ޕޮޒިޓިވްވާ މިންވަރު ދަށް ނުވެއްޖެނަމަ ކެފޭ ރެސްޓޯރެންޓްގެ އެތެރޭގައި ޚިދުމަތް ދިނުން ރޯދައަށްފަހު މެދުކަނޑާލަނީ
އަޅާފައިވާ ފިޔަވަޅުތަކުގެ ނަތީޖާ ކުރިއަށް އޮތް ހަފުތާއެއްހާ ދުވަހުގެ ތެރޭގައި އެނގޭނެކަމަށް ވިދާޅުވި
މާލޭގައި ހިންގާ ކެފޭއެއް
ޕޮޒިޓިވްވާ މިންވަރު ދަށް ނުވެއްޖެނަމަ ކެފޭ ރެސްޓޯރެންޓްގެ އެތެރޭގައި ޚިދުމަތް ދިނުން ރޯދައަށްފަހު މެދުކަނޑާލަންޖެހިދާނެކަމަށް ހެލްތް އިމަޖެންސީ އޮޕަރޭޝަން ސެންޓަރ (އެޗްއީއޯސީ)އިން ހާމަކޮށްފިއެވެ.
އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ރާއްޖެ އެމްވީއިން ކުރި ސުވާލަކަށް ޖަވާބުދެމުން ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒް ވަނީ ކޮވިޑް ކޭސްތައް ގިނަވުމުން އަޅާފައިވާ ފިޔަވަޅުތަކުގެ ނަތީޖާ ކުރިއަށް އޮތް ހަފުތާއެއްހާ ދުވަހުގެ ތެރޭގައި އެނގޭނެކަމަށެވެ. ކޭސް ލޯޑަށް ބަލައި މިވަގުތުވެސް ފިޔަވަޅުތައް އިތުރަށް ހަރުކަށިކުރުމަށް ވިސްނަވާކަން ހާމަކުރައްވާ މަބްރޫކްވަނީ، ރޯދައަށް ފަހު ކޭސް ލޯޑަށް ބަދަލު ނައިސްފިނަމަ ހަރުކަށި އިތުރު ފިޔަވަޅުތައް އަޅާނެކަމަށް ވިދާޅުވެފައެވެ. އެގޮތުން ކޭސްލޯޑް ދަށް ނުވެއްޖެނަމަ ކެފޭ ރެސްޓޯރެންޓްގެ އެތެރޭގައި ޚިދުމަތް ދިނުން ރޯދައަށްފަހު މެދުކަނޑާލަންޖެހިދާނެކަމަށް ވިދާޅުވިއެވެ. މިހާރުގެ ހާލަތައް ބަލާފައި ކޭސްތައް މަދުނުވެ އިތުރުވާތަން ފެންނާތީ، ފިޔަވަޅުތައް ހަރުކަށިކުރާނެ ކަމަށް ގިނަ ބަޔަކު ދަނީ ދެކެމުންނެވެ. އެޗްއީއޯސީއިން މީގެ ކުރިންވެސް ވަނީ ކެފޭ ރެސްޓޯރެންޓްތަކުގައި ކޮވިޑާ ގުޅިގެން އެކަށައަޅަންޖެހޭ މިންގަނޑާ ޚިލާފަށް ޚިދުމަތްދެމުން އަންނަކަން ފާހަގަކުރެވޭކަމަށް ބުނެފައެވެ. އެގޮތުން ރެސްޓޯރެންޓްތަކަށް ގޮސް އެއްވެސް ވަރަކަށް މާސްކް ނާޅާ ތިބުމާއި، އިޖުތިމާޢީ ގައިދުރުކަމުގެ މިންގަނޑަށް ވެސް ތަބާނުވާކަން ވަނީ ފާހަގަކޮށްފައެެވެ. މިކަން ހައްލުކުރުމަށް ކެފޭ ރެސްޓޯރެންޓްތަކުގެ އިންސްޕެކްޝަން އަލުން ވަރުގަދަކުރާނެކަމަށް އާދިއްތަ ދުވަހުގެ ނޫސްވެރިންގެ ބައްދަލުވުމުގައި މަބްރޫކް ވަނީ ވިދާޅުވެފައެވެ.
ނަތީޖާ ނުލިބި ލަސްވެފައިވާ ސާމްޕަލްތަކާއެކު އާދީއްތަ ދުވަހު 1091 މީހަކު ޕޮޒިޓިވްވެފައިވާ ކަމަށް ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ވަނީ ބުނެފައެވެ.
އާދީއްތަ ދުވަހުގެ ރޭ ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒު ވިދާޅުވީ މިއަދު ރަޖިސްޓަރީ ކުރެވިފައިވާ ޖުމްލަ ކޭސްތަކުގެ އަދަދަކީ 1091 ކަމަށެވެ. އޭގެ ތެރެއިން މާލެ ސަރަހައްދުން 933، މީހުން ދިރިއުޅޭ ރަށްރަށުން 147، ހިންގަމުންދާ ރިސޯޓުތަކުން 6، ސަފާރީތަކުން 3، ހަދަމުންދާ ރިސޯޓުތަކުން ދެ މީހުން ޕޮޒިޓިވްވެފައިވާ ކަމަށް މަބްރޫކް ވިދާޅުވިއެވެ.
ބެކްލޮގް ވެފައިވާ ސާމްޕަލްތަކާ ނުލައި އާދީއްތަ ދުވަހު ޕޮޒިޓިވްވި ރޭޓަށް އަލިއަޅުއްވާލައްވަމުން މަބްރޫކް ވިދާޅުވީ ކޭސްތަކުގެ އަދަދު އިތުރު ކަމަށެވެ. އެގޮތުން ހޮނިހިރު ދުވަހުގެ 6:00ން އާދިއްތަ ދުވަހުގެ އިރުއޮއްސި 6:00ށް ނެގުނު ސާމްޕަލްގެ ތެރެއިން 760 މީހަކު ޕޮޒިޓިވްވެފައިވާ ކަމަށް މަބްރޫކް ވިދާޅުވިއެވެ. ރާއްޖެއަށް ކުރިމަތިވި ކޮވިޑް-19ގެ ހަތަރުވަނަ ރާޅާއެކު ކޮންމެ ދުވަހަކު ވެސް ގިނަ ބަޔަކު ދަނީ ޕޮޒިޓިވްމުންނެވެ. މާލެސިޓީގެ އިތުރުން އަތޮޅުތެރެއިން ވެސް ކޭސްތައް އިތުރުވަމުންދާއިރު، މިވަގުތު މޮނިޓަރިންގައި 32 ރަށެއް އެބައޮތެވެ.
