ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދީފައިވާ ހަމަލާއާ ގުޅިގެން ހޯދަމުންދާ އިތުރު މީހަކު ހުޅުމާލެއިން ހައްޔަރުކޮށްފިއެވެ.

ހުޅުމާލޭ ޣާޒީ ސްކޫލް ހުންނަ ސަރަހައްދުގައިވާ ފްލެޓަކުން އޭނާ ހައްޔަރުކޮށްގެން ފުލުހުންގެ ބޮޑު ޓީމަކުން އާދީއްތަ ދުވަހު އެނދުނު ގެންދާ ފޮޓޯތައް ވެސް މިހާރު އާންމުވެފައިވާއިރު، އޭނާއަކީ 2021 މެއި 06 ވަނަ ދުވަހުގެ ރޭ ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅިގެން ހޯދަމުންދާ މީހާކަމަށް ދައުރުވަމުންދާ ފޮޓޯތަކުން ބެލެވެއެވެ.

މިކަން ފުލުހުންވެސް މިހާރު ވަނީ ކަށަވަރުކޮށްދީފައެވެ.

މި މައްސަލައާ ގުޅިގެން ހޮނިހިރު ދުވަހު ވެސް 2 މީހަކު ހައްޔަރުކޮށްފައިވެއެވެ. ފުލުހުން ބުނީ މި ދެމީހުންނަކީ ވެސް މި މައްސަލައިގައި ތުހުމަތު ކުރެވޭ ދެމީހުން ކަމަށެވެ. އަދި މި ދެމީހުންނަކީ ވެސް އެކިއެކި ކުށުގެ ރިކޯޑުތައް އޮންނަ މީހުން ކަމަށް ފުލުހުން ވަނީ ހާމަ ކޮށްފައެވެ.

މި މައްސަލައާ ގުޅިގެން މީގެ ކުރިން ހައްޔަރުކޮށްފައިވާ 2 މީހުންނަކީ 21 އަހަރުގެ މުޖާޒް އަހުމަދު، މއ. ފޭރުގެ، އާއި ގއ. ކޮނޑޭއަށް އުފަން 32 އަހަރުގެ ތަހުމީން އަހުމަދެވެ. ތަހުމީން އަހުމަދަކީ އައިއީޑީ ހަރުކުރެވިފައިވާ ސައިކަލުގެ ވެރިފަރާތް ކަމަށް ފުލުހުން ބުނެއެވެ.

ތަހުގީގަށް ހައްޔަރުކުރި ދެ މީހުންނަކީ ވެސް ހަރުކަށި ފިކުރާ ގުޅުން ހުރި މީހުން ކަމަށް ފުލުހުން ބުނެއެވެ.