މިއީ ހަމައެކަނި މަސީހުގެ މައްޗަށް ނަގާ ވޯޓެއް ނޫން: ރައީސް ޔާމީން
14 މާރިޗު 2017 | އަންގާރަ 09:19މެމްބަރުން ރަށުން ބޭރަށް ވަޑައިނުގަތުމަށް ވަނީ އެދިވަޑައިގެންފައި
ރައްޔިތުންގެ މަޖިލީހުގެ ޖަލްސާ މި އަހަރަށް ހުޅުވުމަށް ބޭއްވި ޖަލްސާއަށް ރައީސް ޔާމީނާއި މަޖިލީހުގެ ރައީސް މަސީހް ވަޑައިގަންނަވަނީ
ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ ވޯޓަކީ ހަމައެކަނި އެ މަނިކުފާނުގެ މައްޗަށް ނަގާ ވޯޓެއް ނޫން ކަމަށް ރައީސް އަބްދުﷲ ޔާމީން ވިދާޅުވެއްޖެ އެވެ.
ހުރިހާ ޕާޓީތަކެއް ތަމްސީލްވާ ގޮތަށް 26 މެމްބަރުންގެ ސޮޔާއެކު މަސީހުގެ އިތުބާރު ނެތްކަމުގެ މައްސަލަ ބުދަ ދުވަހު މަޖިލީހަށް ވައްދާފައިވާއިރު، އެކަމާ ގުޅޭ ގޮތުން ރައީސް ޔާމީން ފުރަތަމަ ފަހަރަށް ވާހަކަފުޅެއް ވިދާޅުވީ ޕީޕީއެމްގެ ޕާލިމެންޓަރީ ގްރޫޕްގެ ވައިބާ ގްރޫޕްގައި ހޯމަ ދުވަހުގެ ރޭގަ އެވެ.
"އެކުވެރި މެމްބަރުންނޭ، ރައްޔިތުންގެ މަޖިލީހުގެ ރައީސް ވޯޓް ނެގުމުގެ ތިން ދުވަސް ކުރިން މާލޭގައި ނުހުރެވޭ ގޮތަށް ދަތުރުފުޅު ނުކުރެއްވުން އެދެން. މިއީ ހަމައެކަނި މަސީހުގެ މައްޗަށް ނަގާ ވޯޓެއް ކަމަށް ގަބޫލު ނުކުރައްވާ،" އެ މަނިކުފާނު ވިދާޅުވެފައިވެ އެވެ.
ރައީސް ޔާމީން މިހެން ވިދާޅުވެފައިވަނީ މަޖިލީހުގެ ރައީސް ކަމުން މަސީހު ވަކިކޮށް، ރައްޔިތުންގެ ބާރު ހިނގާ ތަނަކަށް ރައްޔިތުންގެ މަޖިލިސް ހަދައި، ރައީސް އަބްދުﷲ ޔާމީން ވެސް ޒިންމާދާރުކޮށް، އަދި ރައްޔިތުންގެ އަގުތައް ގެއްލޭ ގޮތަށް ގާނޫނު އަސާސީ އާއި ގާނޫނުތަކަށް ގެނެސްފައިވާ ބަދަލުތައް ބަދަލުކުރާނެ ކަމަށް "ގުޅިފައިވާ ކޯލިޝަނުން"ގެ މެމްބަރުން ވިދާޅުވެފައި ވަނިކޮށެވެ.
ޕީޕީއެމްގެ ވައިބާ ގްރޫޕްގައި ރައީސް ލިޔުއްވި މެސެޖް ހޯމަ ދުވަހުގެ ރޭ ވަގުތުން ލީކްވުމާއެކު އެކަމާ ހިތްހަމަޖެހިވަޑައިނުގެން ޕާލިމެންޓަރީ ގްރޫޕްގެ ލީޑަރު އަހްމަދު ނިހާނު އެ ވައިބާ ގްރޫޕްގައި ލިޔުއްވި ކަމަށް ވެސް ޕީޕީއެމްގެ މެމްބަރަކު ވިދާޅުވި އެވެ.
"މައްސަލައަކަށް ދިމާ މިވަނީ މިތަނުގެ އެތެރޭގައި [ޕީޕީއެމް] އެކަކު އަނެކަކަށް ވެސް އިތުބާރު ނުކުރާތީ،" މަޖިލީހުގެ މެމްބަރަކު ވިދާޅުވި އެވެ.
ރާއްޖެޓިވީގެ ފަލަސުރުޚީ ޕްރޮގްރާމްގައި ހޮނިހިރު ދުވަހުގެ ރޭ ދިއްގަރު ދާއިރާގެ މެމްބަރު ފާރިސް މައުމޫން ވިދާޅުވީ މަސީޙުގެ އިތުބާރު ނެތްކަމުގެ މައްސަލަ ކާމިޔާބުކުރަން ބޭނުންވާ އަދަދަށް ވުރެ އިތުރަށް ވެސް މެމްބަރުން ހަމަވެފައިވާ ކަމަށެވެ. އެހެންވެ، މިފަހަރު މި ވޯޓް ކާމިޔާބުކުރެވޭނެ ފުރިހަމަ އިތުބާރު އޮތް ކަމަށް ތަކުރާރުކޮށް އޭނާ ވިދާޅުވި އެވެ.
މަސީހު މަގާމުން ދުރުކުރަން 42 މެމްބަރުންގެ ވޯޓް ބޭނުންވެއެވެ. މި އަދަދަށް މެމްބަރުން ހަމަވާނީ ޕީޕީއެމް އާއި އެމްޑީއޭގެ މެމްބަރުންގެ ވޯޓާއެކު އެވެ.
މި ވޯޓާ ގުޅިގެން ސަރުކާރުން ދައްކަފާނެ ބިރަކަށް ޖެހިލުންވެވަޑައިނުގަންނަވާ ކަމަށާއި ޖަލު ގޮޅިއަށް ދާން ޖެހުނަސް ތައްޔާރު ކަމަށް ކުރީގެ ރައީސް މައުމޫން އަބްދުލް ގައްޔޫމްގެ ދަރިކަލުން ފާރިސް ވިދާޅުވި އެވެ.
"މަޖިލީހުގެ މެމްބަރުންގެ އަތުގައި މިހާރު މިއޮތީ ގައުމުގެ މުސްތަގުބަލު،" ފާރިސް ވިދާޅުވި އެވެ.
މިކަމަށް ވިޔަފާރިވެރިންގެ ފަރާތުންނާއި ރައްޔިތުންގެ ފަރާތުން މެމްބަރުންނަށް ހިތްވަރު ދެއްވުމަށް ފާރިސް އެދިވަޑައިގެންނެވި އެވެ.
