"ރައީސް ނަޝީދު ގޮއްވާލީ ހަވާލުވެ ތިބި މީހުންގެ އިހުމާލުން, އުމުރަށް މިވާހަކަ ދައްކާނަން"
ރައީސް ނަޝީދަށް ދިން ހަމަލާއާ ގުޅިގެން ސަލާމަތީ ބާރުތަކަށް އަމާޒުކޮށް ގިނަ ބަޔަކު ގެންދަނީ ފާޑުކިޔަމުން
ރައީސް މުހައްމަދު ނަޝީދު ޖަރުމަންވިލާތުގައި
ރައްޔިތުންގެ މަޖިލީހުގެ ރައީސް, ރައީސް މުހައްމަދު ނަޝީދަށް ހަމަލާ ދީފައިވަނީ, ހަވާލުވެ ތިބި މީހުންގެ އިހުމާލުން ކަމަށް ވިދާޅުވެ, އިނގިރޭސިވިލާތުގެ ލަންޑަނުގައި ހުންނަ ދިވެހިރާއްޖޭގެ އެމްބަސީގެ ސްޕެޝަލް ކައުންސެލަރ ޓު ދަ އެމްބެސެޑަރ ނައުޝާދު ވަހީދު, ރައީސް އޮފީހުގެ ޗީފް އޮފް ސްޓާފް އަލީ ޒާހިރަށް ރައްދު ދެއްވައިފިއެވެ.
ސަލާމަތީ ޚިދުމަތްތަކުގެ އިސްބޭފުޅުން މުހިއްމު ބައްދަލުވުންތަކަށް ވަޑައިނުގަންނަވާ ކަމަށް ބުނެ, މަސައްކަތަށް ފަރުވާ ބަހައްޓާތޯ ޓްވިޓާގައި ކުރި ސުވާލަށް ޖަވާބު ދެއްވަމުން އަލީ ޒާހިރު ވިދާޅުވީ ސިފައިންގެ ތެރޭގައި އެފަދަ މައްސަލައެއް ނުޖެހޭ ކަމަށެވެ. އަދި ސަލާމަތީ ޚިދުމަތްތަކުގެ ބޭފުޅުންނާ މެދު ނަފްރަތު އުފައްދައި، އެބޭފުޅުންގެ އަގު ވައްޓާލަން ކުރާ މަސައްކަތް ހުއްޓާލަން ޖެހޭ ކަމަށް އަލީ ޒާހިރު ވިދާޅުވިއެވެ.
މި ކަމަށް ރައްދު ދެއްވާ ނައުޝާދު ވިދާޅުވީ, ނަފްރަތު އުފައްދަވަނީ ނޫން ކަމަށާއި, އެހެން ނަމަވެސް, އެ ހަމަލާ ދިނީ ހަވާލުވެތިބި މީހުންގެ އިހުމާލުން ކަމަށެވެ. އަދި އެކަން ކުރި މީހަކު ހޯދުމަށްވެސް ގޮވާލެއްވިއެވެ.
ރައީސް ނަޝީދަށް ދިން ހަމަލާއަކީ, އެމަނިކުފާނަށް ނިސްބަތްކޮށް "ލާދީނީ" އޭ ގޮވާ އޮބި ނޯންނަ ވަރުވުމުން ދިން ހަމަލާއެއް ކަމަށް ވެސް ނައުޝާދު ތުހުމަތު ކުރެއްވިއެވެ.
ނައުޝާދަކީ ކުރީގެ ރައީސް ޑރ.މުހައްމަދު ވަހީދު ހަސަންގެ ކޮއްކޯފުޅެވެ. ހަަމަ އެހެންމެ ރައީސް ނަޝީދުގެ ވަރަށް ގާތް ބޭފުޅެކެވެ. ރައީސް ނަޝީދަށް ދިން ހަމަލާއަށްފަހު ނައުޝާދު ގެންދަވަނީ, އެ ހަމަލާ ކުށްވެރިކުރައްވައި ޚިޔާލުފާޅު ކުރައްވަމުންނެވެ. އެގޮތުން ހަމަލާއަށް ފަންޑުކުރި މީހަކު ނުހޯދި ގިނަ ދުވަސް ވަމުން ދާތީ ކަންބޮޑުވުން ފާޅުކުރައްވާފައި ވެއެެވެ.
މެއި މަހުގެ 6 ވަނަ ދުވަހު، ރައީސް ނަޝީދަށް ދިން ހަމަލާއާ ގުޅިގެން ސަލާމަތީ ބާރުތަކަށް އަމާޒުކޮށް ބައެއް ފަރާތްތަކުން ގެންދަނީ ވަރަށް ބޮޑެތި ފާޑުކިޔުންތަކެއް އަމާޒުކުރަމުންނެވެ.
ރައީސް ނަޝީދު އަވަހާރަކޮށްލަން ބޮމެއް ގޮއްވާލައިގެން ދިން ހަމަލާގައި ގިނަ ޒަޚަމްތަކެއް ލިބިވަޑައިގެންނެވިއެވެ. މި ޒަޚަމްތަކަށް އޭޑީކޭ ހޮސްޕިޓަލުގައި ފަރުވާ ހޯއްދެވުމަށް ފަހު ނަޝީދު މިހާރު ހުންނެވީ ޖަރުމަނު ވިލާތުގައެވެ.
ހަމަލާއާ ގުޅިގެން މިހާތަނަށް ހަތަރު މީހަކު ހައްޔަރުކޮށްފައި ވެއެވެ. އެއީ, ބޮން ގޮއްވުމުގައި އަމަލީގޮތުން ހަރަކާތްތެރިވި އަދުހަމް އަހުމަދުގެ އިތުރުން، މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އަދި ލ.ގަން، ދުންފިނި އުފާ، އަހުމަދު ފާތިހެވެ.
