އިންޑިޔާގައި ކޮވިޑްގެ ހާލަތު ގޯސްވުމަށް މެދުވެރިވި ވޭރިއަންޓް މިހާރު މުޅި ދުނިޔޭގެ 44 ގައުމަކުން ފެނިފައިވާކަމަށް ދުނިޔޭގެ ސިއްހަތު ޖަމުޢިއްޔާ (ޑަބްލިޔުއެޗްއޯ)އިން ބުނެފިއެވެ.

ބުދަ ދުވަހު އެޖަމުޢިއްޔާއިން ބުނީ އިންޑިޔާއިން ފެނިފައިވާ ވޭރިއަންޓް ބީ.ވަން.ސިކްސްވަންސެވެން ގެ 4500 ސާމްޕަލެއް މިހާތަނަށް އައިއިރު ޑަބްލިޔުއެޗްއޯގެ ޑާޓާބޭސް އަށް އަޕްލޯޑްކޮށްފައިވާ ކަމަށެވެ. މިވޭރިއަންޓް އެންމެ ފުރަތަމަ ފެނިފައިވަނީ މިދިޔަ އަހަރުގެ އޮކްޓޯބަރ މަހުއެވެ.

މީގެއިތުރުން ޑަބްލިޔުއެޗްއޯއިން ބުނީ އިންޑިޔާއިން ބޭރުން މިވޭރިއަންޓް އެންމެ ގިނައިން ފެނިފައިވަނީ އިނގިރޭސިވިލާތުން ކަމަށެވެ. މިހަފްތާގެ ކުރީކޮޅު ޑަބްލިޔުއެޗްއޯއިން ވަނީ މިވޭރިއަންޓަކީ "ވޭރިއަންޓް އޮފް ކޮންސަރން"ގެ ގޮތުގައި ކަނޑައަޅާފައެވެ.

މިވޭރިއަންޓް އޭގެކުރިން ލޭބަލްކޮށްފައިވަނީ "ވޭރިއަންޓް އޮފް އިންޓަރެސްޓް"ގެ ގޮތުގައެވެ. މާނައަކީ މާނައަކީ އެ ވޭރިއަންޓަކީ މިޔުޓޭޓްވުމުގައި ވައިރަސްގެ އެމިނޯ އެސިޑަށް ބަދަލުތަކެއް ގެނުވާ ވޭރިއަންޓެކެވެ. އަދި އެ ވޭރިއަންޓްގެ ސަބަބުން ކޮމިޔުނިޓީ ޓްރާންސްމިޝަން އަކަށްގޮސް އެތައް ކުލަސްޓަރ އެއް އެކި ގައުމުތަކަށް ފެނިފައިވެއެވެ. އަދި ޑަބްލިޔުއެޗްއޯގެ ކަމާބެހޭ ޓީމުން އެ ވޭރިއަންޓަށް ބަދަލުތައް އަންނަމުންދާ ގޮތް ބަލަމުންދާނެއެވެ.

"ވޭރިއަންޓް އޮފް ކޮންސަރން" ގައިވާ ވޭރިއަންޓްތަކަކީ ހަލުވިމުނުގައި ފެތުރެމުންދާ ވޭރިއަންޓްތަކެވެ. އަދި މި ވޭރިއަންޓްތަކަށް ވެކްސިނާއި އެންޓިބޮޑީން ކުރާ އަސަރު ކުޑައެވެ. 

އަނެއްކޮޅުން އިންޑިޔާ ވޭރިއަންޓްގެ ތިން މިޔުޓޭޝަނެއް ވެސް އުޅެއެވެ.

އިންޑިޔާ ވޭރިއަންޓް "ވޭރިއަންޓް އޮފް ކޮންސަރން"ގެ ލިސްޓަށް އެރުމާއެކު މިހާރު އެންމެ ކަންބޮޑުވާ ވޭރިއަންޓްތަކުގެ ގޮތުގައި ލިސްޓުކުރެވިފައިވަނީ އިންޑިޔާ ވޭރިއަންޓްގެ އިތުރުން އިނގިރޭސިވިލާތް، ބްރެޒިލް އަދި ދެކުނު އެފްރިކާ ވޭރިއަންޓެވެ.

