މިއަހަރުގެ މަރޗް މަހުގެ 12 ވަނަ ދުވަހު ބޭއްވި އިވެންޓެއްގައި ރައީސް ނަޝީދުގެ ހަރަކާތްތައް ބަލާ ފޮޓޯ ނަގާހަދާފައިވާކަން އެނގިފައިވޭ
ރައީސް ނަޝީދު ގެކޮޅު ކައިރީގައި އެއްޗެއް ގޮއްވާލުމާ ގުޅިގެން ސިފައިން ހަރަކާތްތެރިވަނީ
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އަވަހާރަކޮށްލުމަށް ދިން ހަމަލާގައި ބައިވެރިވެފައިވާކަމަށް ތުހުމަތުކުރެވޭ މީހުން އެއް ފަހަރަށްވުރެ ގިނަ ފަހަރަށް ނީލޯފަރު ހިނގުމުގައި ހަރަކާތްތެރިވެ ގ.ކެނެރީގެ ސަރަހައްދު ސަރވެއިލްކޮށްފައިވާކަމަށް އެހަމަލާގައި ރައީސް ނަޝީދުގެ ސެކިޔުރިޓީ ފެއިލްވި ގޮތާއި ގުޅޭގޮތުން އެކުލަވާލި އިންކުއަރީން ހާމަވެއްޖެއެވެ.
ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީ ނުވަތަ 241 ކޮމިޓީން ކުރިޔަށް ގެންދިޔަ އިންކުއަރީ ރިޕޯޓް މިހާރު ވަނީ އާންމުކޮށްފައެވެ. މިރިޕޯޓްގައި ރައީސް ނަޝީދަށް ހަމަލާދިނުމުގެ ކުރިން ކަން ހިނގާފައިވާ ގޮތް ބަލާފައިވާއިރު ރިޕޯޓްގައި ބުނެފައިވަނީ އޭގެކުރިން މިއަހަރުގެ މާޗު މަހުގެ 12 ވަނަ ދުވަހުވެސް ރައީސް ނަޝީދުގެ ހަރަކާތްތައް ބަލައި ފޮޓޯ ނަގާހަދާފައިވާކަން އެނގިފައިވާކަމަށެވެ.
އޭރުވަނީ ރައީސް ނަޝީދުގެ ތްރެޓް ލެވެލް ކްރިޓިކަލްގައެވެ. އަދި އެސަރަހައްދުގައި ތިބި ސެކިޔުރިޓީންނަށް އެމީހުން ފެނިފައިވާކަމަށްވެސް ބުނެފައިވެއެވެ.
މީގެއިތުރުން ރައީސް ނަޝީދު އަވަހާރަކޮށްލުމަށް ބަޔަކު ރާވަމުންދާކަމުގެ މައުލޫމާތު ރައްޓެއްސެއްގެ ފަރާތުން މޭ 3 ވަނަ ދުވަހު ލިބިވަޑައިގަންނަވާފައިވާކަމަށް ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރ އިލްޔާސް ލަބީބު ޑިފެންސް މިނިސްޓަރ މާރިޔާ އަޙުމަދު ދީދީއަށް މޭ 4 ވަނަ ދުވަހު ފޯނުން ހިއްސާކުރައްވާފައިވެއެވެ. އެގޮތުން ހަމަލާދޭ މީހުންނަށް 3 މިލިއަން ޑޮލަރުގެ އަގެއް ހުށަހަޅާފައިވާ ކަމަށާއި އަދި އެޑްވާންސްގެ ގޮތުގައި އަގުގެ 50 އިންސައްތަ ދިނުމަށް މަޝްވަރާކުރަމުންދާ ކަމަށް އެމައުލޫމާތު ދިން މީހާ ބުނެފައިވާކަމަށްވެސް އިލްޔާސް ޑިފެންސް މިނިސްޓަރ އަރިހު ދެންނެވިކަމަށް ރިޕޯޓްގައި ބުނެފައިވެއެވެ.
މީގެއިތުރުން ހަމަލާދިނުމުގައި ބޭނުންކުރި އައިއީޑީ ހަރުކޮށްފައިވާ ސައިކަލް ހަމަލާދިން ރޭގެ އެއް ރޭ ކުރިން އެމަގުގައި ޕާކުކޮށްފައިވާކަމަށް ބުނެފައިވެއެވެ.
މީގެއިތުރުން މެއި 6 ވަނަ ދުވަހުގެ ރޭ އައިއީޑީ ގޮއްވާލުމުގެ ގާތްގަނޑަކަށް 1 ގަޑިއިރު ކުރިން، އެއައިއީޑީ ގޮއްވާލިކަމަށް ތުހުމަތުކުރެވޭ އަދުހަމް އަޙުމަދު ރަޝީދު އެސަރަހައްދަށް ގޮސްފައިވެއެވެ. އަދި އަދުހަމް ހުއްޓިހުރީ ނީލޯފަރު ހިނގުން ފެންނަގޮތަށް އަތަމާ ޕެލަސް ގޯޅި ތެރޭގައެވެ.
ރިޕޯޓުގައި ރައީސް ނަޝީދުގެ ތްރެޓް ހިސްޓްރީ ހިމަނާފައިވާއިރު 2018 ވަނަ އަހަރުގެ ނޮވެމްބަރ މަހުގެ 1 ވަނަ ދުވަހު ރާއްޖެ ވަޑައިގެންނެވިފަހުން އެކި ފަހަރު ތްރެޓްތައް ލިބިވަޑައިގަންނަވާފައިވާކަން ވަނީ އެނިގަފައެވެ.
ނަމަވެސް މިހަމަލާ ދޭން އުޅޭކަމުގެ އިންޓެލް އެއްވެސް މައުލޫމާތެއް އިންޓެލް އިދާރާތަކަށް ލިބިފައިނުވާކަން ވަނީ ފާހަގަކޮށްފައެވެ.
