ކުރީގެ ރައީސް މުޙައްމަދު ނަޝީދު ހޮނިހިރު ދުވަހު ގިނަ އިރުތަކެއްވަންދެން އާއިލާގެ ބައެއް ބޭފުޅުންނާ ވާހަކަފުޅު ދެއްކެވިކަމަށް، ކޮއްކޯފުޅު ނާޒިމް ސައްތާރު ވިދާޅުވެއްޖެއެވެ.
ނާޒިމް މިހެން ވިދާޅުވީ ހޮނިހިރު ދުވަހުގެ ރޭ ކުރެއްވި ޓްވީޓެއްގައެވެ.
މަޖިލީހުގެ ރައީސް މުހައްމަދު ނަޝީދުގެ ލައިފް ސަޕޯޓިން މެޝިނުން ނަގާފައި ވާކަމަށާއި ކޮންމެވެސް ވަރަކަށް ވާހަފުޅުދެއްކެވި ކަމަށް އާއިލާއިން ހޮނިހިރު ދުވަހު މެންދުރު ބުނެފައިވެއެވެ.
ނަޝީދުގެ ބޭބޭފުޅު ޑރ. އިބްރާހީމް ނާޝިދު ކުރެއްވި ޓްވީޓެއްގައި ވިދާޅުވީ، ރައީސް ނަޝީދުގެ ހާލުކޮޅު ރަނގަޅުވަމުން އަންނަ ވަރާ ދޭތެރޭގައި ޑޮކްޓަރުން ހިތްހަމަޖެހިވަޑައިގަންނަވާ ކަމަށެވެ.
ހޮނިހިރު ދުވަހު ހެނދުނު ރައީސް ނަޝީދު ވަނީ ވެންޓިލޭޓަރުން ނަގާފައި ކަމަށާއި ނޭވާލުމުގައި މިހާރު ދަތިކަމެއް ނެތް ކަމަށް، އޭޑީކޭއިން ބޭއްވި ނޫސްވެރިންގެ ބައްދަލުވުމުގައި، ފަރުވާ ދެއްވި ޑޮކްޓަރުން ވެސް ވިދާޅުވެފައިވެއެވެ. ޑޮކްޓަރުން ވިދާޅުވީ، ލޭގެ ޕްރެޝަރު ރަނގަޅުކުރުމަށް ދިން ބޭސް މިހާރު ހުއްޓާލާފައިވާ ކަމަށާއި އެކަމަކު އިންފެކްޓް ވުމުގެ ފުރުސަތު އޮތުމުން ގާތުން ބައްލަވަމުން ގެންދަވާނެ ކަމަށެވެ.