މިވޭރިއަންޓްތަކަކީ ކޮވިޑް-19ގެ އަސްލު ވައިރަސްއަށް ވުރެ ހަލުވި މިނުގައި ފެތުރޭ ނުރައްކާތެރި ވޭރިއަންޓްތަކެކެވެ. ޑަބްލިޔުއެޗްއޯއިން ހާމަކޮށްފައިވާ ގޮތުގައި މިހާތަނަށް ފެނިފައިވާ ހެކިތަކަށް ބަލާއިރު މިވޭރިއަންޓަށް އެންޓިބޮޑީން ކުރާ އަސަރު ހުންނަނީ ވަކި މިންވަރެއްގައި ހިފެހެއްޓިފައެވެ. މިވޭރިއަންޓް ފެނިފައިވަނީ ފަހުން ކަމަށްވާތީވެ އަދި ވެކްސިނުން ކުރާ އަސަރު ރަނގަޅަށް ދެނެގަނެވޭނެ ފަދަ ދިރާސާތަކެއް ކުރެވިފައެއްނުވެއެވެ.

ޑަބްލިޔުއެޗްއޯއިން ބުނާގޮތުގައި އިންޑިޔާ ވޭރިއަންޓްގެ އިތުރުން އެހެން ވޭރިއަންޓްތަކަކީ އިންޑިޔާގެ ހާލަތު ގޯސްވުމަށް މަގިފަހިކުރުވި ކަންތައްތަކެވެ.

1.35 ބިލިއަން މީހުން ދިރިއުޅޭ އިންޑިޔާއަކީ އެމެރިކާ އަށް ފަހު އެންމެ ގިނަ އަދަދެއްގެ މީހުންނަށް ވައިރަސް ޖެހެމުން އަންނަ ގައުމެވެ. އެގޮތުން އެގައުމުގައި މިހާތަނަށް 23 މިލިއަން މީހުންނަށް ކޮވިޑް ޖެހިފައިވާއިރު ދުވާލެއްގެ މައްޗަށް ކޮވިޑް ޖެހޭ މީހުންގެ އަދަދު މިހާރު އުޅެނީ ތިންލައްކައިން މަތީގައެވެ. އަދި ކޮންމެ ދުވަހަކު ހަތަރުހާހާ ގާތްކުރާ އަދަދަކަށް މީހުން އަންނަނީ މަރުވަމުންނެވެ.

ވޭރިއަންޓްތަކުގެ އިތުރުން އެގައުމުގައި ބޭއްވި ދީނީ އަދި ސިޔާސީ ބޮޑެތި އެއްވުންތަކަކީ ވެސް ކޮވިޑްގެ ކޭސްތައް އިތުރުވުމަށް މަގުފަހިކުރުވި ސަބަބުތަކެވެ. ނަމަވެސް މިއިން ކޮންމެ ކަމަކުން ކޭސްތައް އިތުރުވެފައިވަނީ ކިހާ މިންވަރަކަށް ކަމެއް ހޯދިފައެއްނުވެއެވެ.

ޑަބްލިޔުއެޗްއޯއިން ބުނާގޮތުން މިހާތަނަށް އައިއިރު އިންޑިޔާއިން ފެނިފައިވާ ކޭސްތަކުގެ ތެރެއިން ޖެނެޓިކް ސީކުއެންސް އަޕްކޮށްފައިވަނީ އެންމެ 0.1 އިންސައްތަ ޓެސްޓްގެއެވެ. ޑަބްލިޔުއެޗްއޯގެ ޑާޓާބޭސް އަށް އަޕްލޯޑްކޮށްފައި ހުންނަ ވައިރަސްގެ ޖެނެޓިކް ސީކުއެންސް ބަލައިގެން ވޭރިއަންޓަތައް ދެނެގަތުމުގެ މަސައްކަތް ކަމާބެހޭ މާހިރުން ކުރެއެވެ.