ރައީސް ނަޝީދަށް އަމާޒުކޮށް ދިން ހަމަލައާ ގުޅިގެން 2 މީހަކު ހައްޔަރުކޮށްފި
ޓެރަރިސްޓް ހަމަލާއާ ގުޅިގެން މިހާތަނަށް 2 މީހަކު ހައްޔަރު ކޮށްފައިވޭ
ރައީސް ނަޝީދަށް ހަމަލާދިން ސަރަހައްދުގައި ފުލުހުން ހަރަކާތްތެރިވަނީ
ބުރާސްފަތި ދުވަހުގެ ރޭ އިރާކޮޅު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ހަމަލާއާ ގުޅިގެން 2 މީހަކު ހައްޔަރުކޮށްފިއެވެ.
އެކަން ހާމަކޮށްފައިވަނީ ފުލުހުން ކުރި ޓްވީޓެއްގައެވެ. އެގޮތުން 6 މެއި ގެ ޓެރަރިސްޓް ޙަމަލާއާ ގުޅިގެން 2 މީހަކު ހައްުޔަރު ކޮށްފައިވާއިރު، އެކަމާ ގުޅޭ އިތުރު މައުލޫމާތު ނޫސްވެރިންގެ ބައްދަލުވުމެއްގައި ހާމަ ކުރައްވާނެކަން ފާހަގަކޮށްފައިވެއެވެ. ފުލުހުން ބުނީ، ނޫސްވެެރިންގެ ބައްދަލުވުން އޮންނާނީ ހޮނިހިރު ދުވަހު ކަމަށެވެ.
މި ހަމަލާއާ ގުޅޭ ވީޑިއޯއާއި ފޮޓޯ އޮންލައިންކޮށް ހިއްސާ ކުރެވޭނެކަމަށްވެސް ފުލުހުން ވަނީ ބުނެފައެވެ. ފުލުހުން ވަނީ މި މައުލޫމާތު ހިއްސާ ކުރާ ފަރާތްތަކާއި ހިއްސާކުރާ މައުލޫމާތުގެ ސިއްރުކަން ހިފަހައްޓާނެކަމުގެ ޔަގީންކަން ދީފައެވެ. އަދި ފުލުހުންގެ ހޮޓްލައިން ނަންބަރު 9704000ށް ގުޅައި މައުލޫމާތު ހިއްސާ ކުރެވޭނެ ކަމަށްވެސް ބުނެފައިވެއެވެ.
މިކަމާ ގުޅިގެން ހުކުރު ދުވަހު ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ، އެ ހާދިސާ ހިނގި ސަރަހައްދުން ޝައްކުކުރެވޭ ހަރަކާތްތައް ހުރި ބަޔަކު ފާހަގަކުރެވިފައިވާ ކަމަށެވެ. އެގޮތުން ޝައްކުކުރެވޭ 4 މީހަކު ފުލުހުންގެ ސަމާލުކަމަށް އައިސްފައިވެއެވެ. މި 4 މީހުންނާ ދޭތެރޭ ޝައްކު އުފެދިފައިވާ ސަބަބުތައް މީޑިއާތަކަށް ހާމަކުރެވެން ނެތްކަމަށް ވެސް ސީޕީ ޙަމީދު ވިދާޅުވިއެވެ.
