2017 ވަނަ އަހަރުގެ އޭޕްރީލްމަހުގެ ތެރޭގައި މާލޭގައި ބޮން ގޮއްވަން އުޅުނު ކަމުގެ ތުހުމަތުގައި ދައުވާ އުފުލާފައިވާ މީހުންގެ މައްޗަށް ކުރާ ދައުވާގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

އައިއީޑީއެއް ތައްޔާރުކުރުމަށް ބޭނުންވާ ތަކެއްޗާއި ކެމިކަލް، ތަނެއްގެ ތެރޭގައި ތައްޔާރުކޮށް އައިއީޑީއެއް ހަދާ އެ ގޮއްވާލުމަށް ރާވަމުންދާކަމުގެ ތުހުމަތުގައި ދައުވާ އުފުލާފައިވަނީ 4 މީހެއްގެ މައްޗަށެވެ. އެއީ އިއުތިސާމް މުޙައްމަދު ސައީދާއި، މުޙައްމަދު ތަސްލީމާއި، ނާސިއު މުޙައްމަދުގެ އިތުރުން، ޝިމާން ޝަރީފެވެ. އެ 4 މީހުންގެ މައްޗަށް އުފުލާފައިވަނީ ޓެރަރިޒަމްގެ އަމަލެއް ކުރަން އުޅުމުގެ ކުށުގެ ދައުވާއެވެ.

ދައުލަތުން ބުނާ ގޮތުގައި އެމީހުން ރާވަމުންދިޔައީ ޖޭޕީ އޮފީސް އިމާރަތް ހުންނަ މާފަންނު ކުނޫޒުގޭގައި ޖަލްސާއެއް ކުރިއަށް ދިޔަ ވަގުތު، އެތަނުގައި އައިއީޑީއެއް ގޮއްވާލުމަށެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.

މި އަޑުއެހުމުގައި މައްސަލަ ބައްލަވާ ގާޒީ ވަނީ ޖިނާއީ މައްސަލަތަކުގައި ދައުވާ އުފުލާފައިވާ ފަރާތްތަކަށް ލިބިގެންވާ ޙައްޤުތައް ސާފު ކޮށްދެއްވާފައެވެ.

އެއަށްފަހު ދައުލަތުން ވަނީ އެމީހުންގެ މައްޗަށް ކުރާ ދައުވާތައް ސާފު ކޮށްދީފައެވެ. އެގޮތުން ފުރަތަމަ ޝިމާން ޝަރީފްގެ މައްޗަށް ކުރާ ޓެރަރިޒަމްގެ އަމަލެއް ކުރަން އުޅުމުގެ ކުށުގެ ދައުވާ ވަނީ އިއްވާފައެވެ.

މި ދައުވާ ސާބިތުވެއްޖެނަމަ 17 އަހަރާއި 20 އަހަރާއި ދެމެދުގެ މުއްދަތަކަށް ޖަލަށް ލެވޭނެއެވެ.

ޝިމާން ޝަރީފް ވަނީ ދައުވާއަށް އިންކާރު ކޮށްފައެވެ. ވުމާއެކު، ދައުލަތުން ވަނީ ދައުވާ ސާބިތު ކުރުމަށް ހުށައަޅާ ހެކި ހާމަކޮށްފައެވެ. ޝިމާންއާ ދެކޮޅަށް ދައުލަތުން ވަނީ 31 ހެއްކެއް ހުށައަޅާފައެވެ.

ގާޒީ ވަނީ ދިފާއީ ހެކި ހުށައެޅުއްވުމަށް ޝިމާން އަށް 3 ދުވަހުގެ މުއްދަތެއް ދެއްވާފައެވެ. އަދި އޭނާގެ މައްޗަށް ކުރާ ދައުވާއަކީ މަދަނީ މިންގަނޑުން ކުރިއަށް ގެންދެވޭނެ ދައުވާއެއްކަމަށް ގާޒީ ވަނީ ނިންމަވާފައެވެ.

އެއަށްފަހު މުޙައްމަދު ތަސްލީމުއާއި، އިއުތިސާމްގެ މައްޗަށް ކުރާ ދައުވާ ދައުލަތުން ވަނީ އިއްވާފައެވެ. ތަސްލީމުވެސް އަދި އިއުތިސާމުވެސް ވަނީ އެމީހުންގެ މައްޗަށް ކުރާ ދައުވާއަށް އިންކާރު ކޮށްފައެވެ. ވުމާއެކު ދައުލަތުން ވަނީ އެ ދެމީހުންނާ ދެކޮޅަށް ހުރި ހެކިތައް ހާމަ ކުރައްވާފައެވެ.

ގާޒީ ވަނީ މި ދައުވާތަކަކީވެސް މަދަނީ މިންގަނޑުން ކުރިއަށް ގެންދެވޭނެ ދައުވާތަކެއް ކަމަށް ކަނޑައަޅުއްވާފައެވެ. އަދި ޖޫން މަހުގެ 30 ވަނަ ދުވަހުގެ ނިޔަލަށް ޝަރީއަތުގެ ކުރީގެ ހުށައެޅުންތައް ހުށައެޅުމަށް ދައުލަތާއި، ދައުވާލިބޭ ފަރާތްތަަކަށް ވަނީ ފުރުސަތު ދެއްވާފައެވެ.

މި އަޑުއެހުމުގައި ނާސިއުގެ ވަކީލު ބައިވެރިވެލައްވާފައި ނުވާތީ އޭނާގެ ބައި ކުރިއަށް ގެންގޮސްފައެއް ނުވެއެވެ.