނުގެ ކެންސިންޓަންގައި ހުންނަ އިސްރާއީލު އެމްބަސީގެ ކުރިމަތީގައެވެ.

މި މުޒާހަރާ އިންތިޒާމްކުރި ފަރާތްތަކުން ބުނެފައިވަނީ، ކެންސިންޓަންގައި ހުންނަ އިސްރާއީލް އެމްބަސީ ކުރިމައްޗަށް އެއްވި މުޒާހިރާގެ ބައިވެރިންގެ އަދަދު 100،000އަށް އަރާކަމަށެވެ. ފަލަސްތީނުގެ ބިންތައް އިސްރާއީލުން ފޭރިގެންފައިވާ ކަމަށާއި، އެއީ ބައިންލްއަގުވާމީ ގާނޫނުތަކާއި ޚިލާފު ކަމެއް ކަމަށް މުޒާހަރާގެ ބައިވެރިން ގޮވަމުން ދިޔައެވެ.