އެކްސިޑެންޓުގައި މަރުވި ޒުވާނާ އުޅުނީ އެހެން ސައިކަލެއްގައި ޖައްސައި އެކްސިޑެންޓް ކޮށްލަން: ފުލުހުން
16 ފެބުރުއަރީ 2020 | އާދީއްތަ 08:12ޖައްސަން އުޅުނު ސައިކަލު ދުއްވަން އިނީ 31 އަހަރުގެ ދިވެހި ފިރިހެނެއް
ހޮނިހިރު ދުވަހުގެރޭ ހިނގި އެކްސިޑެންޓުގައި މަރުވި މުޙައްމަދު މިދުހަތު (ހ ބްލޫބާރޑުގެ)
ހޮނިހިރު ދުވަހުގެރޭ މާލޭގައި ދެ ސައިކަލެއް ޖެހި ހިނގި އެކްސިޑެންޓުގައި މަރުވި ޒުވާނާ އުޅުނީ އެހެން ސައިކަލެއްގައި ޖައްސައި އެކްސިޑެންޓް ކުރުމަށް ކަމަށް ފުލުހުން ބުނެފިއެވެ.
އެކަމާ ގުޅޭގޮތުން ފުލުހުން ބުނީ، އެކްސިޑެންޓް ވެފައި ވަނީ ބުރުޒު މަގުން އިރުން ހުޅަނގަށް ދުއްވާފައި ދިޔަ ސައިކަލެއްގައި އެ މަގުން އިރުން ހުޅަނގަށް ދުއްވާފައި ދިޔަ ސައިކަލަކުން ޖެއްސުމުގެ ސަބަބުން ކަމަށެވެ.
އެގޮތުން ސައިކަލުން ޖެއްސި އުމުރުން 26 އަހަރުގެ މުޙައްމަދު މިދުހަތު (ހ ބްލޫބާރޑުގެ) އަށް މި އެކްސިޑެންޓުގައި ލިބުނު ސީރިއަސް ޒަޙަމްތަކަށް އައިޖީއެމްއެޗްގައި ފަރުވާދެމުން ދަނިކޮށް މަރުވެފައިވާއިރު، ފުލުހުން ބުނީ، އޭނާ ޖެއްސި ސައިކަލު ދުއްވަން އިނީ 31 އަހަރުގެ ދިވެހި ފިރިހެނެއް ކަމަށާއި، އޭނާގެ ސައިކަލު ފަހަތުގައި 22 އަހަރުގެ ދިވެހި އަންހެން ކުއްޖެއް އިން ކަމަށެވެ.
މި އެކްސިޑެންޓް ހިނގީ “ޕީޓްރަލް” ޞަރަޙައްދު، ބުރުޒު މަގުގައެވެ. މި އެކްސިޑެންޓް ހިނގާފައިވަނީ ހޮނިހިދު ދުވަހުގެ ރޭ 10:30 ހާއިރުކަމަށް މަޢުލޫމާތު ލިބެއެވެ.
ފުލުހުން އިތުރަށް ބުނީ، މި އެކްސިޑެންޓުގައި ދެ ސައިކަލުގައި އިން ދެ މީހުންގެ އަތުގައިވެސް އެއްގަމު އުޅަނދު ދުއްވުމުގެ ލައިސަންސް ނެތް ކަމަށެވެ.
އަދި ދެ ސައިކަލަށްވެސް އެކި ވަރުގެ ގެއްލުންތައް ވެފައިވާކަމަށް ފުލުހުން މަޢުލޫމާތުދެއެވެ.
މި މައްސަލަ ފުލުހުން ދަނީ އިތުރަށް ތަހުޤީޤު ކުރަމުންނެވެ.
