80 އިންސައްތަ އެނދު ފުރި، ހުޅުމާލެ ހޮސްޕިޓަލް ކޮވިޑް ފެސިލިޓީއަކަށް ބަދަލު ކުރަނީ
ހެންވޭރު މުނިހިޔާ އަދި ސޯޝަލް ސެންޓަރުގައި ރެންޑަމް ސާމްޕަލް ނެގުމުގެ އިންތިޒާމު ވަނީ ހަމަޖައްސާފައި
ހުޅުމާލެ ހޮސްޕިޓަލް
80 އިންސައްތަ އެނދު ފުރި، ހުޅުމާލެ ހޮސްޕިޓަލް ކޮވިޑް ފަރުވާއަށް ޚާއްސަކުރަން ނިންމާފައިވާކަން ހެލްތް އިމަޖެންސީ އޮޕަރޭޝަން ސެންޓަރ، އެޗްއީއޯސީއިން ހާމަކޮށްފިއެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން އެޗްޕީއޭގެ ޑިރެކްޓަރު އަހުމަދު ނާސިރު ވަނީ މާލެ ސަރަހައްދު ކޮވިޑް-19ގެ ކަންކަމަށް ތައްޔާރުކުރުމަށް ގެންނަ ބަދަލުތަކުގެ ތަފްސީލު ހިއްސާކޮށްފައެވެ. އެގޮތުން ހެންވޭރު މުނިހިޔާ އަދި ސޯޝަލް ސެންޓަރުގައި ރެންޑަމް ސާމްޕަލް ނެގުމުގެ އިންތިޒާމު ވަނީ ހަމަޖައްސާފައެވެ. މީގެ އިތުރުން މީގެކުރިން މާލޭގައި ސާމްޕަލް ނެގުމަށް ބޭނުންކުރި މާފަންނު މަދަރުސާ މިހާރު ފްލޫ ކްލިނިކަކަށް ވަނީ ބަދަލުކޮށްފައެވެ. މިގޮތައް ހަމަޖެއްސީ ސާމްޕަލްނަގަން ދުވާލެއްގެ މައްޗަށް 250ށް ވުރެ ގިނަ މީހުން އަންނަމުންދާތީމިކަން ހައްލުކުރުމުގެ ގޮތުންކަމަށް ނާސިރު ވިދާޅުވިއެވެ.
ރާއްޖޭގައި އަދި ވަކިން ޚާއްސަކޮށް މާލެ ސަރަހައްދުގައި ޕޮޒިޓިވްކޭސްތައް އިންތިހާއަށް ގިނަވާން ފެށުމުން ބެޑް ކެޕޭސިޓީ ފުރެމުންދާކަމަށް ނާސިރު ވިދާޅުވިއެވެ. އެގޮތުން މިވަގުތު މާލެ ސަރަހައްދުގެ ބެޑް ކެޕޭސިޓީއަކީ 293 ހޮސްޕިޓަލް އެނދުކަމުގައިވާއިރު، މީގެތެރެއިން 80 އިންސައްތަ ބޭނުންކުރަމުންދާކަމަށް ނާސިރު ވިދާޅުވިއެވެ. މި ސަބަބައްޓަކައި އެނދު އިތުރުކުރުމައްޓަކައި ހުޅުމާލެ މެޑިކަލް ފެސިލިޓީއަށް 30 އެނދު އިތުރުކުރުމަށް ވަނީ ނިންމާފައެވެ. މީގެ އިތުރުން ހުޅުމާލެ ހޮސްޕިޓަލް ޑައުންގްރޭޑްކޮށް ކޮވިޑަށް ޚާއްސަކުރުމަށް ވަނީ ނިންމާފައެވެ. އެގޮތުން އެ ހޮސްޕިޓަލްގެ ވަކިން އިންނަ އިމާރާތެއްގައި 120 އެނދުގެ ފެސިލިޓީއެއް ތަރައްޤީކުރުމަށް ވަނީ ނިންމާފައެވެ. މި ފެސިލިޓީގައި ހުޅުމާކެ ހޮސްޕިޓަލްގައި މިވަގުތު ހުރި 58 އެނދު ބޭނުންކުރާއިރު އައިސީޔޫ އެނދުވެސް ހުންނާނެކަމަށް ނާސިރު ވިދާޅުވިއެވެ.
ރާއްޖޭގައި ކޮވިޑް-19ގެ ކޭސްތައް އިތުރުވަމުންދާ ވަރަކަށް އައިސީޔޫތަކާއި، ހޮސްޕިޓަލައިޒްޑް ބެޑް ކެޕޭސިޓީ ފުރެން ގާތްވެފައިވާތީ އެނދު އިތުރުކުރުމުގެ މަސައްކަތް މެއި މަހު ކުރީކޮޅު ވަނީ ފަށާފައެވެ.
ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒް ވިދާޅުވީ ކޭސްތައް މިހާރު އިތުރުވަމުންދާ ވަރަށް ބަލައި އެނދުގެ އަދަދުތައް އިތުރުކުރަން ޖެހޭނެކަން ޔަގީންވާ ކަމަށެވެ. މިހާރު ވެސް ބައެއް ފެސިލިޓީތަކުގެ އެނދުތައް ފުރިފައިވާ ކަމަށާއި، އެނދު އިތުރުކުރުމުގެ މަސައްކަތްތައް މިހާރު ފަށާފައިވާ ކަމަށް ވިދާޅުވިއެވެ. މީގެ އިތުރަށް އައިސޮލޭޝަން ފެސިލިޓީތައް އިތުރުކުރުމަށް ވެސް މަސައްކަތްކުރަމުން އަންނަ ކަމަށް ވިދާޅުވިއެވެ.
މަބްރޫކް ވިދާޅުވީ ފަރުކޮޅުފުށި އައިސޮލޭޝަން ފެސިލިޓީ މިހާރު ގާތްގަނޑަކަށް ފުރިފައިވާ ކަމަށެވެ. އެހެންވެ މީގެ ކުރިން އައިސޮލޭޝަން ފެސިލީޓިއެއްގެ ގޮތުގައި ބޭނުންކޮށް ފަހުން ދޫކޮށްލާފައިވާ ވެލިދޫ އަނެއްކާ ވެސް ހުޅުވާ އައިސޮލޭޝަން ފެސިލިޓީގެ ގޮތުގައި ބޭނުންކުރަން ފަށާފައިވާކަމަށެވެ.
