ސެލެބްރިޓީ ރޭސް މިރޭ 11:00ށް އަލުން ޝެޑިއުލްކޮށްފި

މިއަހަރުގެ ރަމަޟާންމަހަށް ހާއްސަކޮށް ރާއްޖެޓީވީން ގެނެސްދެމުންދާ ރިއަލިޓީ ޝޯވ "ޕްރިސްޓަރ އޮއިލް ސެލެބްރިޓީ ރޭސް" ގެ 4 ވަނަ އެޕިސޯޑު ހޮނިހިރު ދުވަހުގެރޭ 11:00 ގައި އޮންނާނެއެވެ.

މި ޕްރޮގްރާމް ދެއްކުމަށް ކުރިން ތާވަލުކޮށްފައި އޮތީ 6 މެއި 2021 ވީ ބުރާސްފަތި ދުވަހުގެރޭ 11:00 ގައެވެ. ނަމަވެސް މިހާރު ޕޮރޮގްރާމް ވަނީ ހޮނިހިރު ދުވަހުގެރޭ (މިރޭ) 11:00ށް ރީޝެޑިއުލް ކުރެވިފައެވެ.

ރާއްޖެޓީވީ އާއި އެސް ޕްރޮޑަކްޝަންއާ ގުޅިގެން ކުރިއަށް ގެންދާ މި ޝޯގެ ހަތަރު ވަނަ އެޕިސޯޑުގެ ޓްރެއިލަރ މިހާރު އާންމުކޮށްފައިވާއިރު، ޝޯވ ގައި ހަރަކާތްތެރިވާ ފަންނާނަކު ގެއްލިގެން ސިފައިންގެ ސްޕެޝަލް ފޯސްގެ ޓީމެއް ޙަރަކާތްތެރިވާ މަންޒަރު މި ޓްރެއިލަރ އިން ފެނެއެވެ. 

މި ޝޯވް ގެ ޝޫޓިންގ ކުރިއަށް ދިޔައިރު، ޝޯވ ގައި ހަރަކާތްތެރިވި ފަރާތްތަކާއި ކްރޫއަށް ސޭފްޓީ އެންޑް ރެސްކިއު ސަޕޯޓު ދިނުމުގެ ގޮތުން އެމްއެންޑީއެފްގެ ޓީމަކުން ޝޫޓިންގ ކުރިއަށްދިޔަ ސަރަޙައްދުގައި ވަނީ ބޮޑު ހަރަކާތެއް ހިންގައިދީފައެވެ. ފިލްމީތަރި އަލީ ސީޒަނާއި، ރާއްޖެޓީވީގެ ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރް ސަލީމު ޑައިރެކްޓް ކޮށްފައިވާ މި ޝޯވް ގައި ކުރިއަށް ދެން އޮތީ ފައިނަލް ޝޯވ އާ އެކު ދެ އެޕިސޯޑެވެ.

މި ޝޯ ހުށަހަޅައިދެނީ މަޝްހޫރު ފިލްމީތަރި އަލީ ސީޒަންއާއި، ރާއްޖެޓީވީގެ ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރް ސަލީމެވެ.

މި ޝޯވ އިން އެއްވަނައަށް އަންނަ ޓީމަކަށް ގްރޭންޑް ޕްރައިޒް ގޮތުގައި ޖީއެން ސައިކަލަކާއި، ސްކޫޕީ ސައިކަލެއް ހުށަހަޅާފައިވެއެވެ. ރާއްޖޭގައި މިހާތަނަށް ހެލިކޮޕްޓަރ ބޭނުންކޮށްގެން އުފެއްދި އެންމެ ބޮޑު ރިއަލިޓީ ޝޯވ އަށް ބެލުންތެރިންގެ އާދަޔާ ޚިލާފު ތަރުހީބެއް ދަނީ ލިބެމުންނެވެ.