ޓެރަރިސްޓް ޙަމަލާއެއްގެ ޝިކާރައަކަށްވެ އޭޑީކޭގައި ފަރުވާ ހޯއްދަވަމުންދާ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދާ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ބައްދަލު ކުރައްވައިފިއެވެ.
އާދިއްތަ ދުވަހުގެ މެންދުރު ރައީސް ޞާލިޙު އޭޑީކޭއަށް ޒިޔާރަތް ކުރައްވައި ރައީސް ނަޝީދުގެ ޙާލުކޮޅު ބައްލަވާފައިވާއިރު، އެމަނިކުފާނު ވަނީ ނުކުމެވަޑައިގެން ނޫސްވެރިންގެ ބައެއް ސުވާލުތަކަށް ވެސް ޖަވާބު ދެއްވާފައެވެ. އެގޮތުން ރައީސް ނަޝީދުގެ ޙާލުކޮޅާ ގުޅޭގޮތުން ރާއްޖެޓީވީން ކުރި ސުވާލަކަށް ޖަވާބު ދެއްވަމުން ރައީސް ޞާލިޙު ވިދާޅުވީ، އެމަނިކުފާނު ވަރަށް ރަނގަޅަށް ރިކަވަރ ވަމުން އަންނަކަން ފާހަގަ ކުރެއްވުނު ކަމަށެވެ. އަދި ރައީސް ނަޝީދު ވަރަށް ގިނަ ވާހަކަ ދެއްކެވިކަން ފާހަގަކުރައްވައި ރައީސް ވިދާޅުވީ، އޭގެތެރޭގައި އަމިއްލަ ރައްޓެއްސެއްގެ ހައިސިއްޔަތުން ދެއްކެވި ވާހަކަތަކާއި، އާއިލާއާއި، ސަރުކާރާ ގުޅޭ ގިނަ ވާހަކަތަކެއް ވެސް ހިއްސާ ކުރެއްވި ކަމަށެވެ.
ރައީސް ނަޝީދުގެ ހިތްވަރުގަދަކަން ފާހަގަ ކުރައްވައި ރައީސް ޞާލިޙު ވިދާޅުވީ، އެމަނިކުފާނުގެ ރިކަވަރީ ވެސް ފެންނަނީ ވަރަށް ރަނގަޅަށް ކަމަށެވެ. އަދި ޑޮކްޓަރުން އެ ކުރެއްވި މަސައްކަތުގެ ނަތީޖާގެ ގޮތުން ވަރަށް އަވަސް ރިކަވަރީއެއް ލިބެމުންދާކަން ފާހަގަ ކުރެވޭކަމަށް ރައީސް ވިދާޅުވިއެވެ.
ރައީސް ވަނީ އޭޑީކޭގެ ޑޮކްޓަރުންގެ ޓީމަށާއި، މެނޭޖްމަންޓަށް ޝުކުރު އަދާ ކުރައްވާފައެވެ.
އަޅުގަނޑަށް ފާހަގަ ކުރެވުނު ވަރަށް ރަނގަޅަށް ރިކަވަރ ވަމުން އަންނަކަން، ވަރަށް ގިނަ ވާހަކަ ދެއްކެވި އަޅުގަނޑާ، ދެއްކެވި ވާހަކަތަކުގެ ތެރޭގައި އަމިއްލަ ރައްޓެއްސެއްގެ ހައިސިއްޔަތުން ދެއްކެވި ވާހަކަތަކާއި، އާއިލާއާއި، ސަރުކާރާއި އެހެންގޮސް އެތައް ވާހަކަތަކެއް ދެއްކި، އަޅުގަނޑަށް ފެނުނީ ވަރަށް ހިތްވަރުގަދަކޮށް އޮންނެވިކަން، އަނެއްކާ ރިކަވަރީ ފެންނަނީ ހަމަ ވަރަށް ރަނގަޅަށް، އިރާދުކުރެއްވިއްޔާ ޑޮކްޓަރުން އެ ކުރެއްވި މަސައްކަތުގެ ނަތީޖާގެ ގޮތުން ވަރަށް އަވަސް ރިކަވަރީއެއް ލިބެމުންދާކަން ފާހަގަ ކުރެވޭ، އަޅުގަނޑު ހަމަ މި ފުރުސަތުގައި އޭޑީކޭގެ ޑޮކްޓަރުންގެ ޓީމަށާއި، މެނޭޖްމަންޓަށް އެ ކޮށްދެއްވި މަސައްކަތަށް ވަރަށް ބޮޑަށް ޝުކުރު އަދާކުރަން،ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު
އޭގެ އިތުރުން، ސަޕޯޓަރުންނަށް ދެއްވާނެ މެސެޖަކާ ގުޅޭގޮތުން ރާއްޖެޓީވީން ސުވާލުކޮށްލުމުން ރައީސް ޞާލިޙު ވިދާޅުވީ، ރައީސް ނަޝީދަކީ ރާއްޖޭގެ ވަރަށް ގިނަ ރައްޔިތުންގެ ލޯތްބާއި އިހުތިރާމް ލިބިވަޑައިގެންފައިވާ ބޭފުޅެއް ކަމަށެވެ. އަދި އެ ހުރިހާ ބޭފުޅުންނަށާއި ވަކިން ޚާއްސަކޮށް އެމްޑީޕީގެ ސަޕޯޓަރުން ވެސް ހިތްވަރު ކުރެއްވުމަށް ރައީސް އެދިވަޑައިގެންނެވިއެވެ.
