އިންޑިޔާގެ ގަންގާ ކޯރުގެ އައްސޭރިފަށުގެ ސަރަހައްދުތަކުން މަރުވެފައިވާ ހަށިތައް ފެންނަން ފަށައިފިއެވެ.
ބީބީސީގައި ރިޕޯޓުކޮށްފައިވާ ގޮތުން ހޯމަ ދުވަހުގެ ވަގުތެއްގައި، ބިހާރު ސްޓޭޓާއި، އުއްތަރު ޕްރަދޭޝް ގުޅޭ ބޯޑަރު ކައިރިން 40ށް ވުރެ ގިނަ ހަށިގަނޑުވަނީ ފެނިފައެވެ. ރިޕޯޓުތައް ބުނާގޮތުން 100ށް ވުރެ ގިނަ މިކަހަލަ ހަށިގަނޑު މިހާތަނަށް ވަނީ ފެނިފައެވެ. ހަށިތައް ފެންނައިރު، ކޯރުގައި ގިނަ ދުވަސް ވުމުގެ ސަބަބުން ފޯވެ، ހަށިގަނޑުގެ ބައެއް ގެއްލިފައިވާ ކަމަށް ވެއެވެ.
"މި ހަށިތަކަކީ އުއްތަރު ޕްރަދޭޝްއިން އައިސްފައިވާ ހަށިތަކަކަށްވުން އެކަށީގެންވޭ" އޮފިޝަލުން ބުންޏެވެ.
އުއްތަރު ޕްރަދޭޝަކީ އިންޑިއާގެ އެއްމެ އާބާދީ ބޮޑު ސްޓޭޓެވެ. އިންޑިއާގައި ކޮވިޑްގެ ހާލަތު ގޯސްވެ، މަރުވާ މީހުންގެ އަދަދު އެއްދުވަހުން އަނެއް ދުވަހަށް އަންނަނީ އިތުރުވަމުންނެވެ. އިންޑިއާ އޮތީ މިހާރު ވަރަށް ނާޒުކު ފައްތަރެއްގައެވެ. އިންޑިއާއެ ކޭސްތައް ދަށްކުރުމަށް ބޭނުންވާނީ، ވެކްސިން ޖަހާ މިންވަރު އިތުރު ކުރުން ކަމަށް ކަމާ ބެހޭ ފަރާތްތަކުން އަންނަނީ ބުނަމުންނެވެ.
