ޕޮޒިޓިވްވި މީހުންގެ އަދުދު 1200ން މައްޗަށް، އެކްޓިވް ކޭހުގެ އަދަދު 10،000ން މައްޗަށް

ފާއިތުވި 24 ގަޑިއިރުތެރޭ ކޮވިޑް ބައްޔަށް ރާއްޖެއިން 1200 އަށް ވުރެ ގިނަ މީހުން ޕޮޒިޓިވް ވެއްޖެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)ން ހޯމަ ދުވަހު ހާމަކުރި ތަފާސްހިސާބުތައް ދައްކާ ގޮތުން 24 ގަޑިއިރުގެ ތެރޭގައި 5،598 ސާމްޕަލެއް ވަނީ ނަގާފައެވެ. އޭގެ ތެރެއިން 1204 މީހުން ޕޮޒިޓިވްވެފައިވާއިރު، ހަމައެކަނި މާލެ ސަރަހައްދުން 961 މީހުން ޕޮޒިޓިވްވެފައި ވެއެވެ. އަދި އަތޮޅުތެރޭގެ ރަށްރަށުން 235 މީހުން ޕޮޒިޓިވް ވެފައި ވެއެވެ. މީގެ އިތުރުން ރިސޯޓުތަކުން 09 މީހުން ޕޮޒިޓިވް ވެފައިވެއެވެ.

10376 އެކްޓިވް ކޭސް ހިމެނޭއިރު، 244 މީހަކަށް ހޮސްޕިޓަލްގައި ފަރުވާ ދެމުންދާ ކަމަށް އެޗްޕީއޭއިން ބުނެއެވެ.

ރާއްޖޭގައި ބަލިޖެހުނު މީހުންގެ ޖުމްލަ އަދަދު މިހާރު ވަނީ 37،019އަށް އަރާފައެވެ. އޭގެތެރެއިން 26،547 މީހުން ބަލިން ރަނގަޅު ވެފައި ވާއިރު، 87 މީހުން ވަނީ ނިޔާވެފައެވެ.

ރާއްޖޭގެ ކޭހުގެ އަދަދު މިހާ މައްޗަށް ގޮސްފައިވާއިރު މަރުވާ މީހުންގެ އަދަދުވެސް ދަނީ އިތުރުވަމުންނެވެ. އެއާއެކު ރާއްޖޭގައި އިންޑިއާގައި ފެތުރެމުންދާ ކޮވިޑް-19 ވޭރިއަންޓް އުޅުން އެކަށީގެންވާ ކަމަށް އެޗްޕީއޭއިން ބުނެފައިވެއެވެ. އެހެންކަމުން ރާއްޖެ އަންނަ އެންމެންވެސް ވަކި ފިޔަވަޅުތަކެއްގެ ތެރެއިން ރާއްޖެ އެތެރެވެވޭ ގޮތަށް ހަރުކަށި ފިޔަވަޅުތަކެއް އަޅާފައިވެއެވެ. އެއްރަށުން އަނެއް ރަށަށް ދަތުރުކުރުން ވެސް ވަނީ މަނާކޮށްފައެވެ.

މާލެ ސަރަހައްދުގައި ވެސް ފިޔަވަޅުތައް ވަރުގަދަކޮށް ސްކޫލްތަކާއި އޮފީސްތައް ވަނީ ބަންދުކޮށްފައެވެ. ރޭގަނޑު 9ން ފެށިގެން ފަތިހު 4ށް ކާފިއު ވެސް ވަނީ އިއުލާން ކޮށްފައެވެ. އެކަމަކު ކޭސްތައް ދުވަހުން ދުވަހަށް މައްޗަށް ގޮސް ލޮކްޑައުނަކަށް ދިޔުމާއި މެދު މަޝްވަރާކުރަމުން ދާކަމަށް ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒު ވަނީ ވިދާޅުވެފައެވެ.