އެމްޑީޕީގެ ޗެއާޕާސަން ހޮވުމަށް ބޭއްވި އިންތިހާބުގެ ވަގުތީ ނަތީޖާ މިރޭ އިއުލާން ކުރާނެ ކަމަށް އެޕާޓީން ބުނެފިއެވެ.

ހުކުރު ދުވަހު މެންދުރު 2:00 އިން އިރުއޮއްސި 6:00 އަށް ކުރިއަށް ދިޔަ އިންތިހާބުގެ ވޯޓްލުން ރައްޖޭގެ މީހުން ދިރިއުޅޭ ހުރިހާ ރަށެއްގެ އިތުރުން ކޮލަމްބޯގައި ވަނީ ކުރިއަށް ގެންގޮސްފައެވެ. މި އިންތިހާބުގައި ރައީސް މުހައްމަދު ނަޝީދު ވެސް ވަނީ ކޮލަމްބޯގައި ވޯޓް ލައްވާފައެވެ.

އެމްޑީޕީގެ އިންތިހާބާ ބެހޭ ކޮމެޓީން ބުނީ 6:00 ޖެހުމާ އެކު ވޯޓް ފޮށިތައް ބަންދުކޮށްފައިވާ ކަމަށެވެ. ރާއްޖޭގެ އެކި ކަންކޮޅުތަކުގައި ކުރިއަށް ގެންދިޔަ މި އިންތިހާބުގެ ވޯޓް ގުނުމަށް ހަމަޖެހިފައި ވަނީ ވޯޓް ފޮށިތައް ބަހައްޓާފައި ހުރި ސަރައްދުގައެވެ.

އެގޮތުން އަތޮޅުތެރޭގެ ރަށްތަކުގައި ވޯޓް ގުނުމަށް ފަހު ޕާޓީ އޮފީހަށް ވަގުތީ ނަތީޖާ މިހާރު ދަނީ ފޮނުވަމުންނެވެ. މިރޭ 9:00 ހާއިރު އިންތިހާބުގެ ވަގުތީ ނަތީޖާ އިއުލާން ކުރުމަށް ހަމަޖެހިފައިވާ ކަމަށް ވެސް އިންތިހާބާ ބެހޭ ކޮމެޓީން ބުންޏެެވެ.

މާލޭގައި ދިރިއުޅޭ އެޕާޓީގެ މެމްބަރުން ވޯޓްލުމަށް ޖުމްލަ 7 ވޯޓް ފޮށި ވަނީ ބަހައްޓާފައެވެ. އަތޮޅުތެރޭގައި ވޯޓްލުން ކުރިއަށް ގެންގޮސްފައި ވަނީ އެމްޑީޕީ ހަރުގެތަކުގައެވެ.

ހަސަން ލަތީފު އެ މަގާމަށް ހޮވިވަޑައިގަންނަވާނީ އެންމެ މަދުވެގެން އެމްޑީޕީގެ މެމްބަރުންގެ ތެރެއިން 5،000 މެމްބަރުންގެ ތާއިދު ލިބުމުންނެވެ. މަގާމަށް ހޮވިވަޑައިގެންފި ނަމަ، ޕާޓީގެ ހިންގުން ހަރުދަނާކޮށް، އިންތިހާބުތައް ކާމިޔާބުކުރަން މަސައްކަތް ކުރައްވާނެ ކަމަށް އޭނާ ވަނީ ވިދާޅުވެފަ އެވެ.