އިންސާނީ ޙައްޤުތައް ޤާއިމްކޮށް، ކޮމަންވެލްތާއި އަލުން ގުޅެންޖެހޭ: ރައީސް ނަޝީދު

ކޮމަންވެލްތުން ކަނޑައަޅާފައިވާ އިންސާނީ ޙައްޤުތަކުގެ މިންގަނޑަށް ފެތި، ރާއްޖެއިން ކޮމަންވެލްތު ޖަމާޢަތާއި އަލުން ގުޅުމަށް ކުރީގެ ރައީސުލްޖުމްހޫރިއްޔާ މުޙައްމަދު ނަޝީދު ގޮވާލައްވައިފިއެވެ.

މިއަދު ފާހަގަކުރަމުންދާ ކޮމަންވެލްތު ދުވަހުގެ މުނާސަބަތުގައި، ރައީސް ނަޝީދު ކުރެއްވި ޓްވީޓެއްގައި ވިދާޅުވީ، އިންސާނީ ޙައްޤުތަކާ ގުޅޭ ގޮތުން ކޮމަންވެލްތުން ކަނޑައަޅާފައިވާ މިންގަނޑުތަކަށް ރާއްޖެއިން ތަބާވެ، އެ މިންގަނޑުތަކާ އެއްވަރަށް ރާއްޖޭގައި އިންސާނީ ޙައްޤުތައް ކަށަވަރުކޮށްދޭން ޖެހޭ ކަމަށެވެ.

Advertisement

އަދި ހަމަ މި މިންގަނޑުތަކަށް ތަބާވުމާއެކު، ރާއްޖެއިން، ކޮމަންވެލްތާ އަލުން ގުޅުމަށް ވެސް ރައީސް ނަޝީދު ވަނީ ގޮވާލައްވާފައެވެ.

ކޮމަންވެލްތުގެ އިންސާނީ ޙައްޤުތަކުގެ މިންގަނޑުތަކަށް ތަބާވެ، އަލުން އެ ޖަމާޢަތާ ގުޅުމަށް ރައީސް ނަޝިދު ގޮވާލައްވާފައިވާއިރު، ނިމިގެން ދިޔަ އަހަރު ކޮމަންވެލްތުން ވަކިވުމަށް ދިވެހި ސަރުކާރުން ނިންމުމާއެކު، އެ ނިންމުން ބަދަލުކޮށް، ރާއްޖެއިން އަލުން އެ ޖަމާއަތާ ގުޅޭނެ ކަމަށް އުއްމީދު ކުރާ ކަމަށް ކޮމަންވެލްތު ޖަމާޢަތުންވެސް ވަނީ ބުނެފައެވެ.

ކޮމަންވެލްތުން ވަކިވާން ނިންމިކަން ހާމަކޮށް، ނިމިގެން ދިޔަ އަހަރުގެ އޮކްޓޫބަރު މަހުގެ 13 ވަނަ ދުވަހު ދިވެހި ސަރުކާރުން ބުނީ، އެ ޖަމަޢަތުން ވަކިވާން ނިންމި ނިންމުމަކީ އުނދަގޫ ނިންމުމެއް ކަމަށާއި، ނަމަވެސް އެއީ ނުވެ ނުދާނެ ކަމެއް ކަމަށެވެ. ކޮރަޕްޝަނާއި، އިންސާނީ ހައްޤުތަކަށް އިޚުތިރާމް ނުކުރާ މައްސަލައިގައި ކޮމަންވެލްތުން ރާއްޖެ ސަސްޕެންޑްކުރަން ތައްޔާރުވެފައި ވަނިކޮށް، އެ ޖަމާއަތުން ވަކިވިއިރު، އެ ނިންމުން ނިންމި ސަބަބެއް ކަމުގައި ދިވެހި ސަރުކާރުން ބުނެފައިވަނީ، ކޮމަންވެލްތުން ރާއްޖެއާއި މެދު ނާއިންސާފު ތަފާތުކުރުން ގެންގުޅުމާއި، ސަރުކާރުން ކުރާ ރަނގަޅު ކަންކަން އެ ޖަމާޢަތުން ބަލައި ނުގަތުމެވެ.

ރާއްޖެއަކީ ކޮމަންވެލްތުގެ ތާރީޚުގައިވެސް އެ ޖަމާޢަތުން ވަކިވި އޭޝިއާގެ ހަމައެކަނި ޤައުމެވެ.

ކޮމަންވެލްތުގެ އަހަރީ ދުވަހާއި ގުޅިގެން އާދިއްތަ ދުވަހު ރައީސް ނަޝީދު ކުރެއްވި ޓްވީޓްގައި އެމަނިކުފާނު ވަނީ މި ދުވަހުގެ ތަހުނިޔާ، އިނގިރޭސި ރާނީ އަށާއި، ކޮމަންވެލްތުގެ ޤައުމުތަކުގެ ރައްޔިތުންނަށް ފޮނުއްވަވާފައެވެ.