ކޮވިޑުން ރައްކާތެރިވުމަށް ލ. ގަމާއި އދ. މާމިގިލީގައި ހާއްސަ ފިޔަވަޅުތަކެއް
ރޭގަނޑު 09:00 ފެށިގެން ފަތިހު 04:00ށް އެއްގަމު އުޅަނދު ދުއްވުމާއި، މަގުމައްޗާއި އާންމު ތަންތަނަށް މީހުން ނުކުތުން މަނާ
ލ.ގަން
ކޮވިޑް-19 އިން ރާއްކާތެރިވުމަށް ލ. ގަމާއި އދ. މާމިގީލީގައި ހާއްސަ ފިޔަވަޅުތަކެއް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އަޅައިފިއެވެ.
އެޗްޕީއޭ އިން އާންމުކޮށްފައިވާ އިއުލާނެއްގައި ބުނެފައި ވަނީ މެއި 10 ވަނަ ދުވަހުން ފެށިގެން ގަން އަދި މާމިގީލީގައި ރޭގަނޑު 09:00 ފެށިގެން ފަތިހު 04:00ށް އެއްގަމު އުޅަނދު ދުއްވުމާއި، މަގުމައްޗާއި އާންމު ތަންތަނަށް މީހުން ނުކުތުން މަނާވާނެ ކަމަށެވެ.
ޕާޓީތަކާއި، ޙަފްލާތަކާއި، ރަސްމިއްޔާތުތައް ބޭއްވުން ހުއްޓައިލުމަށް އަންގާފައިވާއިރު، ގަމުގެ އެއް އަވަށުން އަނެއް އަވަށަށް ދަތުރުކުރުންވެސް ވަނީ މަނާކޮށްފައެވެ. ދެ ރަށުގައި އެއް ގެއިން އަނެއް ގެއަށް ޒިޔާރަތް ކުރުން މަނާކޮށްފައިވާ އިރު، އެއްފަހަރާ ތިން މީހުންނަށްވުރެ ގިނަމީހުން މަގުމައްޗާއި އާންމު ތަންތާނގައި އެއްވެ ނޫޅުމަށް ވަނީ އަންގާފައެވެ.
ސެލޫންތަކާއި، ޖިމްތާކާއި، ބޯކޮށާ ތަންތަން ބަންދުކޮށް، ހުރިހާ ކުޅިވަރު ހަރަކާތްތަކާއި، ކަސްރަތުގެ ހަރަކާތްތައް ހުއްޓާލުމަށް ވަނީ އަންގާފައެވެ. ޓެކްސީގެ ޚިދުމަތް ދޭ ފަރާތްތަކާއި ފިހާރަތަކުން ޚިދުމަތް ދޭއިރު، އެޗްޕީއޭ އިން އާންމުކޮށްފައިވާ ގައިޑްލައިނާ އެއްގޮތަށް ޚިދުމަތް ދިނުމަށް ވަނީ އަންގާފައެވެ. ހޮޓާ، ކެފޭ، ރެސްޓޯރަންޓު ފަދަ ކާބޯތަކެތީގެ ޚިދުމަތް ދޭ ތަންތަނުން ދެމުންގެންދާ ޚިދުމަތްތަކުގެ ތެރެއިން، ޓޭކްއަވޭއާއި ޑެލިވަރީގެ ޚިދުމަތްތައް ފިޔަވައި އެހެން ހިދުމަތްތައް ހުއްޓާލުމަށް ވެސް ވަނީ އަންގާފައެވެ.
މީގެ އިތުރުން، ގަން އަދި މާމިގިލީގައި ޔުނިވަރސިޓީތަކާއި ކޮލެޖްތަކަށް ދަރިވަރުން ހާޒިރުވެގެން ކުލާސްތައް ކުރިޔަށް ނުގެންދިއުމަށް ވަނީ އަންގާފައެވެ.
އަތޮޅުތެރެއިން ރިޕޯޓްކުރެވޭ ކޭސްތަކުގެ އަދަދު އިތުރުވަމުންދާތީ އެޗްޕީއޭ އިން ދަނީ ގިނަ ރަށްތަކެއްގައި ކޮވިޑުން ރައްކާތެރިވުމުގެ ހާއްސަ ފިޔަވަޅުތައް އަޅަމުންނެވެ.
