ސައުވީސް ގަޑި އިރުތެރޭ ކޮވިޑުގެ ފަސްވަނަ މަރު!
އެކްޓިވް ކޭސްތަކުގެ އަދަދު ވަނީ 7،607ށް އަރާފައި
ކޮވިޑް ބަލީގައި ނިޔާވި މީހެއްގެ ޖަނާޒާ
މާލޭގައި ކޮވިޑަށް ފަރުވާ ދެމުން ދިޔަ އިތުރު މީހަކު ނިޔާވެއްޖެއެވެ.
މިއީ ފާއިތުވި 24 ގަޑިއިރުގެ ތެރޭގައި ނިޔާވި ފަސް ވަނަ މީހާއެވެ. މި މަރާއެކު ރާއްޖެއިން ކޮވިޑު ޖެހިގެން މަރުވި މީހުންގެ އަދަދު ވަނީ 82ށް އަރާފައެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ ދަރުމަވަންތަ ހޮސްޕިޓަލުގައި ކޮވިޑް ބައްޔަށް ފަރުވާދެމުން ދިޔަ މީހަކު ހުކުރު ދުވަހުގެ މެންދުރުފަހު 2:46 ހާއިރު ނިޔާވެފައި ވާކަމަށެވެ. އެއީ އުމުރުން 81 އަހަރުގެ ދިވެހި އަންހެނެކެވެ.
ބަލީގައި ހުކުރުދުވަހު ތިން މީހަކު ނިޔާވެފައި ވާއިރު، މީގެ ތެރެއިން ފުރަތަމަ މީހާ ނިޔާވެފައިވަނީ ހުކުރު ދުވަހުގެ ރޭ ދަންވަރު 03:47 ހާއިރުއެވެ. އެއީ އުމުރުން 60 އަހަރުގެ އިންޑިއާއަށް ނިސްބަތްވާ ފިރިހެނެކެވެ. އޭނާއަކީ ދަރުމަވަންތަ ހޮސްޕިޓަލުގައި އެޑްމިޓްކޮށްގެން ފަރުވާދެމުން ދިޔަ މީހެކެވެ. އޭނާ ބައްޔަށް ޕޮޒިޓިވްވީ އޭޕްރީލް މަހުގެ 28 ވަނަ ދުވަހުއެވެ.
ދެވަނަ މީހާ ނިޔާވީ ހުކުރު ދުވަހުގެ ހެނދުނު 07:50 ހާއިރުއެވެ. އެއީ އުމުރުން 37 އަހަރުގެ ބަންގްލަދޭޝް ފިރިހެނެކެވެ. އޭނާ ނިޔާވީ މާފުށީގައި ކަރަންޓީނުގައި ހުއްޓައެވެ. އެއީ އޭޕްރީލް މަހުގެ 26 ވަނަ ދުވަހު ބައްޔަށް ޕޮޒިޓިވް ވެފައިވާ މީހެކެވެ.
ރާއްޖެއަށް ކޮވިޑްގެ އިތުރު ރާޅެއް އަރާފައި ވާއިރު، ބުރާސްފަތި ދުވަހު އެކަނި ވެސް 703 މީހުން ކޮވިޑަށް ޕޮޒިޓިވްވި އެވެ. އެއާއެކު އަދި އެކްޓިވް ކޭސްތަކުގެ އަދަދު ވަނީ 7،607ށް އަރާފައެވެ. ރާއްޖޭން އެ ބަލި ޖެހުނު މީހުންގެ ޖުމްލަ އަދަދަކީ 33،368 އެވެ.
