ޗެލްސީ ބަލިކޮށް އާސެނަލަށް އުއްމީދެއް

އިނގިރޭސި ޕްރިމިއާ ލީގުގައި ބުދަ ދުވަހުގެރޭ ޗެލްސީ ބަލިކޮށް އާސެނަލުން އަންނަ ސީޒަނުގައި ޔޫރަޕުގެ ޖާގައެއް ހޯދުމުގެ އުއްމީދު އާކޮށްފިއެވެ.

ޗެލްސީގެ ދަނޑުގައި ކުޅުނު ޑާބީ މެޗުން އާސެނަލް މޮޅުވީ 1-0 ގެ ނަތީޖާއަކުންނެވެ.

މި މެޗަށް ޗެލްސީ ނުކުމެފައިވަނީ އެ ޓީމުގެ ފުރަތަމަ އެގާރައަށް ބައެއް ބަދަލުތައް ގެނެސްގެންނެވެ. މި މެޗުގެ ވަރަށް ކުރީކޮޅު ޗެލްސީގެ ކައި ހަވާޓްޒްއަށް ހުސް ފުރުސަތެއް ލިބުނު ނަމަވެސް، ހުހަށްހުރެ އޭނާ ފޮނުވާލި ބޯޅަ ދިޔައީ ގޯލާ އަމާޒުނުވެއެވެ. އެއާއެކު މެޗުގެ 16 ވަނަ މިނެޓުގައި އާސެނަލުން ވަނީ ލީޑު ނަގާފައެވެ. ޗެލްސީގެ ޖޯޖީނިއޯ ހެދި ގޯހެއްގެ ފައިދާ ނަގައި މި ލަނޑު އާސެނަލަށް ކާމިޔާބުކޮށްދިނީ އެމީލް ސްމިތު-ރޯއެވެ.

އޭގެ ފަހުން ފުރަތަމަ ހާފުގައި ޗެލްސީގެ މޭސަން މައުންޓް ފޮނުވާލި ދެ ހަމަލާއެއް އާސެނަލުގެ ޑިފެންޑަރުންނާއި ގޯލްކީޕަރު ބާން ލެނޯ ވަނީ ހުއްޓުވާފައެވެ. އަދި ދެވަނަ ހާފުގައި ޗެލްސީގެ ކްރިސްޓިއަން ޕުލިސިޗް ލަނޑެއް ޖެހި ނަމަވެސް، ވީޑިއޯ އެސިސްޓަންޓް ރެފުރީ (ވީއޭއާރް) އިން ބެލުމަށް ފަހު ވަނީ އެ ލަނޑު އޮފްސައިޑް ކަމަށް ނިންމާފައެވެ.

މި މޮޅާއެކު އާސެނަލް ވަނީ ލީގު ތާވަލުގެ އަށްވަނައަށް ޖެހިލާފައެވެ. އެގޮތުން އެ ޓީމަށް ކުޅުނު 36 މެޗުން 55 ޕޮއިންޓް ލިބިފައިވާއިރު، ނުވަވަނައިގައި އޮތް އެވަޓަނަށް 34 މެޗުން ލިބިފައިވަނީ 55 ޕޮއިންޓެވެ. އަދި މި މެޗުން މޮޅުވެގެން ތާވަލުގެ ތިންވަނައަށް އެރުމުގެ ފުރުސަތު ޗެލްސީއަށް އޮތް ނަމަވެސް، މެޗުން ބަލިވުމާއެކު އެ ޓީމު އޮތީ ހަތަރުވަނައިގައެވެ. ތާވަލުގެ ތިންވަނައިގައި އޮތް ލެސްޓާ ސިޓީއަށް 36 މެޗުން 66 ޕޮއިންޓް ލިބިފައިވާއިރު، ހަތަރުވަނައިގައި ޗެލްސީ އޮތީ 36 މެޗުން 64 ޕޮއިންޓާއެކުއެވެ.