ރައީސް ނަޝީދަށް ހަމަލާދިން ފަރާތްތައް އިންސާފުގެ ކުރިމައްޗަށް ގެނައުމަށް އެމްނެސްޓީން ގޮވާލައިފި
ރައީސް ނަޝީދަށް އޭޑީކޭ ހޮސްޕިޓަލްގައި އަންނަނީ ފަރުވާ ދެމުން
ރައީސް ނަޝީދަށް ހަމަލާދިން ސަރަހައްދުގައި ފުލުހުން ހަރަކާތްތެރިވަނީ
ބުރާސްފަތި ދުވަހުގެ ރޭ އިރާކޮޅު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ހަމަލާ ވީއެންމެ އަވަހަކަށް ތަހުގީގުކޮށް މިކަމުގައި ޝާމިލްވާ ފަރާތްތައް އިންސާފުގެ ކުރިމައްޗަށް ގެނައުމަށް އެމްނެސްޓީ އިންޓަރނޭޝަނަލް ސައުތު އޭޝިޔާ އިން ގޮވާލައިފިއެވެ.
އެމްނެސްޓީ އިންޓަރނޭޝަނަލްގެ ސައުތު އޭޝިޔާ ސަރަހައްދު އޮފީހުން ކޮށްފައިވާ ޓްވީޓެއްގައި ބުނެފައިވަނީ ރާއްޖޭގެ ރައްޔިތުން މިފަދަ އަނިޔާވެރި އަމަލުތަކާއި ހަމަނުޖެހުންތަކުން ސަލާމަތްކޮށް ރައްކާތެރިކުރުމަކީ ދިވެހި ސަރުކާރުގެ ވާޖިބެއްކަމަށެވެ. އަދި ބުރާސްފަތި ދުވަހުގެ ރޭ މާލޭގައި އެއްޗެއް ގޮއްވާލި ހާދިސާގައި ރައީސް ނަޝީދުގެ އިތުރުން ހަތަރު މީހަކަށް އެކި އަނިޔާ ލިބިފައިވާކަމަށް ބުނެފައިވެއެވެ. ކަމާގުޅޭ އިދާރާތަކުން ވީއެންމެ އަވަހަށް މިކަން ތަހުގީގުކޮށް މިކަމުގައި ޝާމިލްވާ ފަރާތްތައް އިންސާފުގެ ކުރިމައްޗަށް ގެނައުމަށް ވަނީ ގޮވާލާފައެވެ.
މީގެއިތުރުން މިދިޔަ ހަފްތާގައި މޭޑޭ އާ ދިމާކޮށް މަސައްކަތުގެ މާހައުލުގައި ލިބޭ ޖިންސީ ފުރައްސާރަ އާ ދެކޮޅަށް ކުރި މުޒާހަރާގައި ފުލުހުން ހާލަތާ ނުބައްދަލު ބާރު ބޭނުންކޮށްފައިވާކަމަށްވެސް އެމްނެސްޓީން ވަނީ ބުނެފައެވެ. އަދި ސުލްހަވެރިކަމާއެކު ކުރާ މިފަދަ މުޒާހަރާތަކުގައި ބާރުގެ ބޭނުންކޮށްގެން ނުވާނެކަމަށާއި މުޒާހަރާކުރުމުގެ ހައްގުގެ ބޭނުންކޮށްގެން އެމީހުންނަށް އަނިޔާދީ ހައްޔަރުކޮށްގެން ނުވާނެކަމަށް ވަނީ ބުނެފައެވެ.
ބުރާސްފަތި ދުވަހުގެ ރޭ ރައީސް ނަޝީދަށް އަމާޒުކޮށް ދިން ހަމަލާގައި އެމަނިކުފާނަށް ލިބިވަޑައިގެންނެވި ޒަޚަމްތަކަށް ފަރުވާ ހޯއްދަވަމުން ގެންދަވަނީ އޭޑީކޭ ހޮސްޕިޓަލްގައެވެ. އޭޑީކޭ ހޮސްޕިޓަލްގައި އެ މަނިކުފާނުގެ ގިނަ ސާޖަރީތަކެއް ހެދުމަށް ފަހު މިހާރު ފަރުވާދެމުން ގެންދަނީ އައިސީޔޫގައެވެ. ނަޝީދުގެ ފުއްޕާމެޔާއި ފުރަމޭ އަދި ބަނޑުފުޅަށް ވެސް ވަނީ ގެއްލުންތައްވެފައިވާ ކަމަށް އޭޑީކޭއިން ބުނެއެވެ. އައިއީޑީ ގޮވުމުގައި ބުރައިގެން ދިޔަ ގިނަ އަދަދެއްގެ ޝާޕްނަލް އެ މަނިކުފާނުގެ ހަށިކޮޅަށް ވަދެފައިވާތީ އެ އެއްޗިހި ނެގުމަށް ގިނަ ސާޖަރީތަކެއް ހެދި އިރު، އެކަމަށް 16 ގަޑިއިރަށް ވުރެ ގިނަ ވަގުތު ހޭދަވިއެވެ.
މިހަމަލާ އާ ގުޅިގެން 4 މީހަކު ފާހަގަކުރެވިފައިވާކަމަށް ފުލުހުން ވަނީ ބުނެފައެވެ. ނަމަވެސް މިހާތަނަށް އައިއިރު އެއްވެސް މީހަކު ހައްޔަރުކޮށްފައެއްނުވެއެވެ. މިކަމާއި ގުޅިގެން ބަންޑާރަކޮށީގައި ބޭއްވި މީޑިއާ ބްރީފިން ގައި ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލް ވިދާޅުވީ ނަޝީދަށް ހަމަލާދީފައި ވަނީ އިމްޕްރޮވައިސްޑް އެކްސްޕްްލޮސިވް ޑިވަައިސް (އައިއީޑީ) އަކުން ކަމަށާއި ގޮއްވާލާފައި ވަނީ ވަރަށް ބާރުގަދަ އެއްޗެއްކަމަށެވެ.
