ގޮއްވާލީ ސައިކަލެއްގައި ހަރުކޮށްފައިވާ އައިއީޑީއެއް
ބޮޑީގާޑުންގެ އަމަލަށް ހިތްހަމަޖެހޭކަމަށް ވިދާޅުވި
ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް
ރައީސް ނަޝީދަށް ހަމަލަ ދިނުމަށްޓަކައި ގޮއްވާލީ އިމްޕްރޮވައިސްޑް އެކްސްޕްލޯސިވް ޑިވައިސެއް ސައިކަލެއްގައި ހަރުކޮށްގެން ކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އަބްދު ﷲ ޝަމާލް ވިދާޅުވެއްޖެއެވެ.
ޗީފް އޮފް ޑިފެންސް ފޯސް ވިދާޅުވީ ރައީސް ނަޝީދަށް އަމާޒުކޮށް ދިން ހަމަލާއަކީ ޓެރަރިސްޓް ހަމަލާއެއް ކަމަށާއި އެ އަމަލު ހިންގި ބަޔަކު ގާނޫނުގެ ކުރިމައްޗަށް ގެނައުމަށް ފަސްޖެހިވަޑައި ނުގަންނަވާނެ ކަމަށެވެ.
ޗީފް އޮފް ޑިފެންސް ފޯސް ވިދާޅުވީ އެހެން ރަށެއްގައި އޮތް ހަފްލާއެއްގައި ބައިވެރިވަޑައިގަތުމަށް ރައީސް ނަޝީދު ރޭ ގެއިން ނުކުމެވަޑައިގެންނެވީ 8:25 ވީ އިރު ކަމަށާއި އަރިހުގައި ބޮޑީގާޑުން ވެސް ތިބި ކަމަށެވެ. ކެނެރީގެއިން ނިކުމެވަޑައިގެން މަޖީދީ މަގާ ދިމާލަށް ވަޑައިގެންނެވިއިރު ފަހަތުގައި އަދި ކުރީގައި ވެސް ސެކިއުރިޓީ މީހުން ތިބި ކަމަށާއި ނަޝީދުގެ ކާރުކޮޅު އޮތީ މަޖީދިމަގުގައި ޕާކުކޮށްފައި ކަމަށް ޖެނެރަލް ޝަމާލް ވިދާޅުވިއެވެ.
ކާރާއި ހަމަޔަށް ވަޑައިގެންނެވުނުތަނާ 8:27 ހާއިރު ގޮއްވާލީ ކަންމަތީގައި އިން ސައިކަލެއްގައި ހަރުކޮށްފައިވާ އިމްޕްރޮވައިސްޑް އެކްސްޕްލޯސިވް ޑިވައިސެއްް ކަމަށާއި އެ ގޮވުމުގެ މައިގަނޑު ބާރު ހުރީ ދިމާ މައްޗަށް ކަމަށް ޑިފެންސް ޗީފް ވިދާޅުވިއެވެ. ބަޔަކު އަމިއްލަޔަށް އުފެއްދި މި އައިއީޑީއަކީ ސަލްޓަން ޕާކްގައި ގޮއްވާލި އައިއީޑީއަށްވުރެ އެތައް ގުނައެއް ބާރުގަދަ އެއްޗެއްކަމަށް ވެސް ވިދާޅުވިއެވެ.
މިފަހަރު ގޮއްވާލި އައިއީޑީގައި ރޭޒާ ފުށް ވަރަށް ގިނައިން ބޭނުންކޮށްފައި ހުރުމުން އޭގެ ނުރައްކާ އިތުރުވި ކަމަށްވެސް ޖެނެރަލް ޝަމާލް ވިދާޅުވިއެވެ. މި އެއްޗެއް ގޮއްވާލީ ރިމޯޓެއް ބޭނުންކޮށްގެން ކަމަށް ބެލެވޭކަމަށް ވެސް ވިދާޅުވިއެވެ.
ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ޗީފް އޮފް ޑިފެންސް ފޯސް ވަނީ ރައީސް ނަޝީދަށް ހުރި ނުރައްކާތަކުގެ މައުލޫމާތު އަބަދުވެސް ލިބެމުންދާކަމަށް ވިދާޅުވެފައެވެ. ރައީސް ނަޝީދަކީ އެންމެ މަތީ ދަރަޖައިގެ ސިކިއުރިޓީ އަބަދުވެސް އެރުވޭ އެއް ބޭފުޅަކަށް ވާއިރު ސީޕީ ޓީމުން އެމަނިކުފާނާއެކު ހަރަކާތްތެރިވަނީ ހުއްދަ ހަތިޔާރާއެކު ކަމަށާއި އެކަން އެހެން ކުރަނީ ރައީސް ނަޝީދަށް ހުރި ނުރައްކަލުގެ ބޮޑުކަމުން ކަމަށް ވެސް ޖެނެރަލް ޝަމާލް ވިދާޅުވިއެވެ.
ޖެނެރަލް ޝަމާލް އިތުރަށް ވިދާޅުވީ ރައީސް ނަޝީދަށް އެކި ފަށަލަތައް ގާއިމްކޮށްގެން ސިކިއުރިޓީ އަރުވާއިރު ރޭގެ ހާދިސާއަށް ފަހު ވެސް އަމަލުކޮށްފައި ވަނީ ޕްރޮޓޮކޯލްގެ ދަށުން ކަމަށެވެ. އެގޮތުން ބޮޑީގާޑުންގެ ގޮތުގައި ހަރަކާތްތެރިވި ސިފައިން އަމަލުކުރި ގޮތާއިމެދު ހިތްހަމަޖެހޭކަމަށް ވިދާޅުވިއެވެ. ބޮޑީގާޑުންނަށް އެވަރަށް އަނިޔާވިއިރު ވެސް ރައީސް ނަޝީދަށް ފަރުވާ ފެށުމުން ނޫނީ އަމިއްލައަށް ފަރުވާ ހޯދަން އުޅެފައި ނުވާކަމަށް ވެސް ވިދާޅުވިއެވެ.
