އިންޑިއާގައި މިހާރު ފެތުރެމުންދާ ކޮވިޑުގެ ވޭރިއެންޓަކީ "ވޭރިއެންޓް އޮފް ކޮންސަރން" އެއް ކަމަށް ދުނިޔޭގެ ސިއްހަތު ޖަމިއްޔާއިން ކަނޑައަޅައިފިއެވެ.
ދުނިޔޭގައި މިހާރު ފެތުރޭ ކޮވިޑް-19ގެ ވޭރިއެންޓްތައް މޮނީޓަރުކުރުމުގެ މަސައްކަތް ދުނިޔޭގެ ސިއްހަތު ޖަމިއްޔާއިން ދަނީ ކުރަމުންނެވެ. އެގޮތުން ވޭރިއެންޓްތަކުގެ ނުރައްކަލަށް ބަލާ ތިން ގިންތިއަކަށް ވޭރިއެންޓްތައް ވަނީ ބަހާފައެވެ. އެގޮތުން ވޭރިއެންޓްގެ ނުރައްކާ އެހާ ބޮޑު ނޫން އެހެނަސް ދިރާސާކުރަންޖެހޭ ވޭރިއެންޓް "ވޭރިއެންޓް އޮފް އިންޓްރެސްޓް" ގިންތިއަކީ ފުރަތަމަ ގިންތިއެވެ. ވޭރިއެންްޓެގެ ނުރައްކާ ބޮޑުވެ އެނދުމަތިކޮށް މަރުވާ އަދަދު ގިނަވާނަމަ ދެ ގިންތިއަކަށް ވޭރިއެންޓް ބެހެއެވެ. އެގޮތުން ފުރަތަމަ ދަރަޖައަކީ "ވޭރިއެންޓް އޮފް ކޮންސަރން"ގެ ގިންތިއެވެ. އަދި އެންމެ ނުރައްކާތެރި ގިންތިއަކީ "ވޭރިއެންޓް އޮފް ހައި ކޮންސިކުއެންސް" ގިންތިއެވެ.
މިހާތަނަށް އައިރު ދުނިޔޭގެ ސިއްޙަތު ޖަމިއްޔާއިން 6 ވޭރިއެންޓެއް "ވޭރިއެންޓް އޮފް އިންޓްރެސްޓް"ގައި ހިމަނާފައިވެއެވެ. އިންޑިއާގައި މިހާރު ފެތުރެމުންދާ ވޭރިއެންޓް "ވޭރިއެންޓް އޮފް ކޮންސަރން"އެއް ގެ ގޮތުގައި ކަނޑައެޅުމުން މި ގިންތީގައި މިވަގުތު 7 ވޭރިއެންޓެއް ހިމެނެއެވެ. އިންޑިއާގައި އަލަށް ފެތުރެމުންދާ ވޭރިއެންޓްގެ އިތުރުން އިނގިރޭސިވިލާތް، އެމެރިކާ، ޖަޕާން، ބްރެޒިލް އަދި ދެކުނު އެފްރިކާގައި ފެތުރެމުންދާ ވޭރިއެންޓްތަކެއް ވެސް މިގިންތީގައި ވަނީ ހިމަނާފައެވެ. މިހާތަނަށް އައިރު އެންމެ ނުރައްކާތެރި ގިންތިކަމުގައިވާ "ވޭރިއެންޓް އޮފް ހައި ކޮންސިކުއެންސް" ގައި އެއްވެސް ވޭރިއެންޓެއް ހިމަނާފައެއް ނުވެއެވެ.
އިންޑިއާ އިން ފެނިފައިވާ ކޮވިޑް-19 ގެ ވޭރިއެންޓް 17 ގައުމަކުން ފެނިފައިވާ ކަމަށް ދުނިޔޭގެ ސިއްހަތު ޖަމްއިއްޔާއިން މީގެ ކުރިން ވަނީ ބުނެފައެވެ. ޔޫއެން ހެލްތް އެޖެންސީއިން ބުނީ ބީ.1.617 ވޭރިއެންޓް ފުރަތަމަ ފެނިފައިވަނީ އިންޑިއާއިން ކަމަށާއި މިހާރު މި ވޭރިއެންޓް 17 ގައުމަކުން ފެނިފައިވާ ކަމަށެވެ. ވައިރަސް ޑެޓާބޭސްއިން ދައްކާގޮތުން އެންމެ ގިނައިން އެ ވޭރިއެންޓް ފެނިގެން ރިޕޯޓު ކޮށްފައިވަނީ އިންޑިއާ އާއި، އެމެރިކާ، އަދި އިނގިރޭސި ވިލާތުންނާއި ސިންގަޕޫރުންނެވެ.
އިންޑިއާގައި މިހާރު ރިކޯޑް އަދަދަކަށް މީހުން ދަނީ ކޮވިޑަށް ޕޮޒިޓިވްވަމުންނެވެ. އޭގެ ތެރޭގައި ޒުވާނުންނާއި ކުޑަކުދިން ވެސް ގިނަ އަދަދަކަށް ހިމެނޭ ކަމަށް ރިޕޯޓުތައް ބުނެއެވެ. އިންޑިއާއިން ފެނިފައިވާ މި ވޭރިއެންޓަކީ ހުރިހާ އުމުރަކަށް ވެސް ނުރައްކާ ވޭރިއެންޓެއް ކަމަށާއި މި ވޭރިއެންޓުގައި ޒުވާނުންނަށް ބަލި ޖެހި ފަރުވާ ހޯދަން ވެސް ޖެހިފައިވާ ކަމަށް ރިޕޯޓުތައް ބުނެއެވެ. ލަންކާގައި ވެސް ކޮވިޑް ފެތުރެން ފަށާފައިވާއިރު އިންޑިއާގައި ފެތުރެމުންދާ ވޭރިއެންޓަށް އެ ވެދާނެ ކަމުގެ ކަންބޮޑުވުން ސިއްހީ މާހިރުން ފާހަގަ ކޮށްފައިވެއެވެ.
އިންޑިއާ އިން މިހާރު ރިކޯޑު އަދަދަކަށް މީހުން ކޮވިޑަށް ފައްސި ވަމުންދާ އިރު، އިއްޔެވެސް އެގައުމުން 360،927 މީހުން ފައްސިވެފައި ވެއެވެ. މުޅި ދުނިޔެއިން 3.1 މިލިއަނަށް ވުރެ ގިނަ މީހުން ކޮވިޑުގައި ވަނީ މަރުވެފައެވެ. ދުނިޔޭގެ ސިއްހަތު ޖަމްއިއްޔާއިން ބުނެފައިވަނީ ފުރަތަމަ ރާޅަށް ވުރެ ކޮވިޑުގެ ފަހުގެ ރާޅުތަކުގައި މީހުން ޕޮޒިޓިވްވަމުންދާވަރު ގިނަ ވެފައި ވައިރަސް ފެތުރެމުންދާ ބާރުމިން ހަލުވިވެފައިވާކަމަށެވެ.
