ބުރާފަތި ދުވަހުގެ ރޭ އެމްޑީޕީގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދިން ހަމަލާއަކީ އެމަނިކުފާނުގެ ފުރާނަފުޅަށް އަމާޒުކޮށް ދިން ހަމަލާއެއްކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ރައީސް ނަޝީދަށް އަމާޒުކޮށް ދިން ހަމަލާއާ ގުޅިގެން ފުލުުހުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ މިހަމަލާ ދީފައިވާ ގޮތާއި، ހަމަލާ އަމާޒުވެފައިވާ ގޮތަށް ބަލާއިރު، މިއީ ސީދާ ރައީސް ނަޝީދަށް އަމާޒުކޮށް ދިން ޓެރެރިސްޓު ހަމަލާއެއްކަން ހާމަވާކަމަށެވެ.
މިހަމަލާގެ ރިޕޯޓްލިބުނު ހިސާބުން ފެށިގެން މިހާތަނަށް ވެސް ފުލުހުން ދަނީ މިކަން ފުލުހުން ތަހުގީގުކުރާ އެންމެ ސީރިއަސް އަދި އެންމެ އިސްކަންދޭ މައްސަލައިގެ ގޮތުގައި ބަލައިތަހުގީގު ކުރަމުން ކަމަށެވެ.
ރައީސް ނަޝީދުގެ ހާލުކޮޅާ ގުޅޭ މައުލޫމާތު ހިއްސާކުރަމުން އޭޑީކޭ ހޮސްޕިޓަލުން ބުނީ ރައީސް މުޙައްމަދު ނަޝީދުގެ ހަށިކޮޅަށް އަމާޒުކޮށް ދެވުނު ޙަމަލާގައި ލިބިވަޑައިގެންނެވި ޒަހްމަތަކާ ގުޅިގެން މިހާތަނަށް ގިނަ އޮޕަރޭޝަންތަކެއް ކޮށްފައިވާކަމަށެވެ. އަދި މިހާތަނަށް ކުރި އޮޕަރޭޝަންތައް ކާމިޔާބުކަމަށް ވެސް އޭޑީކޭ ހޮސްޕިޓަލުން ބުނެއެވެ. އެހެންނަމަވެސް އަދިވެސް މުހިއްމު އެއް ޕްރޮސީޖަރ ހަދަންޖެހޭކަމަށް އެ ހޮސްޕިޓަލުން ބުނެއެވެ.
ރައީސް ނަޝީދަށްް ލިބިވަޑައިގެންނެވި ޒަހްމަތަކާ ގުޅިގެން މިހާތަނަށް ކުރި އޮޕަރޭޝަންތަކުގެ ތަފްސީލެއް އަދި އޭޑީކޭއިން ހާމަކޮށްފައެެއް ނުވެއެވެ. ބުރާސްފަތި ދުވަހުގެރޭ ދިން މި ހަމަލާގައި ރައީސް ނަޝީދާއި އެމަނިކުފާނުގެ ދެ ހަށިފާރަވެރިންގެ އިތުރުން އާއްމު ރައްޔިތަކާއި އިނގިރޭސިވިލާތަށް ނިސްބަތްވާ ރައްޔިތަކު ވެސް ވަނީ ޒަޚަމްވެފައެވެ.
