އަފްޣާނިސްތާނުގެ ސުކޫލަކަށް ދިން ބޮމުގެ ހަމަލާއެއްގައި މަރުވި މީހުންގެ އަދަދު 58ށް
މަރުވެފައިވާ 8 ވަރަކަށް ކުދިންނަކީ އެ ސުކޫލުގައި ތައުލީމު ޙާސިލު ކުރަމުންދިޔަ ދަރިވަރުން
އަފްޣާނިސްތާނުގެ ސުކޫލަކަށް އަމާޒުކޮށް ދިން ހަމަލާގައި ގިނަ ބަޔަކު ވަނީ ޒަޚަމްވެފައި
އަފްޣާނިސްތާނުގެ ސުކޫލަކަށް އަމާޒުކޮށް ދިން ބޮމުގެ ހަމަލާއެއްގައި މަރުވި މީހުންގެ އަދަދު 58ށް އަރައިފިއެވެ.
ރޮއިޓަރސްގައި ރިޕޯޓު ކޮށްފައިވާ ގޮތުން އަފްޣާނިސްތާނުގެ ސުކޫލަކަށް އަމާޒުކޮށް ދީފައިވާ މި ހަމަލާގައި 58 މީހަކު މަރުވެފައިވާއިރު، ޒަޚަމްވި މީހުންގެ އަދަދުވެސް ވަނީ 150ން މައްޗަށް އަރާފައެވެ. އެގޮތުން މި ހަމަލާ ދީފައިވަނީ އެ ގައުމުގެ މުސްލިމުން ދިރިއުޅެމުންދާ ސިޓީއެއްގައި ކަމަށް ރޮއިޓަރސްގައި ރިޕޯޓު ކޮށްފައިވެއެވެ. ފާއިތުވި ދުވަސްތަކުގައި ވެސް އެ ސިޓީގެ މުސްލިމުންނަށް އަމާޒުކޮށް އެފަދަ ގިނަ ހަމަލާތަކެއް ދީފައިވާކަމަށް ރިޕޯޓުތައް ބުނެއެވެ.
މަންޒަަރު ދުށް މީހުންނާ ޙަވާލާދީ ރޮއިޓަރސްގައި ރިޕޯޓު ކޮށްފައިވާ ގޮތުން މި ހަމަލާގައި މަރުވެފައިވާ 8 ވަރަކަށް ކުދިންނަކީ އެ ސުކޫލުގައި ތައުލީމު ހާސިލު ކުރަމުންދިޔަ ދަރިވަރުންނެވެ.
އަފްޣާނިސްތާނުގެ ރައީސް އަޝްރަފް ޣަނީ ވަނީ މި ހަމަލާގެ ޒިންމާ ނަގަންޖެހޭނީ ޠާލިބާނުން ކަމަށް ބުނެފައެވެ. ނަމަވެސް އެ ޖަމާޢަތުން ވަނީ މި ހަމަލާއަކީ އެ ޖަމާޢަތުން ދީފައިވާ ހަމަލާއެއް ނޫންކަމަށް ބުނެފައެވެ. މި ހަމަލާގައި ދުނިޔެ ދޫކޮށްފައިވާ މީހުންގެ އާއިލާތަކުން ވަނީ އަފްޣާނިސްތާނުގެ ސަރުކާރަށް ވަރަށް ބޮޑަށް ފާޑުކިޔާފައެވެ.
