އަރަބި އިސްލާމީ ތައުލީމް އުނގަންނައިދޭ މުދައްރިސުންނަށް މަސައްކަތު ބައްދަލުވުމެއް ފަށައިފި
އެ ވޯކްޝޮޕް ހިންގަނީ ހަތަރު ދުވަހުގެ މުއްދަތަށް
އެޑިއުކޭޝަން މިނިސްޓްރީއާކަމާބެހޭ ފަރާތްތަކާއެކު ބޭއްވި ވޯކްޝޮޕްގެ ތެރެއިން
ސްކޫލްތަކުގައި އަރަބި އިސްލާމީ ތައުލީމް އުނގަންނައިދޭ މުދައްރިސުން ތާޒާކުރުމުގެ މަސައްކަތު ބައްދަލުވުމެއް ފަށައިފި އެވެ.
އެޑިއުކޭޝަން މިނިސްޓްރީން ބުނީ އިސްލާމިކް އެޑިޔުކޭޝަނަލް، ސައިންޓިފިކް އެންޑް ކަލްޗަރަލް އޯގަނައިޒޭޝަން (އިސެސްކޯ) އާއި މޯލްޑިވްސް ނެޝަނަލް ކޮމިޝަން ފޯ ޔުނެސްކޯ/ އިސެސްކޯ އަދި ގުރަނަޑާ އެޑިޝަން ގުޅިގެން ކުރިއަށްގެންދާ މި މަސައްކަތު ބައްދަލުވުމަކީ ޖެނުއަރީ 23 އިން ފެށިގެން ހަތަރު ދުވަހުގެ މުއްދަތަށް މާލޭގައި ކުރިއަށްދާ ބައްދަލުވުންތަކެއް ކަމަށެވެ.
މި މަސައްކަތު ބައްދަލުވުމުގައި ބައިވެރިވުމަށް މާލޭގެ ހުރިހާ ސްކޫލްތަކަށް ދައުވަތުއެރުވިފައިވާ އިރު، މި ބައްދަލުވުމުގައި މާލޭގެ ސްކޫލްތަކުން އަރަބި އަދި އިސްލާމް ކިޔަވައިދޭ 25 މުދައްރިސަކު ބައިވެރިވެއެވެ.
މި މަސައްކަތު ބައްދަލުވުން ކުރިއަށް ގެންދިޔުމަށް ހަމަޖެހިފައިވަނީ އަރަބި ބަހުން ކަމުގައިވާއިރު، މި ބައްދަލުވުމުގައި ކިޔަވައިދެއްވާނީ އިސެސްކޯ އަދި ގްރެންޑާ އެޑިޝަންގެ ދެ ބޭފުޅެއް ކަމަށް އެޑިއުކޭޝަން މިނިސްޓްރީން ބުނެއެވެ.
އެ މިނިސްޓްރީން ބުނީ މި މަސައްކަތު ބައްދަލުވުމުގެ މަގްސަދަކީ ރާއްޖޭގެ ސްކޫލްތަކުގައި އަރަބި އިސްލާމް ތައުލީމް އުނގަންނަވައިދެއްވުމުގައި މަސައްކަތްކުރައްވާ ދިވެހި މުދައްރިސުން ކިޔަވައިދިނުމުގައި ބޭނުންކުރެވޭ ޒަމާނީ ވަސީލަތްތަކަށް އަހުލުވެރި ކުރުވުމާއި އަދި ގައުމީ މަންހަޖުގެ ތެރެއިން އިސްލާމީ އަރަބި ތައުލީމް އުނގަންނަވައިދެއްވުމުގައި އިސްލާމީ އަދި އިންސާނީ އެންމެ ރިވެތި އުސޫލުތައް އުންގަންނަވައިދެއްވުމަށް މުދައްރިސުން އަހުލުވެރި ކުރުވުން ކަމަށެވެ.
