ރައީސް ނަޝީދުގެ ސާރޖަރީތައް ނިމިފައިވާކަމަށް އާއިލާއިން ހާމަކޮށްފި
ރަނގަޅުވާން އަދި ވަރަށް ދުވަސް ނަގާނެ
ރައީސް ނަޝީދަށް އަމާޒުކޮށް ދިން އަނިޔާތަކަށް މިހާރު އޭޑީކޭގައި ފަރުވާ ހޯއްދަވަމުން ގެންދަވަނީ
ރައީސް ނަޝީދުގެ ސާރޖަރީތައް ނިމިފައިވާ ކަމަށް އާއިލާއިން ބުނެފިއެވެ.
ރައީސް ނަަޝީދުގެ އާއިލާގެ ފަރާތުން ބުނެފައިވަނީ، ރައީސް ނަޝީދުގެ ސާރޖަރީތައް މިހާރު ނިމިފައިވާ ކަމަށާއި، ރައީސް ނަޝީދުގެ ހާލުކޮޅު މުޅިން ރަނގަޅުވުމަށް ދުވަސް ނަގާނެ ކަމަށެވެ.
ރައީސް ނަޝީދުގެ ހާލުކޮޅާ ގުޅޭ މައުލޫމާތު ހިއްސާކުރަމުން އޭޑީކޭ ހޮސްޕިޓަލުން ބުނީ ރައީސް މުޙައްމަދު ނަޝީދުގެ ހަށިކޮޅަށް އަމާޒުކޮށް ދެވުނު ޙަމަލާގައި ލިބިވަޑައިގެންނެވި ޒަޚަމްތަކާ ގުޅިގެން މިހާތަނަށް ގިނަ އޮޕަރޭޝަންތަކެއް ކޮށްފައިވާކަމަށެވެ. އަދި މިހާތަނަށް ކުރި އޮޕަރޭޝަންތައް ކާމިޔާބުކަމަށް ވެސް އެ ހޮސްޕިޓަލުން ބުނެއެވެ. އެހެންނަމަވެސް އަދިވެސް މުހިއްމު އެއް ޕްރޮސީޖަރ ހަދަންޖެހޭކަމަށް އެ ހޮސްޕިޓަލުން ކުރިން ބުނެފައިވެއެވެ.
ރައީސް ނަޝީދަށްް ލިބިވަޑައިގެންނެވި ޒަޚަމްތަކާ ގުޅިގެން މިހާތަނަށް ކުރި އޮޕަރޭޝަންތަކުގެ ތަފްސީލެއް އަދި އޭޑީކޭއިން ހާމަކޮށްފައެއް ނުވެއެވެ.
މަޖީދީމަގާއި ނީލޯފަރު މަގު ގުޅޭ ސަރަހައްދުގައި ދިން އެ ހަމަލާގައި ރައީސް ނަޝީދުގެ އިތުރުން އެމަނިކުފަނުގެ 3 ބޮޑީގާޑަކަށާއި އެ ސަރަހައްދުގައި އެވަގުތު ހުރި އާންމު މީހެއްގެ އިތުރުން ފަތުުރުވެރިއަކަށް ވެސް ވަނީ އަނިޔާވެފަ އެވެ. ހާދިސާގައި ޒަޚަމްވި އެހެން ފަރާތްތަކަށް ވެސް އޭޑީކޭގައި ފަރުވާ ދެމުންދާއިރު ފުލުހުންނާއި ސިފައިން ދަނީ މި ހާދިސާ ތަހުގީގު ކުރަމުންނެވެ.