ރައީސް ވިދާޅުވީ، ދެން އެފަދަ ކަމެއް ވިޔަ ނުދިނުމަށްޓަކައި ކުރަންޖެހޭ ހުރިހާކަމެއް ކުރައްވާނެ ކަމަށެވެ. އަދި އެގޮތަށް ދިމާވާ ކަންތައްތަކުން ޤައުމު ސަލާމަތް ކުރުމަށްޓަކައި ކުރެވެން ހުރި ހުރިހާކަމެއް ކުރައްވާނެކަން ފާހަގަ ކުރައްވައި ރައީސް ވިދާޅުވީ، އެކަމުގައި އެންމެ ބޮޑު މަސައްކަތެއް ކުރެވޭނެ ބަޔަކީ އެމްޑީޕީ އާއި އެމްޑީޕީގެ ސަޕޯޓަރުން ކަމަށެވެ.
ރާއްޖޭގެ ވަރަށް ގިނަ ރައްޔިތުންގެ ލޯތްބާއި އިހުތިރާމް ލިބިވަޑައިގެންފައިވާ ބޭފުޅެއް، އެ ހުރިހާ ބޭފުޅުންނަށް ވެސް ޚާއްސަކޮށް އެމްޑީޕީގެ ސަޕޯޓަރުންނަށް އަޅުގަނޑު ދަންނަވާލަން ބޭނުންވަނީ ހިތްވަރު ކުރައްވާށޭ، އިރާދު ކުރެއްވިއްޔާ އަޅުގަނޑުމެންނާ ކުރިމަތިވި މި ކަންތައްތަކުގައި، ދެން މިފަދަ ކަމެއް ވިޔަ ނުދިނުމަށްޓަކައި އަޅުގަނޑުމެން ކުރަންޖެހޭ ހުރިހާކަމެއް އިރާދުކުރެއްވިއްޔާ އަޅުގަނޑުމެން ކުރާނަން، ރައީސް ނަޝީދަކީ ހިތްވަރުގަދަ ބޭފުޅެއް، މިއަދުވެސް ދެއްކެވި ވާހަކަތަކުން ވަރަށް ބޮޑަށް އަޅުގަނޑަށް އެކަން ޔަޤީންވި، އަޅުގަނޑުމެން ހަމަ ގައިމުވެސް މިތިބީ މި ދިމާވާ ކަންތައްތަކުން ޤައުމު ސަލާމަތް ކުރުމަށްޓަކައި ކުރެވެންހުރި ހުރިހާކަމެއް ކުރަން، ހަމަ ގައިމުވެސް މީގައި އެންމެ ބޮޑު މަސައްކަތެއް ކުރެވޭނެ ބަޔަކީ އެމްޑީޕީއާއި އެމްޑީޕީގެ ސަޕޯޓަރުން، އަޅުގަނޑުމެން އިރާދުކުރެއްވިއްޔާ އެކަންކަން ކުރާނަންރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު
ހޮނިހިރު ދުވަހު ރައީސް ނަޝީދު ލައިފް ސަޕޯޓް މެޝިނުން ނަގާފައިވާއިރު، އެމަނިކުފާނުގެ ހާލުކޮޅު މަޑުމަޑުން ރަނގަޅުވަމުން އަންނަކަމަށް އާއިލާއިން ބުނެފައިވެއެވެ.
