ކޮވިޑް ބަލީގައި އަނެއްކާވެސް މަރެއް، މިއީ 83 ވަނަ މަރު
މިއީ ހުކުރު ދުވަހު ނިޔާވި 4 ވަނަ މީހާ
މާމެންދޫން ކޮވިޑަށް ޕޮޒިޓިވްވި އާއިލާގެ މީހުން ވިލިނގިލީ ކޮވިޑް ފެސިލިޓީއަށް ގެންދަނީ
ކޮވިޑް ބަލީގައި ރާއްޖޭގައި އަނެއްކާވެސް އިތުރު މީހަކު ނިޔާވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން ހާމަކުރިގޮތުގައި މިބަލީގައި ނިޔާވެފައިވަނީ މިރޭ 11:15 ހާއިރު އައިޖީއެމްއެޗްގެ އިމަޖެންސީއަށް ގެނައި އުމުރުން 83 އަހަރުގެ އަންހެނަކެވެ.
މިއީ ހުކުރު ދުވަހު ނިޔާވި ހަތަރު ވަނަ މީހާއެވެ.
ހުކުރު ދުވަހު ފުރަތަމަ މީހާ ނިޔާވެފައިވަނީ ބުރާސްފަތި ދުވަހުގެ ރޭ ދަންވަރު 03:47 ހާއިރުއެވެ. އެއީ އުމުރުން 60 އަހަރުގެ އިންޑިއާއަށް ނިސްބަތްވާ ފިރިހެނެކެވެ. އޭނާއަކީ ދަރުމަވަންތަ ހޮސްޕިޓަލުގައި އެޑްމިޓްކޮށްގެން ފަރުވާދެމުން ދިޔަ މީހެކެވެ. އޭނާ ބައްޔަށް ޕޮޒިޓިވްވީ އޭޕްރީލް މަހުގެ 28 ވަނަ ދުވަހުއެވެ.
ދެވަނަ މީހާ ނިޔާވީ ހުކުރު ދުވަހުގެ ހެނދުނު 07:50 ހާއިރުއެވެ. އެއީ އުމުރުން 37 އަހަރުގެ ބަންގްލަދޭޝް ފިރިހެނެކެވެ. އޭނާ ނިޔާވީ މާފުށީގައި ކަރަންޓީނުގައި ހުއްޓައެވެ. އެއީ އޭޕްރީލް މަހުގެ 26 ވަނަ ދުވަހު ބައްޔަށް ޕޮޒިޓިވް ވެފައިވާ މީހެކެވެ.
އަދި ހުކުރު ދުވަހުގެ މެންދުރުފަހު 2:46 ހާއިރު އުމުރުން 81 އަހަރުގެ ދިވެހި އަންހެނަކު ވަނީ ނިޔާވެފައެވެ.
ރާއްޖޭގައި ކޮވިޑް-19ގެ ހާލަތު ގޯސްވެފައިވާއިރު މިދެދުވަހުގެ ތެރޭގައި މިބަލީގައި ގިނަ ބަޔަކު ވަނީ ނިޔާވެފައެވެ. އެގޮތުން އެޗްޕީއޭއިން ހާމޮށްފައިވާ ގޮތުގައި ބުދަ ދުވަހާއި ބުރާސްފަތި ދުވަހު އެކަނިވެސް ރާއްޖޭގައި މިބަލީގައި 8 މީހަކު ވަނީ ނިޔާވެފައެވެ. މިއީ 48 ގަޑިއިރުތެރޭގައި ރާއްޖޭގައި މިހާ ގިނަ އަދަދެއްގެ ބަޔަކު މިބަލީގައި މަރުވެގެން ރިޕޯޓްކުރި ފުރަތަމަ ފަހަރެވެ.
ރާއްޖެއަށް ކޮވިޑް-19ގެ ހަތަރު ވަނަ ރާޅެއް އަރާފައިވާއިރު މެއި މަސް ފެށުނު ފަހުން ދުވާލެއްގެ މައްޗަށް ރާއްޖޭގައި ކޮވިޑް ޖެހޭ މީހުންގެ އަދަދު އަންނަނީ ރިކޯޑް މިންވަރަކަށް އިތުރުވަމުންނެވެ. އެގޮތުން މެއި މަހުގެ 1 ވަނަ ދުވަހު 402 މީހުން ބައްޔަށް ޕޮޒިޓިވްވިއިރު މެއި މަހުގެ 2 ވަނަ ދުވަހު އެއަދަދު ހުރީ 508 ގައެވެ. މެއި މަހުގެ 3 ވަނަ ދުވަހު 585 މީހުންނަށް ކޮވިޑް ޖެހުނުއިރު މެއި މަހުގެ 4 ވަނަ ދުވަހު އެއަދަދު ވަނީ 601ށް އަރާފައެވެ.
މެއި މަހުގެ 5 ވަނަ ދުވަހު 734 މީހުންނަށް ކޮވިޑް ޖެހިގެން ރިޕޯޓްކުރިއިރު މެއި މަހުގެ 6 ވަނަ ދުވަހު 703 މީހުންނަށް ވަނީ ކޮވިޑް ޖެހިފައެވެ. މެއި މަހުގެ 7 ވަނަ ދުވަހު 766 މީހުންނަށް ވަނީ ކޮވިޑް ޖެހިގެން ރިޕޯޓްކޮށްފައެވެ.
އެކްޓިވް ކޭހުގެ އަދަދު މިހާރު ހުރީ 8261 ގައެވެ. ހޮސްޕިޓަލްގައި އެޑްމިޓްކޮށްގެން 205 މީހަކަށް އަންނަނީ ފަރުވާދެމުންނެވެ.
